इटहरी– उद्योग वाणिज्य महासंघकी केन्द्रीय अध्यक्ष भवनी राणाले सरकारको जबरजस्तीले भिसिटिएस लागू नहुने बताएकी छन्। सरकारले बुधबारबाट मालवाहक सवारी साधनलाई विद्युतीय माध्यमबाट ट्रयाकिङ गर्ने गरी भेहिकल एन्ड कन्साइनमेन्ट ट्रयाकिङ सिस्टम (भिसिटिएस) कार्यान्वयनमा ल्याएसँगै उनले पूर्वतयारी बिनै काम सुरु भएको बताएकी हुन्।
उद्योग वाणिज्य संघ इटहरीको ९औं पदस्थापन कार्यक्रममा सम्बोधन गर्दै उनले सरकारी संयन्त्रले निजी व्यवसायी संघको परामर्श बिना नै विद्युतीय माध्यमबाट ट्रयाकिङ गर्ने सिस्टम ल्याएको उनको भनाइ छ। अहिलेको सरकारी निर्णयको विरोधमा व्यवासयीले ढुवानी देशभर ढुवानी सेवा अवरुद्ध गर्न बाध्य भएको उनले बताइन्।
निजी क्षेत्रले हिजोको राजनीतिक आन्दोलनमा सहयोग गरेको कुरा स्मरण गर्न पनि उनले सरकारलाई आग्रह गरेकी छिन्।
अबको एजेन्डा भनेको आर्थिक समृद्धिको एजेन्डा भएकाले सरकारले पनि त्यसमा ध्यान दिइरहेको उनको भनाइ छ। तर कतिपय अवस्थामा निजी लगानीकर्तालाई नै हतोत्साही हुनेगरी गरिएका सरकारी निर्णयले आर्थिक समृद्धि हासिल नहुने उनको तर्क छ।
भिसिटिएसका विषयमा आफूहरुले राजस्व अनुसन्धानका प्रमुखहरुलाई पनि भेट गरिसकेको र सरोकारवाला सरकारी निकायसँग बारम्बार छलफल गरिरहेको उनले बताइन्। ‘हामी पनि सरकारसँग सहकार्य गरेर अगाडि बढ्न चाहन्छौं,’ उनले भनिन्, ‘तर सरकार एकलौटी रुपमा भिसिटिएस लागू गर्न खोजिरहेको छ।’
भिसिटीएसले आन्तरिक राजस्व, सशस्त्र प्रहरी, राजस्व अनुसन्धानले बाटैमा रोक्ने र दु:ख दिने काम गरिरहेको थियो जुन कुरा अब हल हुने भएको छ। तर यति हुँदाहुँदै पनि यो अहिलेको अवस्थामा व्यवहारिक हुन नसक्ने उनको दाबी छ।
कम्तीमा ३ महिना ट्रायल पिरियड राखेर अनुसन्धान गरेको भए राम्रो हुने उनको बुझाइ छ। ग्रामीण क्षेत्रमा यसलाई लागू गर्न नसकिने उनी बताउँछिन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।