काठमाडौं– नेपाल भ्रमणमा आउने पर्यटकले गर्ने खर्च २०१७ को तुलनामा सन् २०१८ मा २२ दशमलव ७३ प्रतिशतले कमी आएको छ।
नेपाल पर्यटन बोर्डले सार्वजनिक गरेको पर्यटक आगमनसँगै उनीहरुले गर्ने क्रियाकलापको विवरणमा सन् २०१७ को तुलनमा सन् २०१८ मा प्रतिपर्यटक खर्चमा १० डलरले कमी आएको हो। सन् २०१७ मा नेपाल भ्रमणमा आउने एक विदेशी पर्यटकले प्रतिदिन औसत ५४ डलर खर्च गरेका थिए। तर, यो संख्या सन् २०१८ मा प्रतिपर्यटक प्रतिदिन ४४ डलरमा झरेको छ। यो वर्ष इतिहासकै सबैभन्दा बढी पर्यटक नेपाल भ्रमणमा आएका थिए।
सन् २०१८ मा नेपाल आउने पर्यटकले कुल ७० करोड ३१ लाख ७९ हजार अमेरिकी डलर खर्च गरेका छन्। यो रकम सन् २०१७ को तुलनामा बढी भए पनि पर्यटक आगमनको हिसाबले कम हो। सन् २०१७ मा प्रतिपर्यटक खर्च ५४ डलरका दरले ६५ करोड ८० लाख ९२ हजार डलर थियो।
सन् २०१८ मा नेपाल भ्रमणमा आउने पर्यटकको संख्या ११ लाख ७३ हजार ७२ पुगेको थियो। यो संख्या सन् २०१७ को भन्दा २४ दशमलव ७७ प्रतिशतले बढी थियो। सन् २०१८ मा हवाई मार्ग हुँदै ९ लाख ६९ हजार २ सय ८७ र स्थलमार्ग हुँदै २ लाख ३ हजार ७ सय ८५ विदेशी पर्यटक नेपाल भ्रमणमा आएका थिए। तर, सन् २०१७ मा नेपाल भ्रमणमा आएका ९ लाख ४० हजार २ सय १८ विदेशी पर्यटकमध्ये हवाई मार्ग हुँदै ७ लाख ६० हजार ५ सय ७७ र स्थल मार्ग हुँदै १ लाख ७९ हजार ६ सय ४१ पर्यटक नेपाल आएका थिए।
सन् २०१८ मा नेपाल भ्रमणमा आउने पुरुष पर्यटकको संख्या ६ लाख २४ हजार ९ सय २८ र महिला पर्यटकको संख्या ५ लाख ४८ हजार १ सय ४४ रहेको बोर्डले सार्वजनिक गरेको तथ्यांकमा उल्लेख छ।
सबैभन्दा बढी ३१–४५ उमेर समूहका
सन् २०१८ मा नेपाल भ्रमणमा आउने विदेशी पर्यटकको संख्यामा सबैभन्दा बढी ३१ देखि ४५ उमेर समूहको रहेको छ। यो उमेर समूहका ३ लाख ६० हजार २ सय ३७ विदेशी नेपाल भ्रमणमा आएका थिए। यसैगरी सबैभन्दा कम १५ वर्षभन्दा तलका ५४ हजार ८ सय ७० जना नेपाल भ्रमणमा आएका थिए। यसैगरी १६ देखि ३० वर्ष उमेर समूहका २ लाख ६९ हजार ६ सय ४८, ४६ देखि ६० उमेर समूहका ३ लाख ३ हजार ४ सय ५२ र ६० वर्षभन्दा माथिका १ लाख ७३ हजार २ सय ९९ जना विदेशी पर्यटक नेपाल भित्रिएका थिए।
सबैभन्दा बढी भारतीय पर्यटक
सन् २०१८ मा नेपाल भ्रमणमा आउने विदेशी पर्यटकमा सबैभन्दा बढी भारतीय पर्यटक रहेको बोर्डले जनाएको छ। यसैगरी दोस्रोमा चिनियाँ, तेस्रोमा अमेरिका, चौथौमा श्रीलंका र पाचौंमा बेलायतका पर्यटक रहेका छन्।
बिदामा आउने धेरै
सन् २०१८ मा नेपाल भ्रमणमा आउने विदेशी पर्यटकको संख्यामध्ये सबैभन्दा बढी बिदाको समय सदुपयोग गर्न आउनेहरु छन्। बोर्डले सार्वजनिक गरेको तथ्यांकका आधारमा बिदा मनाउने पर्यटकको संख्या मात्रै ७ लाख ३ हजार ८ सय ४३ छ। यसैगरी धार्मिक यात्रामा आउने पर्यटकको संख्या १ लाख ८७ हजार ६ सय ९२ र ट्रेकिङ तथा हिमाल आरोहणमा आउनेको संख्या १ लाख ६९ हजार १ सय ८० जना रहेको बोर्डले जनाएको छ। यसबाहेक अन्य विभिन्न उद्देश्यसहित नेपाल आउने पर्यटकको संख्या भने १ लाख १२ हजार ३ सय ५७ रहेको छ।
सबैभन्दा बढी पर्यटक बोक्नेमा नेपाल एयरलाइन्स
सन् २०१८ मा नेपाल भ्रमणमा आएका पर्यटकमध्ये सबैभन्दा बढी पर्यटक नेपाल एयरलाइन्समार्फत आएका छन। यसैगरी दोस्रो धेरै पर्यटक बोक्नेमा जेट एयरवेज हो। तर, अहिले जेट एयरवेज आर्थिक संकटका कारण बन्द भइसकेको छ। यसैगरी तेस्रो बढी पर्यटक बोक्ने एयरलाइन्समा कतार, चौथौमा फ्लाई दुबई र पाचौंमा एयर इन्डिया रहेको छ।
पर्यटकको बसाइ घट्यो
सन् २०१७ को तुलनामा नेपाल आउने पर्यटकको संख्या २०१८ मा बढे पनि पर्यटकको नेपाल बसाइ अवधि भने घटेको छ। पर्यटकको बसाइ अवधि र खर्च घट्नु भनेको पर्यटनको क्षेत्रमा सुधार नआउनेको संकेत हो। सन् २०१८ मा औसतमा पर्यटकको बसाइ १२ दशमलव ४ दिनमा झरेको छ। यो अवधि सन् २०१७ मा १२ दशमलव ६ दिन रहेको थियो।
४ वटा तारेहोटल थपियो
सन् २०१८ मा थप ४ वटा तारेको होटल सञ्चालनमा आएका छन्। योसँग सन् २०१८ सम्ममा आइपुग्दा नेपालमा तारे होटलको संख्या १ सय २९ पुगेको छ। यो संख्या सन् २०१७ सम्ममा १ सय २५ थियो।
यसैगरी पर्यटकीय होटलको संख्या पनि सन् २०१८ मा आइपुग्दा ११ सय २५ वटा पुगेको छ। सन् २०१७ सम्म कुल ३९ हजार ८ सय ३३ होटलमा रहेको बेड संख्या सन् २०१८ को अन्त्यसम्म बढेर ४० हजार ८ सय ५६ पुगेको छ।
यसैगरी सन् २०१८ मा आइपुग्दा ट्राभल एजेन्सी ३५ सय ८, ट्रेकिङ ऐजेन्सी २६ सय ४९, पर्यटक गाइड ४१ सय २६ र ट्रेकिङ गाइडको संख्या १६ हजार २ सय ४८ पुगेको बोर्डले जनाएको छ।
(सबै तस्बिर : welcomenepal.com)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
