काठमाडौं- जेठ १२ गतेको बम विस्फोटमा परी गम्भिर घाइते भएका नेपाल कम्युनिस्ट पार्टीका कार्यकर्ता रामकुमार श्रेष्ठको निधन भएको छ।
सुकेधारामा भएको बम विस्फोटमा परी रामेछाप मन्थली ४ का श्रेष्ठ गम्भीर घाइते भएका थिए। चाबहिलस्थित ओम अस्पतालमा तीन सातादेखि श्रेष्ठको उपचार भइरहेको थियो। राजधानीका दुई घटनामा परी मृत्यु हुनेको संख्या ५ पुगेको छ। महाराजगन्ज प्रहरी वृत्तका डिएसपी फणीन्द्र प्रसाईले श्रेष्ठको मृत्युको पुष्टि गरे।
आइसियुमा उपचाररत श्रेष्ठलाई अक्सिजन दिएर राखिएको थियो। श्रेष्ठसँगै उक्त अस्पतालमा हरि खड्का र सुरेन्द्र महर्जनको उपचार भइरहेको छ। सुकेधाराको विस्फोटमा घाइते भएका सैलुन सञ्चालक छोटे भनिने जीवकुमार ठाकुरको ट्रमा सेन्टरमा उपचार भइरहेको छ।
जेठ १२ मा उपत्यकाका सुकेधारा र घट्टेकुलोमा भएको विस्फोटमा ४ जनाको ज्यान गएको थियो। जेठ १३ मा घोषित बन्दलाई प्रभावकारी बनाउन गरिएको विस्फोटमा सोही पार्टीका कार्यकर्ता कालीकोटका दीपक विक, दाङका गोकुल रानामगर, निरन्तर मल्ल र सिटिइभिटीमा अध्ययनरत प्रज्वल शाहीको मृत्यु भएको थियो।
उपचार खर्च अस्पतालले पाएन
ओम अस्पतालमा उपचाररत तीन जनाको लागि उपचार खर्च तीन सातामा २० लाखभन्दा बढी पुगेको अस्पताले जनाएको छ।
श्रेष्ठका परिवारले १० लाखभन्दा बढी उपचार खर्च लागेको बताएका थिए।
पार्टीले उपचारमा आर्थिक सहयता नगरेको श्रेष्ठ परिवारको गुनासो थियो। अर्कोतर्फ विप्लव नजिकका एक नेताले उपचार खर्च पार्टीले बेहोरेको दाबी गरेका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।