बुटवल- बुटवल उपमहानगरपालिकास्थित एक जामे मस्जिद नजिककी ९५ वर्षीय करिदरुन निशासहित १६ परिवारका सदस्यले अनसन थालेका छन्।
छोरीसँग बस्दै आएकी निशाको घरमा हिजो डोजर चलेपछि उनी पनि अनसनमा आएकी हुन्। बुटवल उपमहानगरपालिकाले प्रहरीको बलमा यहाँका १६ परिवारको घरटहरा भत्काएको थियो। आफूहरु विस्थापित भएपछि अनसनमा बसेको पीडितहरुको भनाइ छ।
२ कठ्ठाभन्दा बढी जग्गामा २०२८ सालदेखि बस्दै आएका १६ परिवारका घरटहरा उपमहानगरले बिहीबार डोजर लगाएर भत्काइदिएपछि उनीहरु घरबारविहीन भएका छन्। उक्त जग्गाबारे अदालतमा मुद्दा विचाराधीन अवस्थामा छ। तुलसीपुर उच्च अदालतमा विचाराधीन मुद्दाको पेशी असार ९ गतेका लागि तोकिएको छ।
'उपमहानगरले ९ गतेसम्म पनि कुर्न नसकी हामीलाई उठीबास लगायो,' ६५ वर्षीय हरिबहादुर विश्वकर्माले भने, 'चुनावका बेला भोट माग्न आउँदा तपाईंहरु सबैलाई लालपुर्जा दिन्छौं भन्ने सरकारले अहिले ४८ वर्षदेखि बसेको ठाउँबाट हटाएर अलपत्र पारेर के गर्न खोजेको हो? अब हामी कहाँ जाने बरु यहीँ अनसन बसेर मर्छौं।’
बर्सात सुरु हुने समयमा आफूहरुलाई घरवारविहीन बनाएर अलपत्र पारेको पीडितहरुको दुखेसो छ। विश्वकर्माले आफूहरुले २०२८ सालदेखि उक्त जग्गा संरक्षण गर्दै बसेको बताए।
उपमहानगरपालिकाले वैकल्पिक व्यवस्था नगरेसम्म उक्त ठाउँ नछाड्ने उनीहरुको भनाइ छ।
उक्त जग्गा तत्कालीन राणा शासकहरुले छाडेपछि उनीहरुले भोगचलन गर्दै आएका थिए। घोडा बाँध्ने तबेलाको रुपमा रहेको उक्त टहरामा ९ परिवार मुस्लिम र ७ परिवार हिन्दु समुदायका मानिस बस्दै आएका थिए।
समाजवादी र राजपाद्वारा विरोध
उपमहानगरपालिकाले बस्तीमा डोजर लगाएर गरिब तथा विपन्न परिवारलाई विस्थापित गराएको भन्दै घटनाप्रति राजपा र समाजवादी पार्टीले औपचारिक रुपमै विरोध जनाएका छन्।
बिहीबारको प्रदेशसभा बैठकमा समेत समाजवादी पार्टीका सांसदले बुटवल उपमहानगरपालिकाले अदालतको अवहेलना गर्दै बस्तीमा डोजर चलाएको भन्दै विस्थापितलाई वैकल्पिक व्यवस्था गर्न सरकारको ध्यानाकर्षण गराएका थिए।
राष्ट्रिय जनता पार्टीकी सांसद कल्पना पाण्डेले समेत उपमहानगरपालिकाको कदमको विरोध गरेकी छन्।
डोजर चलाएर कभर्डहल शिलान्यास
उक्त स्थानमा बुटवल उपमहानगरपालिकाले कभर्ड हल निर्माणका लागि शिलान्यास गरेको छ। कभर्ड हलको बुटवल उपमहानगरपालिकाका प्रमुख शिवराज सुवेदीले शिलान्यास गरेका हुन्।
पहिलो चरणमा काम गर्नका लागि ४८ लाख विनियोजन गरिएको उपमहानगरले जनाएको छ।
वडा नंं १ का अध्यक्ष महेन्द्र लिगलले अख्तियारको निर्देशन अनुसार उक्त जग्गा खाली गराएर उपमहानगरले कभर्ड हल बनाउने योजना अनुसार शिलान्यास गरिएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
