कोलम्बो- श्रीलंकामा संकटकालीन अवस्थाको समयावधि लम्ब्याइएको छ। श्रीलंकाली राष्ट्रपति मैत्रीपाला सिरिसेनाले शनिबार यहाँको संकटकालीन अवस्थाको समयावधि थप लम्ब्याएका अन्तर्राष्ट्रिय समाचार संस्थाहरुले जनाएका छन्।
राष्ट्रपति मैत्रीपाला सिरिसेनाले शनिबार एक निर्देशिका जारी गर्दै संकटकालीन अवस्थाको समयावधि थप लम्ब्याइएको जानकारी दिएका हुन्। उनले यहाँका नागरिकको सुरक्षाको अवस्थालाई मध्यनजरगरी यो अवधि तेस्रो पटक लम्ब्याइएको पनि सो निर्देशिकामा स्पष्ट गरेका छन्।
गत अप्रिलमा भएका आतंककारी हमलामा परी २ सय ५८ जनाको ज्यान गएको थियो। सो आक्रमण शृंखलाबद्ध रुपमा भएको थियो।
त्यस हमलापछि श्रीलंकामा त्रास छाएको थियो। त्यस हमलापछि त्यसमा संलग्नहरुको खोजीका क्रममा अहिले पनि कम्तीमा १ सय जना व्यक्ति त्यहाँको जेलमा रहेका छन्।
राजधानी कोलम्बोमा रहेका तीन ओटा चर्च र अरु तीन ओटा पाँचतारे होटलमा यस्तो हमला भएको थियो। मे महिनाको अन्तिमतिर श्रीलंकाली राष्ट्रपति सिरिसेनाले पश्चिमा देशहरुका कूटनीतिज्ञहरुसँग कुराकानी गर्दै देशको शान्ति सुरक्षाको अवस्था पहिलेकै अवस्थामा पुगेर सामान्य भइसकेको भन्दै यही जुन २२ मा सकिने संकटकालको अवस्थाको अवधि नबढाउने बताएका थिए।
तर, उनले संकटकालीन अवस्थाको समयावधि बढाएकोमा सबैले आश्चर्य मानेका राजधानी कोलम्बोबाट प्राप्त समाचारमा जनाइएको छ।
सार्वजनिक सुरक्षाका लागि संकटकाल फलदायी भएको र आवश्यक पनि देखिएकाले म्याद थपिएको राष्ट्रपति सिरिसेनाले स्पष्ट पारेका छन्। उनले हस्ताक्षर गरेर विषेश राजपत्रमा प्रकाशित सूचनाका अनुसार सेवा प्रवाह र दैनिक जीवनमा सहजता आउने उल्लेख गरिएको छ।
आतङ्ककारीहरुले गत अप्रिल २१ का दिन आक्रमण गरेका थिए भने राष्ट्रपति सिरिसेनाले त्यसको भोलिपल्ट अप्रिल २२ मा संकटकाल घोषणा गरेका थिए।
सुरुमा एक महिनाका लागि घोषणा गरिएको संकटकाल मे २२ मा एक महिना पूरा भएपछि फेरि एक महिनाका लागि थपिएको थियो। त्यसैलाई निरन्तरता दिँदै शनिबार फेरि एक महिनाका लागि थपिएको छ।रासस/एएफपी/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
