काठमाडौं- एक पटकको फुल चार्जमा १ हजार किलोमिटरभन्दा बढी माइलेज दिने इलेक्ट्रिक बस तथा माइक्रो बस नेपाल भित्रिने भएको छ। अस्ट्रोलियन कम्पनी ब्रिगसनको उक्त उत्पादन नेपाली बजारमा हिमालय मोट्रोक्स प्रालिले ल्याउने भएको हो।
हिमालय मोट्रोक्सले बुधबार उक्त ब्रान्डको ‘ब्रान्ड लन्च’ गर्ने तयारी गरेको छ। अस्ट्रेलियन ब्रान्ड ब्रिगसनले भारतमा प्लान्ट स्थापना गरी सवारी उत्पादन थालेको छ। भारतीय प्लान्टबाट उत्पादन सुरु भएलगत्तै उक्त ब्रान्डका सवारी नेपाल आउने हिमालय मोरोरोक्सका प्रबन्ध निर्देशक ध्रुवबहादुर थापाले जानकारी दिए।
‘बुधबार हामीले औपचारिक रुपमा ब्रिगसनको ब्रान्ड लन्च गर्दैछौं,’ उनले भने, ‘कम्पनीले भारतमा प्लान्ट स्थापना गरी सवारी उत्पादन गरिरहेको छ। त्यहाँ उत्पादन बजारमा आएलगत्तै नेपाल ल्याउनेछौं।’ ब्रिगसनका इलेक्ट्रिक सवारीले सबैभन्दा धेरै माइलेज दिने रेकर्ड कायम गरेको छ। नेपाली बजारमा सुरुमा बस तथा माइक्रो बस ल्याउने तय भएको थापाले बताए।
‘भारतमा ब्रिगसनका बस तथा माइक्रो बसको रोड टेस्ट भइरहेको छ। नेपाल र भारतको भूगोल एकै खालको भएकाले उक्त सवारी यहाँ पनि उपयुक्त हुने छन्,’ उनले भने, ‘बस तथा माइक्रो बस आएको केही समयपछि प्यासेन्जर कार पनि ल्याउने योजनामा छौं।’ ब्रिगसनका ब्याट्रीमा कम्पनीले २० वर्षको वारेन्टी दिएको उनले जानकारी दिए।
ब्रिगसनका बसले एक पटकको फुल चार्जमा १ हजार १८ किलोमिटर माइलेज दिई रेकर्ड कायम गरेको छ। ब्रिगसनको उक्त रेकर्ड हालसम्म अर्को कम्पनीले ब्रेक गर्न सकेको छैन। नेपालमा ब्रिगसनका बस तथा माइक्रो बसले एक पटकको चार्जमा ८ सय किलोमिटरभन्दा बढी माइलेज दिने अनुमान गरिएको थापाले बताए।
नेपालको बाटोअनुसार ब्रिगसनका बसले कम्तिमा ८ सय किलोमिटर माइलेज दिने अपेक्षा कम्पनीले गरेको थापाले उल्लेख गरे। सरकारले लिएको नीतिअनुसार विद्युतीय सवारी प्रवर्द्धन गर्न आफूहरु पनि लागि परेको उनले बताए। ब्रिगसनको अर्को सकारात्मक पक्ष भनेको २० वर्ष वारेन्टीका साथै रिसाइकल गर्न मिलले ब्याट्रि प्रयोग गरिएको छ।
पछिल्लो समय इलेक्ट्रिक सवारीको विकास तथा वृद्धिसँगै यसमा प्रयोग भएको ब्याट्रि व्यवस्थापनको चिन्तासमेत व्यापक रुपमा उठ्ने गरेको छ। तर ब्रिगसनका सवारीमा प्रयोग भएका व्याट्रि रिसाइकल गर्न मिल्ने भएकाले व्यवस्थापनको कुनै समस्या नरहेको थापाको भनाइ छ।
ब्रिगसनका बस तथा माइक्रो बसको मूल्यबारे भने सवारी आएपछिमात्र भन्न सकिने प्रबन्ध निर्देशक थापाले बताए। ‘अबको २/३ महिनाभित्र ब्रिगसनका बस तथा माइक्रो बस नेपाली बजारमा भित्रने छन्, मूल्य त्यही बेला निर्धारण होला,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
