इटहरी– इटहरी उपमहानगरपालिकाका मेयर द्वारिकलाल चौधरीले महिलालाई अपमान हुने शब्द प्रयोग गरेको भन्दै आलोचना सुरु भएको छ।
असार ४ गते सामाजिक विकृति विरुद्धको कार्यक्रममा चौधरीले प्रयोग गरेको शब्दप्रति महिलाहरुले आपत्ति जनाएका हुन्।
इटहरी उपमहानगरपालिकाको महिला सञ्जालले एक विज्ञप्ति नै जारी गरी सम्पूर्ण महिलाको शिर ठाडो नहुने अवस्था सिर्जना भएको बताएको छ। सञ्जालकी अध्यक्ष विमला ढकालसहित २२ जना महिलाको संयुक्त हस्ताक्षर रहेको विज्ञप्तिमा मेयरले प्रयोग गरेको उक्त भाषाप्रति आपत्ति जनाइएको छ। साथै मेयरको उक्त अभिव्यक्तिले महिलाको अस्मितामा नै आँच आएको भन्दै विरोध जनाइएको छ।
मेयरले बारम्बार विभिन्न हर्कतहरु गरिरहेकाले अब कोही पनि चुप लागेर बस्न नमिल्ने सञ्जालकी अध्यक्ष ढकालले बताइन्। केही दिनअगाडि पत्रकारमाथि र अहिले महिलामाथि भएको प्रहारले आफूहरुलाई चिन्तित तुल्याएको उनको भनाइ छ।
प्रदेश १ की प्रदेशसभा सदस्य बिन्दिया कार्कीले मेयरको यस अभिव्यक्तिले नारी अस्मितामा चोट पुगेको बताइन्। मेयरको उक्त अभिव्यक्तिले नेकपा पार्टीमाथि नै प्रश्न चिह्न खडा भएको उनको भनाइ छ। उनले बारम्बार नेकपाको कार्यकता हुँ भन्दै मनपरी अभिव्यक्ति दिने काम गरेकोले यसको जिम्मा पार्टीले लिनुपर्ने बताइन्।
त्यस्तै अखिल नेपाल महिला संघ सुनसरीकी सदस्य विष्णु भण्डारीले मेयरको शब्द खेदजनक रहेको बताइन्। यसले एक जनाको मात्र होइन, सम्पूर्ण महिलाको अस्मितामाथि प्रहार भएको उनको भनाइ छ।
नेपाली कांग्रेस इटहरीका नेता रोहित प्रसाईंले मेयरले अब माफी मागेर मात्र नहुने बताए। बारम्बार गल्ती गर्दै जाने र माफी माग्दै जाने हो भने समस्याको समाधान नहुने उनको भनाइ छ। मेयर जस्तो गरिमामय पदमा बसेको मान्छेले के बोल्ने र कस्तो बोल्ने भन्ने हेक्का नहुनु लाजमर्दो भएको उनी बताउँछन्। 'यसले महिलाको मात्र होइन, सम्पूर्ण इटहरीवासीलाई लज्जाबोध गराएको छ,' उनले भने।
मेयरले उक्त अभिव्यक्ति दिएको प्रत्यक्ष सुनेका महिलाले लाजले शिर निहुरिएको बताए। आफूहरु लाज थाम्न नसकेर कार्यक्रम स्थलबाट बाहिर बसेको तर मेयरले आफूहरु बसेकै स्थानमा आएर पनि त्यही शब्द दोहोह्याएको उनीहरु बताउँछन्।
प्रत्यक्षदर्शी उमा पोखरेलका अनुसार मेयरले आफूहरु बसेकै ठाउँमा आएर पनि सोही शब्द दोहोह्याएको बताइन्। ‘मेयर जस्तो ठूलो मान्छेले बोल्ने त्यही हो?,’ उनले प्रश्न गरेकी छिन्, ‘कि ठूलो मान्छेलाई जे बोल्न पनि छुट हुन्छ?’
अर्की महिला रीता थापामगरले मेयर जस्तो जिम्मेवार पदमा बसेको मान्छेले यस्तो अभिव्यक्ति दिनु लज्जास्पद भएको बताइन्।
यो पनि-
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786437116.jpg)
-1786184812.png)
