काठमाडौं- प्रदेश र प्रतिनिधिसभा निर्वाचनको मतपरिणाम सार्वजनिक भएपछि सरकार गठनका विषयमा दलहरुबीच विवाद कायमै रहेका बेला प्रधानमन्त्री शेरबहादुर देउवाले डाकेको बैठकमा वाम गठबन्धनका शीर्ष नेताहरु बालुवाटार पुगेका छन्।
यसअघि प्रधानमन्त्री देउवाले बोलाउँदा समेत नगएका एमाले अध्यक्ष केपी ओली नमस्कार गर्दै पुगेका थिए। वाम गठबन्धनकै अर्का सहयात्री माओवादी केन्द्रका अध्यक्ष पुष्पकमल दाहाल भने हात हल्लाउँदै बालुवाटार भित्रिए।
वाम गठवन्धनको बहुमत प्राप्त भएको अवस्थामा राष्ट्रपतिसमक्ष पठाएको राष्ट्रियसभा गठन अध्यादेशले यतिबेला दलबीच विवाद निम्त्याएको छ। यसबारे छलफल गर्न प्रधानमन्त्री देउवाले आफ्नै पहलमा पाँच पार्टीका शीर्ष नेताहरु डाकेका हुन्।
बैठकमा एमालेका नेता तथा पूर्व प्रधानमन्त्री माधवकुमार नेपाल तथा पूर्व सभामुख सुभास नेम्वाङ, माओवादीका नेताहरु नारायणकाजी श्रेष्ठ, रामबहादुर थापा, राष्ट्रिय जनता पार्टीका अध्यक्ष मण्डलका संयोजक महन्थ ठाकुर र संघीय समाजवादी फोरमका अध्यक्ष उपेन्द्र यादव लगायत सहभागी छन्।
बैठक राष्ट्रियसभा गठन अध्यादेशमा देखिएको विवाद र नयाँ सरकार गठनमा राजनीतिक सहमति खोज्नमा केन्द्रित हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
