काठमाडौं- नेकपा एमाले, माओवादी केन्द्र र नयाँ शक्ति पार्टीबीचको सहकार्य एउटै कम्युनिस्ट केन्द्र बनाई मुलुकलाई समृद्धितर्फ उन्मुख गराउने उद्देश्यले भएको नेताहरुले बताएका छन्।
६ बुँदे सहमति गरी कम्युनिस्ट केन्द्र निर्माणका लागि मंसिर २१ पछि एकता गर्न तयार भएका तीन दलले आफूहरुको सहकार्य जनताको चाहान र भावना अनुसार भएको बताएका हुन्। तीन दलको चुनावी सहकार्य कुनै पार्टीविरुद्ध नभएको नेताहरुले स्पष्ट पारेका छन्।
सहमतिपत्र सार्वजनिक कार्यक्रममा बोल्दै एमाले अध्यक्ष केपी शर्माले ओलीले तीन दलको सहकार्यले इतिहास रचनाका लागि नयाँ अध्याय सुरु भएको बताए।
पार्टी एकताका लागि संयोजन समितिले छिट्टै काम थाल्ने उनले बताए। ओलीले भने, 'हामी निर्वाचनपछि एकता प्रक्रियामा जान्छौँ। त्यसका लागि गठित एकता संयोजन समितिले भोलिबाटै काम थाल्छ।'
पार्टी एकीकरणका लागि एमाले अध्यक्ष केपी ओली र माओवादी अध्यक्ष प्रचण्डलाई प्रमुख नेता बनाउँदै ८ सदस्य समिति गठन भएको छ। जसमा एमालेबाट ४, माओवादी केन्द्रबाट ३ र नयाँ शक्ति पार्टीबाट १ सदस्य रहनेछन्।
ओलीले तीन दलबीच प्रदेशसभा र प्रतिनिधिसभा निर्वाचनमा हुने सहकार्यले अत्यधिक बहुमत प्राप्त भई मुलुकमा वामपन्थी सरकार निर्माण हुने बताए।
'मुलुकको कुण्डलीमा २०७४ सालमा वामपन्थी सरकार निर्माण हुने लेखिएको छ, त्यो मेट्न कसैले सक्दैन,' ओलीले भने।
एमाले र माओवादी केन्द्रबीच राष्ट्रियता र स्वाधिनता रक्षार्थ सधैँ सहकार्य भएको भन्दै ओलीले अहिले जनताको सरकार निर्माणका लागि सहकार्य भएको उल्लेख गरे।
यस्तै, माओवादी केन्द्रका अध्यक्ष पुष्पकलम दाहाल 'प्रचण्ड'ले एमाले, माओवादी केन्द्र र नयाँ शक्तिबीचको एकता कांग्रेस विरुद्ध नभएको बताएका छन्।
एउटै कम्युनिस्ट केन्द्र निर्माण गर्ने जनताको चाहना अनुसार तीन दलको एकता प्रक्रिया सुरु भएको दाहालले जनाए। समाजवादको नमूना तयार गरेर विश्वलाई सन्देश दिन तीन पार्टीबीच एकीकरणको तयारी भएको दाहालको भनाइ थियो।
'हाम्रो सहकार्य कसैको विरुद्धमा होइन, समाजवादको मोडल तयार गरी विश्वलाई सन्देश दिनका लागि हो,' प्रचण्डले भने।
प्रचण्डले प्रदेशसभा र प्रतिनिधिसभा निर्वाचनमा सबै दलसँग तालमेलका लागि तीन दल खुला रहेको प्रस्ट पारेका छन्।
'हामी लोकतान्त्रिक र प्रगतीशिल शक्तिसँग चुनावमा सहकार्य गर्न खुला छौँ, प्रचण्डले भने, 'बचेको स्थानमा एमाले र माओवादी केन्द्रबीच ६० र ४० को भागवण्डा हुन्छ।'
नयाँ शक्ति नेपालका संयोजक बाबुराम भट्टराईले कार्यकारी प्रधानमन्त्री मार्फत मुलुकको शासन चलाउने उद्देश्यले आफूहरु एक भएको बताए।
'यो सहकार्य निर्वाचनमा दुई तिहाई बहुमत ल्याएर देशमा कार्यकारी प्रधानमन्त्रीको शासन ल्याउन हो,' उनले भने।
तीन दलबीच चुनावी तालमेल हुने भएपछि साझा घोषणापत्र निर्माणका लागि समिति गठनको सहमति भएको छ। यस्तै निर्वाचन लगत्तै पार्टी एकीकरणको प्रक्रिया सुरु हुने भएपछि घोषणापत्र र दस्तावेज निर्माणका लागि समेत समिति गठन भएको छ।
तीन पार्टीबीच एकता गर्ने सहमति गरेका दलहरुले एक अर्का विरुद्ध नकरात्मक टिप्पणी नगर्ने भन्दै हस्ताक्षर गरेका छन्। 'सार्वभौमिक रुपमा एक अर्कालाई नकरात्मक टिप्पणी गर्न पाइनेछैन,' हस्ताक्षरित सहमतिपत्र पढ्दै माओवादी केन्द्रका नेता जनार्दन शर्माले भने।
शान्ति प्रक्रियादेखि नै कम्युनिस्ट केन्द्र निर्माण गर्न एमाले र माओवादी केन्द्रबीच जारी प्रयास सार्थक भएको भन्दै नेताहरुले खुसी व्यक्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1790066546.png)
-1786602170.png)
-1789631269.jpg)
