काठमाडौं– एमाले र माओवादीबीच भोलि नै पार्टी एकता हुने सम्भावना बढेको छ। यद्यपि, दुवै पार्टीका उच्च नेताहरुले भने मिति सम्बन्धमा फरकफरक प्रतिक्रिया दिइरहेका छन्।
माओवादीका नेताहरुले भोलि नै पार्टी एकता हुने र निर्वाचन आयोगमा दर्ता हुने सम्भावना रहेको प्रतिक्रिया दिइरहँदा एमाले नेताहरु भने भोलि पार्टी एकता हुने सम्भावना कम भएकाले मिति भने तोकिन सक्ने बताउँछन्। त्यसरी तोकिने मिति जेठ ६ हुन सक्ने एमालेका एक उच्च नेताले प्रतिक्रिया दिए।
भोलि नै एकता गर्ने सम्भावना भएमा पत्रकार सम्मेलन र ६ गते भएमा संयुक्त सभा गरेर पार्टी एकताबारे जानकारी दिइनेछ।
एकता प्रक्रियामा सुरुदेखि नै सक्रिय एक माओवादी नेताले भोलि पार्टी एकता हुने सम्भावना ९९.९ प्रतिशत रहेको दाबी गरे। उनका अनुसार भोलि नै दुई पटक एकता संयोजन समितिको बैठक बस्नेछ। 'भोलि नै ९९.९ प्रतिशत पार्टी एकता हुन्छ भनेर बुझ्नुस्', ती नेताले भने, 'भोलि नै ८ बजे संयोजन समितिका सदस्यहरु मदन भण्डारीलाई श्रद्धाञ्जली दिन जानेछौं। १० बजे एकता संयोजन समितिको बैठक बस्नेछ। त्यसपछि आ–आफ्नो बैठक फेरि बस्छौं। त्यसपछि संयुक्त बैठक बसेर एकता घोषणा गर्ने र निर्वाचन आयोगमा एकीकृत पार्टी दर्ता हुन सक्छ।'
उनले दुई पार्टीको संयुक्त भने केही पछि हुने जानकारी गराए।
पार्टी एकताको विषयमा एमालेबाट सक्रिय भूमिका निर्वाह गरेका एक एमाले नेता भने भोलि नै एकता हुने सम्भावना भए पनि त्यो निकै कम रहेको बताउँछन्। 'भोलि बस्ने एकता संयोजन समितिको बैठकबाट एकताको मिति तय हुन सक्छ', उनले भने, 'त्यो मिति जेठ ६ हुन सक्छ।'
उनले दुई पार्टीको संयुक्त सभा गरेर जेठ ६ गते पार्टी एकता घोषणा गर्ने सम्भावना रहेको बताए।
दुवै नेताले पार्टी एकताको विषयमा मिल्न बाँकी भनिएका सबै विषय मिलिसकेको बताए। यद्यपि, मिलेका भनिएको विषयबारे भने खुलाउन चाहेनन्।
आजै बिहान एमाले र माओवादी अध्यक्षबीच करिब दुई घन्टा एक्लाएक्लै छलफल गरेका थिए। आन्दोलनहरुलाई बुझ्ने कुरामा आ-आफ्ना बुझाइ थिए। संगठनात्मक संरचना र नेताहरुको व्यवस्थापनमा केही अलमल थियो, त्यो अब टुंगो नजिक पुगिसक्यो', माओवादी नेता देवेन्द्र पौडेलले भने, 'अब एकताका लागि खासै कुरा बाँकी रहेनन्।'
बैसाख ४ गते बसेको एकता संयोजन समितिको बैठकले विवाद र आशंकाका विषय हल गर्न दुई अध्यक्षलाई जिम्मा दिएको थियो। आजको बैठक त्यही आशंका हटाउनेतिर केन्द्रित भएको बताइएको छ। विशेषगरी एकीकृत पार्टीमा आफ्नो भूमिका के हुने भन्नेबारे माओवादी अध्यक्ष प्रचण्ड अलमलमा रहेको खबरहरु सार्वजनिक भएका थिए। आजको बैठकमा ओलीले प्रचण्डलाई आश्वस्त तुल्याएको माओवादीका अर्का एक नेताले नेपाल लाइभसँग भने।
त्यसो त दुवै अध्यक्षले अचानक पार्टी एकता हुन सक्ने बताउने गरेका थिए। बैसाख ९ गते लेनिन दिवसको अवसरमा काठमाडौंमा आयोजित दुवै पार्टीको संयुक्त कार्यक्रममा प्रचण्डले 'ड्याम्मै एकता हुन सक्ने' बताएका थिए। उनले अब दायाँ-बायाँ गर्ने ठाउँ नभएको बताउँदै भनेका थिए, 'अब हल्ला भएको दिन होइन, थाहा नभएको दिन ड्याम्मै पार्टी एकता हुन्छ। हेर्दै जानुहोला- तपाईंहरूले थाहा नपाएको दिन पार्टी एकता हुन्छ।'
उस्तै अभिव्यक्ति ओलीको पनि थियो। युवा संघ नेपालको २८ औं स्थापना दिवसको अवसरमा मंगलबार एमाले अध्यक्ष केपी शर्मा ओलीले कुनै पनि दिन दुई दिनको मिति राखेर पार्टी एकताको मिति घोषणा हुन सक्ने बताएका थिए। 'कुनै पनि बेला, हामीलाई धेरै तयारी केही गर्नु छैन। गर्ने भनेपछि गर्ने। हामी दुई वा तीन दिनको समय राखेर पार्टी एकताको मिति घोषणा गर्न सक्छौं र निकट समयमा घोषणा गर्न सक्छौं', उनले भनेका थिए।
दुई अध्यक्षबीच फाटो बढेको भन्ने विश्लेषणलाई पनि खण्डन गरेका थिए। उनले यता र उता फर्किएका फोटो राख्ने सञ्चारमाध्यमलाई कताकता फर्किएका छन् भनेर भोलि (बिहीबार) बिहान बालुवाटार आउन आग्रह समेत गरेका थिए। साथै एमालेका नेताहरु कता फर्किएका रहेछन् भनेर बुझ्न बिहीबार बेलुका ४ बजे बालुवाटार आउन अनुरोध गरे।
ओलीले आग्रह गरेको भोलिपल्ट दुई अध्यक्षको भेटवार्ताले एकतामा रहेका आशंकाहरुलाई मेटेका छन्।
ओलीले 'यता र उता' फर्किएको फोटो बनाउने सञ्चारमाध्यमलाई हेर्न आउन गरेको अनुरोधले आन्तरिक रुपमा दुई अध्यक्षबीच संवाद भइरहेको र त्यो सकारात्मक दिशातिर उन्मुख भएको संकेत हिजोको अभिव्यक्ति र आजको प्रगतिले दिएको छ।
बिहीबार बिहान १० बजेका लागि एकता संयोजन समितिको बैठक बोलाइएको छ। सोही बैठकबाट पार्टी एकताको आधिकारिक मिति टुंगो लाग्न सक्ने सम्भावना छ।
आजै बोलाइएको एमाले स्थायी कमिटीमा पनि पार्टी एकताको विषयमा छलफल हुने सचिव योगेश भट्टराईले जानकारी दिएका छन्। 'बैठकले एकताको मिति नै तोक्न सक्छ', उनले भने।
एमालेले भोलि बिहानका लागि आकस्मिक रुपमा पार्टीको केन्द्रीय कमिटीको बैठक पनि बोलाएको छ। उसले बैठकका लागि पार्टी एकताको कार्यसूचि तय गरिएको विज्ञप्तिमार्फत जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1790066546.png)
-1786602170.png)
-1789631269.jpg)
