सुर्खेत- जाजरकोटकी कौशिलावती खत्रीको चाहना प्रत्यक्षतर्फबाट चुनाव लडेरै सांसद बन्ने थियो। तर उनलाई पार्टीले प्रत्यक्षतर्फ टिकट दिएन, बरु समानुपातिकको बन्द सूचीमा उनको नाम राखियो। समानुपातिकबाटै प्रदेश नं ६ को सदस्य बनेकी खत्री जिम्मेवारी पाएमा मन्त्री बनेर उदाहरण काम गर्ने बताउँछिन्।
पश्चिम रुकुमकी देवी वलीलाई पनि प्रत्यक्षतर्फ उम्मेदवार बनेर चुनाव लड्ने इच्छा नभएको होइन। तर एमाले-माओवादी केन्द्रबीचको गठबन्धन त्यसमाथि प्रत्यक्ष उम्मेदवार बन्दाको खर्च। यी दुई कारणले उनी प्रत्यक्ष उम्मेदवार बन्न पाइनन्, समानुपातिकमा परिन्। अहिले समानुपातिकबाट उनी प्रदेशसभा सदस्य बनेकी छिन्।
कौशिलावती र देवी जस्तै प्रत्यक्ष चुनाव लड्ने चाहना हुँदाहुँदै पनि एमालेको समानुपातिक कोटाबाट सांसद बनेका प्रदेश नं ६ का सांसदहरुले अब यो प्रदेशलाई समृद्ध र गरिबीमुक्त बनाउने प्रतिबद्धता व्यक्त गरेका छन्।
प्रदेश ६ बाट समानुपातिकमा परेका एमालेका ६ महिला सांसदमध्ये ५ जनासँग हामीले उनीहरुको आगामी योजना र भूमिकाका बारेमा कुराकानी गरेका छौं।
‘समृद्ध प्रदेश बनाउनुपर्ने छ’
–देवी ओली, पश्चिम रुकुम
प्रदेश नं ६ सुनको सिरानी हालेर नुनको खोजीमा भौंतारिन बाध्य छ। पर्याप्त स्रोत र साधन भएर पनि त्यसको सदुपयोग गर्न नसक्दा सबैभन्दा गरिब प्रदेश बन्न पुगेका छौं। अब यहाँ उपलब्ध स्रोतहरुको समुचित उपयोगमार्फत प्रदेशलाई समृद्धि बनाउनु नै हाम्रो जिम्मेवारी र कर्तव्य हो।
जडिबुटी, जलविद्यु, जंगल, जमिन र जनशक्तिको उपयोग गर्दै यो प्रदेशलाई नेपालकै नमुना बनाउनुपर्नेछ। यसकै लागि मेरो पहल रहनेछ। यसका लागि हाम्रो मात्र भूमिका पर्याप्त हुँदैन, सबै क्षेत्रले हातेमालो गर्नुपर्छ।
‘जिम्मेवारी दिइए मन्त्री बन्न तयार’
–कौशिलावती खत्री, जाजरकोट
मेरो चाहना प्रत्यक्षतर्फबाटै चुनाव लडेर सांसद बन्ने थियो। तर पार्टीले समानुपातिकबाट उम्मेदवार बनायो। मलाई लाग्छ, अहिले पनि महिलाहरुलाई विश्वास नगर्ने र हाम्रो क्षमतालाई नजरअन्दाज गर्ने प्रवृत्ति विद्यमान छ।
समानुपातिकबाट भए पनि प्रदेश सांसद भएको छु। अब यो प्रदेशको विकास र समृद्धिका लागि मेरोतर्फबाट सकेको सबै प्रयास गर्नेछु। यो सबैभन्दा गरिब प्रदेश हो। विकासमा पछि परेको छ। सामाजिक विकृति र विसंगति कायमै छन्। यी सबै समस्या समाधान गर्दै यहाँका जनताको जीवनस्तरमा सुधार ल्याउँदै प्रदेशलाई समृद्ध बनाउनु मेरो प्रमुख कर्तव्य हो।
मलाई यहाँका जनताले भोगिरहेका सबै समस्या थाहा छ। मैले पनि तिनै समस्या भोगेर आएकी छु। यहाँका महिलाहरुले भोग्नुपरेको हिंसा, गरिबी, बेरोजगारी लगायतका समस्या समाधान गर्न म संसदभित्रबाट हरसम्भव प्रयास गर्नेछु।
हुन त महिलाहरुलाई अझै पनि विश्वास गर्ने र महत्वपूर्ण जिम्मेवारी दिने संस्कार बसिसकेको छैन। यदि जिम्मेवारी दिइन्छ भने म मन्त्री बनेर यो प्रदेशको हितमा महत्वपूर्ण काम गर्न तयार छु। मैले लामो समय अध्यापन गरेर बिताएकी छु। यहाँको शैक्षिक अवस्था र महिला तथा बालबालिकाहरुको अवस्था मलाई राम्रोसँग थाहा छ। त्यसैले यसैसँग सम्बन्धित मन्त्रालयको जिम्मेवारी पाएको खण्डमा मैले राम्रो काम गरेर देखाउन सक्छु भन्ने आँट ममा छ।
‘हिंसामुक्त समाज बनाउन पहल गर्छु’
–राजु नेपाली, सुर्खेत
यो प्रदेशको सबैभन्दा प्रमुख समस्या गरिबी हो। हालै सार्वजनिक भएको तथ्यांक अनुसार पनि ७ प्रदेशमध्ये प्रदेश नं ६ मा सबैभन्दा धेरै गरिब छन्। गरिबीलाई अन्त्य गर्नुपर्ने जिम्मेवारी अब बन्ने प्रदेश सरकारको हो। प्रदेश संसद सदस्यको रुपमा मैले मेरोतर्फबाट पनि पहल गर्नेछु। गरिबी अन्त्य नगरेसम्म प्रदेश समृद्ध बन्न सक्दैन।
रोजगारीका पर्याप्त अवसर नहुँदा यहाँका नागरिक समस्यामा छन्। भारत लगायत अन्य खाडी मुलुकमा गएर पसिना बगाउन बाध्य हुनुपरेको छ। यहाँका नागरिकलाई यहीँ नै रोजगारीको अवसर सिर्जना गर्नुपर्नेछ। यसका लागि औद्योगिक विकास अपरिहार्य छ। गरीबी हटाउन, बेरोजगारी समस्या समाधान गर्न, सुकुम्वासी समस्या अन्त्य गर्न, महिलामाथि हुने सबै खाले हिंसा अन्त्य गर्न तथा हिंसामुक्त समाज बनाउन मेरो पहल रहनेछ। महिलाहरुलाई आत्मनिर्भर बनाउन सिपमूलक र आयआर्जनमा आधारित कार्यक्रमहरु सञ्चालन गर्न र सोही अनुसार आवश्यक नीति नियम बनाउन पहल गर्छु।
‘महिलाहरुलाई आत्मनिर्भर बनाउनुछ’
–मीना सिंह रखाल, दैलेख
यो प्रदेश पिछडिएको छ। त्यसमा पनि यहाँका महिलाहरुको अवस्था दयनीय देखिन्छ। शिक्षाबाट वञ्चित हुनुपरेको छ। जसले गर्दा महिलाहरु सधैं पछाडि पर्ने गरेका छन्। त्यसैले मेरो पहिलो प्राथमिकता महिलाहरुको पक्षमा काम गर्नु हुनेछ। यसका लागि हरेक महिलालाई सुसूचित गर्नेछु र उनीहरुलाई आत्मनिर्भर बनाउन पहल गर्नेछु।
महिलाहरु आत्मनिर्भर नभएकै कारण विभिन्न हिंसाबाट पीडित छन्। विभेद सहनु परेको छ। त्यसैले सबै महिलालाई आत्मनिर्भर बनाउन सिपमुलक कार्यक्रम सञ्चालन गर्नुपर्नेछ। सबै छोरीहरुलाई अनिवार्य रुपमा विद्यालय पठाउने अवस्था सिर्जना गर्नुपर्नेछ। यसका साथैसाथै यहाँ उपलब्ध स्रोतहरुको सदुपयोगमार्फत समृद्ध प्रदेश बनाउने जिम्मेवारी पूरा गर्न म प्रतिबद्ध छु।
‘समृद्ध प्रदेश र सुखी जनता लक्ष्य’
–पद्मा खड्का, सुर्खेत
आजसम्म हामीले यो प्रदेशको समस्याका कुरा मात्रै गर्यौं। यहाँ उपलब्ध स्रोतबारे पनि चर्चा गर्यौं। तर त्यसलाई सदुपयोग गर्नेतर्फ काम हुन सकेन। त्यसैले प्रदेश ६ सबैभन्दा गरिब प्रदेश बन्न पुग्यो। अब यो गरिबीलाई अन्त्य गरी समद्ध प्रदेश र सुखी जनता बनाउनु नै मेरो र हाम्रो कर्तव्य हो।
अब बन्ने प्रदेश संसदभित्र मेरो प्रमुख भूमिका प्रदेशलाई समृद्ध बनाउन, हिंसारहित समाज निर्माण गर्न, महिलाहरुको समान सहभागिता स्थापित गर्न लगायत सबैखाले समस्या समाधानका लागि नीति निर्माण गर्न हुनेछ। त्यसका साथसाथै आफ्नोतर्फ यो प्रदेशको विकासका लागि गर्न सक्ने सबै काम गर्नेछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
