काठमाडौं– काठमाडौंको चावहिलस्थित ओम अस्पतालमा उपचाररत एक महिलाको मृत्युपछि आफन्तले नाराबाजीसहित आक्रमण गरेका छन्। मृतकका आफन्तले अस्पतालमा तोडफोड गर्न सुरु गरेपछि शुक्रबार प्रहरीले हस्तक्षेप गरेको छ।
प्रहरीले अस्पतालमा तोडफोड र नाराबाजी गर्नेमाथि लाठीचार्ज र अश्रुग्याँस प्रहार गरेको हो। प्रहरी र मृतकका आफन्तबीचमा भएको झडपका कारण ४ प्रहरीसहित ५ जना घाइते भएका छन्।
घाइते हुनेमा २ जना डिएसपी रहेको महानगरिय प्रहरी परिसरका डिएसपी होबिन्द्र बोगटीले बताए। उनका अनुसार प्रदर्शनमा मृतकका एक जना आफन्त सामान्य घाइते भएका छन्। घाइतेको सोही अस्पतालमा उपचार भइरहेको छ।
प्रहरीले स्थिती नियन्त्रणमा लिन ४ राउन्ड अश्रुग्याँस प्रहार गरेको जनाएको छ।
अहिले अस्पताल प्रशासन र आफन्तबीच वार्ता भइरहेको छ।
अस्पतालमा बिहीबारदेखि आफन्तले नाराबाजी गर्दै आएका छन्। सिन्धुपाल्चोक इन्द्रावती–१० घर भएकी ५० वर्षीया रामप्यारी थापाको उपचारका क्रममा बिहीबार मृत्यु भएको हो।
थापाको गत शुक्रबार पित्तथैलीको पत्थरीको शल्यक्रिया गरिएको थियो। शल्यक्रियापछि आइसियूमा रहेकी थापाको बिहीबार बिहान ७ बजे मृत्यु भएको हो। चिकित्सकको लापरबाहीका कारण बिरामीको मृत्यु भएको मृतकका आफन्तले बताउँदै आएका छन्।
उता अस्पताल प्रशासनले भने गम्भीर अवस्थामा रहेकी उनको उपचारको क्रममै मृत्यु भएको र यसमा चिकित्सकको लापरबाही नरहेको दाबी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
