काठमाडौँ - काठमाडौँ उपत्यकाका यात्रुलाई सस्तो, सुलभ, स्तरीय र भरपर्दो नगर यातायात सेवा दिने गरी सरकारीस्तरबाट खोल्ने भनिएको यातायात कम्पनीको काम अलपत्र बनेको छ।
संघीय मामिला तथा स्थानीय विकास मन्त्रालयको अग्रसरता एवं काठमाडौँ महानगरपालिकाको नेतृत्वमा गत वर्ष माघमा उपत्यकाका २२ नगरपालिकाले शेयर राखी कम्पनी स्थापना गर्न लागेका थिए।
यसअघि महानगरपालिकाका कार्यकारी अधिकृत रहेका मन्त्रालयका प्रवक्ता रुद्रसिंह तामाङ कम्पनी खोल्ने तयारी भएपनि मुलुक नयाँ संरचनामा गई स्थानीय तहमा जनप्रतिनिधि निर्वाचित भई आएकाले काम रोकिएको बताउँछन्।
'महानगरपालिका र नगरपालिकामा निर्वाचित प्रमुखले चाहनुभयो भने तयार भएका सबै कागजपत्र दिन हामी तयार छौँ। जसबाट अहिलेसम्म भएका कामहरुबाटै प्रक्रिया अगाडि बढ्छ। तर नयाँ संरचनाअनुसार मन्त्रालयले नै कम्पनी खोल्न नसक्ने भयो,' उनले भने।
स्थानीय सरकारले नगर बस चलाउने विश्वव्यापी अभ्यास रहेकाले नेपालमा सहज र सुलभ सार्वजनिक यातायातका लागि कम्पनीको आवश्यकता रहेको मन्त्रालयले जनाएको छ। यसका लागि स्थानीय सरकारमा इच्छाशक्ति हुनुपर्ने तामाङको भनाइ छ। एक वर्षअघि १० करोड रुपैयाँ सञ्चालन खर्च हुने गरी मन्त्रालयको पूर्वाधार विकास महाशाखाले कम्पनी स्थापनाको तयारी गरेको थियो।
सोका लागि काठमाडौँ महानगारपालिकाले दुई करोड, ललितपुर महानगरपालिकाले एक करोड, भक्तपुर नगरपालिकाले ६० लाख तथा कीर्तिपुर, गोकर्णेश्वर, बूढानीलकण्ठ, टोखा, नागार्जुन र मध्यपुर ठिमि नगरपालिकाले ३५/३५ लाख रुपैयाँ शेयर लगानी गर्ने भनी सहमति भएको थियो।
शङ्खरापुर, कागेश्वरी मनोहरा, तारकेश्वर, चन्द्रागिरि, दक्षिणकाली, कार्यविनायक, गोदावरी, महालक्ष्मी, बज्रबाराही, अनन्तलिङ्गेश्वर, सूर्यविनायक, चाँगुनारायण र महामञ्जुश्री नगरकोट नगरपालिकाले १०/१० लाख गत आर्थिक वर्षको बजेटबाट कम्पनीका लागि छुट्याएका थिए । सरकारले गत आर्थिक वर्षमै सो कार्यका लागि भन्दै तीन करोड रुपैयाँ अनुदानसमेत दिएको थियो ।
कम्पनीको प्रबन्धपत्र र नियमावली तयार पारी सबै नगरपालिकाका तर्फबाट कार्यकारी अधिकृतलाई एक वर्षअघि नै हस्ताक्षर गराइएको थियो । कम्पनी दर्ता गरी तीन महिनाभित्र यातायात सञ्चालन गर्ने गरी काम अघि बढेको बताइएको थियो ।
राजधानीमै यात्रुले सकसपूर्ण रुपमा सार्वजनिक यातायातमा यात्रा गर्न बाध्य भएपछि प्रधानमन्त्री तथा मन्त्रिपरिषद् कार्यालयले २०७३ साउनमा स्थानीय निकायलाई परिचालन गरी कम्पनी स्थापना गर्न निर्देशन दिएको थियो। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
