काठमाडौं- चालू आर्थिक वर्षमा कार्यान्वयनमा ल्याइएको प्रधानमन्त्री रोजगार कार्यक्रममा २५ हजार ६ सयले रोजगारी पाएका छन्। ३० हजार युवालाई रोजगारी उपलब्ध गराउने लक्ष्यसहित १ सय ४८ स्थानीय तहमा सञ्चालित प्रधानमन्त्री रोजगार कार्यक्रम २५ हजार ६ सय ५२ जनाले रोजगारी पाएका हुन्।
सो कार्यक्रमबाट २५ हजार युवाले सरदरमा १५ दिनको रोजगारी पाएको जानकारी प्राप्त भएको श्रम, रोजगार तथा सामाजिक सुरक्षा मन्त्रालयले जानकारी दिएको छ।
‘प्रधानमन्त्री रोजगार कार्यक्रम अन्तर्गत यस आर्थिक वर्ष भित्र १ लाख ६ हजार बेरोजगार युवाहरुलाई रोजगारी दिने सरकारको लक्ष्य हो। कति स्थानीय तहबाट कति संख्यामा युवाहरुले रोजगारी पाए भन्ने पुरै तथ्यांक आइसकेको छैन,’ प्रधानमन्त्री रोजगार कार्यक्रम हेर्ने मन्त्रालयका उपसचिव लोकनाथ भुसालले भने।
प्रधानमन्त्री रोजगार कार्यक्रम अन्तर्गत विभिन्न स्थानीय तहमा आजसम्म पनि काम भइरहेको भुसालले बताए।
प्रधानमन्त्री रोजगार कार्यक्रममा हरेक श्रमिकलाई सरकारले निर्धारण गरिएको मजदुरको न्यूनतम पारिश्रमिक अनुसार ज्यालादर निर्धारण गरिएको भुसालको भनाइ छ।
सरकारले २०७५ साउन १ गतेदेखि नै मजदुरको न्यूनतम पारिश्रमिक १३ हजार ४ सय ५० निर्धारण गरेको छ। सो व्यवस्था अनुसार ३ सय २५ आधारभूत र १ सय ९२ महंगी भत्ता गरी दैनिक न्यूनतम ५ सय १७ रुपैयाँ कामदारले पाउँछन्।
श्रम, रोजगार तथा सामाजिक सुरक्षामन्त्री गोकर्ण विष्टकै गृहजिल्ला गुल्मीको धुर्कोटबाट सुरु भएको प्रधानमन्त्री रोजगार कार्यक्रममार्फत् देशैभरका ७ सय ५३ वटै स्थानीय तहका युवा लाभान्वित हुने सरकारले योजना अघि सारेको थियो।
सोही योजनामार्फत् पाल्पाको रम्भा गाउँपालिका, रिब्दीकोट गाउँपालिका, दैलेखको गुराँसे गाउँपालिका, भक्तपुरका सूर्यविनायक, चाँगुनारायण लगायत ४ वटा नगरपालिका, अर्घाखाँचीका स्थानीय तह, भरतपुरका केही स्थानीय तह, खोटाङको रुपाकोट मझुवागढी नगरपालिकालगायत विभिन्न स्थानीय तहका बेरोजार प्रधानमन्त्री रोजगार कार्यक्रमबाट लाभान्वित भएको मन्त्रालयले जनाएको छ।
‘ठ्याक्कै कति वटा स्थानीय तहबाट कति जना बेरोजगार युवाहरुले प्रधानमन्त्री रोजगार कार्यक्रममार्फत रोजगारी पाए भन्ने तथ्यांक मन्त्रालयसम्म आइपुगेको छैन, अझै केही समय लाग्छ,’ उपसचिव लोकनाथ भुसालले भने।
प्रधानमन्त्री रोजगार कार्यक्रम उत्साहजनक भएको दाबी
आन्तरिक रोजगारी प्रवर्द्धन गर्न सरकारले अघि सारेको लोकप्रिय प्रधानमन्त्री रोजगार कार्यक्रम केही आलोचित भएको थियो। फूलबारी गोड्ने, बाटोघाटो सफा गर्ने, फूलबारी गोड्ने, चौतारा बनाउने, बाँदर लखेट्ने जस्ता निःशुल्क श्रमदान गर्न सकिने काममा पनि सरकारले ठूलो बजेट खेर फालेको आरोप पनि सरकारमाथि आएको थियो।
तर प्रधानमन्त्री रोजगार कार्यक्रमले आम युवाहरुमा उत्साह थपेको श्रम मन्त्रालयको दाबी छ।
‘हामीले कार्यान्वयनमा ल्याएको प्रधानमन्त्री रोजगार कार्यक्रम उत्साहजनक रुपमा सफल भएको छ, बेरोजगारको चपेटामा रहेका युवाहरुले केही दिनको भएपनि रोजगारी पाए, उनीहरुलाई देशमै केही काम गर्नुपर्छ भन्ने उत्साह जागेको छ,’उपसचिव भुसालले थपे।
प्रधानमन्त्री रोजगार कार्यक्रममा भएका आलोचनात्मक टिकाटिप्पणीका बारेमा छानबिनका लागि प्रत्येक स्थानीय तहका रोजगार संयोजकलाई पारदर्शी रुपमा कामका लागि पारिश्रमिकमा आधारित सामुदायिक आयोजना सञ्चालनको अनुगमन प्रतिवेदन माग गरेको छ।
प्रधानमन्त्री रोजगार कार्यक्रम : कस्ता योजना सम्पन्न?
प्रधानमन्त्री रोजगार कार्यक्रममार्फत् सरसफाई, चौतारा निमार्ण, बाटोघाटो निमार्ण, वृक्षरोपणलगायतका कार्यक्रम अघि सारिएको मन्त्रालयले जनाएको छ। कुन स्थानीय तहमा कुन योजना सम्पन्न भए सम्पूर्ण विवरण स्थानीय तहबाट आउन केही समय लाग्ने बताइएको छ।
‘यस कार्यक्रममार्फत धेरै उत्साहजनक र राम्रा काम सम्पन्न भएका छन्, छोटो समय भएकाले ठूलाठूला आयोजना तिर गइएन,’ भुसालले जानकारी दिए।
यसवर्ष प्रधानमन्त्री रोजगार कार्यक्रमका लागि सरकारले २ अर्ब ३६ करोड ८० लाख बजेट छुट्याएको थियो। सो रकमबाट कति रकम खर्च भयो, कति बाँकी रह्यो भन्ने तथ्यांक निकाल्न केही समय लाग्ने मन्त्रालयले बताएको छ।
आगामी आर्थिक वर्षमा सरकारले प्रधानमन्त्री रोजगार कार्यक्रममार्फत् ५ लाख बेरोजगार युवाजनशक्तिलाई १ सय दिनको न्यूनतम रोजगारी प्रदान गर्ने लक्ष्य राखेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
