ad

उपराष्ट्रपति पुनसँग चीनका उपप्रधानमन्त्रीको शिष्टाचार भेट

नेपाल लाइभ

Nepal Live

छेन्दु, चीन– चीनको औपचारिक भ्रमणमा रहेका उपराष्ट्रपति नन्दबहादुर पुन ‘पासाङ’सँग चीनका उपप्रधानमन्त्री हु छुन्ह्वाले शिष्टाचार भेट गरेका छन्। चिनियाँ उपप्रधानमन्त्री हुले सरकारी अतिथि गृहमा करीब एक घन्टा शिष्टाचार भेट गरेका हुन्। 

उपप्रधानमन्त्री हुसँगको भेटमा उपराष्ट्रपति पुनले नेपाल–चीन सम्बन्ध सगरमाथा जत्तिकै उच्च र नङमासु जतिकै प्रगाढ बनिसकेको बताएका थिए। 

पुनले सन् १९५५ मा औपचारिक सम्बन्ध स्थापना भएपनि सदियौंदेखि दुई देशबीच सांस्कृतिक सम्बन्ध रहेको चर्चा गरे। जनस्तरसम्मै दुई देशको सम्बन्ध विस्तार भएको उनले बताएका थिए। 

उपराष्ट्रपति पुनले नेपालका प्रधानमन्त्रीको भ्रमणका क्रममा भएका व्यापार तथा पारवहान सम्झौता र चीनले अगाडि सारेको ‘बेल्ट एण्ड रोड इनिसियटिभ (बिआरआई)’ मा भएको हस्ताक्षर नेपालका लागि विशेष रहेको बताएका थिए। 

उपराष्ट्रपति पुनले नेपाल एक चीन नीतिप्रति सदैव प्रतिवद्ध रहेको उल्लेख गर्दै चीन विरुद्ध नेपाली भूमि प्रयोग हुन नदिने प्रतिवद्धता व्यक्त गरेका थिए। 

उनले नेपालको समृद्धिका लागि चीनको ठूलो साथ सहयोगको खाँचो रहेको बताएका थिए। उनले नेपालको जलविद्युत, कृषि, पर्यटन, जडिबुटी, भौतिक पूर्वाधार निर्माणमा लगानी गर्न आग्रह गरेका थिए। 

चीनका उपप्रधानमन्त्री हुले नेपाल र चीनका साझेदार देश भएको बताए। बिआरआइ कार्यक्रम मार्फत् चीनले नेपालसँगको सम्बन्ध थप उचाईमा पुर्याउन चाहेको बताएका थिए।

नेपालको स्थिरता, विकास, समृद्धि र नेपाली जनताको जीवनस्तरमा परिवर्तन ल्याउन नेपालले चाल्ने हरेक कदममा चीनले स्वागत गर्ने उनले बताए। नेपालमा चीनका विभिन्न परियोजना सञ्चालनमा रहेको स्मरण गर्दै उनले भूकम्पपछिको पुनःनिर्माणमा सहयोग बढाउन सकिने विषयमा छलफल भईरहेको समेत जानकारी दिएका छन्। 

१७ औं पश्चिम चीन अन्तर्राष्ट्रिय मेलामा भाग लिन उपराष्ट्रपति बुधबार छुन्दु पुगेका हुन्। बिहीबार मेलाको उद्घाटन समारोहलाई उपराष्ट्रपति पुनले सम्बोधन गर्ने कार्यक्रम रहेको छ। 

प्राप्त प्रतिकृयाहरू

यसमा तपाइको मत


पढ्नै पर्ने