तानसेन- पाल्पाको निस्दी गाउँपालिकामा जङ्गली च्याउको तरकारी पकाएर खाँदा बिरामी परेकामध्ये मृत्यु हुनेको सङ्ख्या ६ पुगेको छ।
गत शुक्रबार च्याउ खाएर शनिबारदेखि ११ जना बिरामी परेका थिए। बान्ता हुने, बेहोस हुने, अत्तालिने गरेपछि उनीहरुलाई उपचारका लागि अस्पताल लगिएको थियो। तिमध्ये आइतबार नै २ जनाको उपचारका क्रममा भरतपुरस्थित कलेज अफ मेडिकल साइन्सेसमा मृत्यु भएको थियो।
विभिन्न अस्पतालमा उपचार गराइरहेका मध्ये शुक्रबारसम्म मृतकको संख्या ६ पुगेको हालसम्म सङ्घीय सांसद दलबहादुर रानाले जानकारी दिए। जङ्गली विषालु च्याउको तरकारी पकाएर खाएकामध्ये निस्दी-३, सार्कीडाँडाकी ९ वर्षीया निर्मलासिंह ठुकरी, ४ वर्षीया विष्णुसिंह ठकुुरी, ७ वर्षीया सुमनसिंह ठकुरी, निशा सिंह ठकुरी, निरुता सिंह ठकुरी र ४५ वर्षीय पुरन खाम्चाको निधन भएको सांसद रानाले बताए।
मृतकमध्ये निर्मलाको मध्यविन्दु अस्पताल नवलपरासी, विष्णुको कलेज मेडिकल साइन्सेस भरतपुर तथा अन्यको काठमाडौंका विभिन्न अस्पतालमा निधन भएको हो। नजिकैको जङ्गलबाट खोजेर ल्याइएको च्याउ पकाएर तरकारी खाएका सार्कीडाँडाका ११ जना बिरामी परेका थिए। बाँकी बिरामीलाई नवलपरासीको मध्यविन्दु अस्पताल, भरतपुरका मनकामना अस्पताल र कलेज अफ मेडिकल साइन्सेस, त्रिभुवन विश्वविद्यालय शिक्षण अस्पताल महाराजगञ्ज काठमाडौंलगायतमा उपचार भइरहेको छ।
बिरामी ८० वर्षीय प्रेमसिंह ठकुरी उपचारपछि घर फिर्ता भएका छन्। अन्य बिरामी ३६ वर्षीया चनकुमारी खाम्चा, उनकी छोरी १५ वर्षीया विमला, ३० वर्षीया दानमायासिंह ठकुरी र धनकुमारी सिंहको सघन उपचार कक्षमा उपचार भइरहेको छ।
पाल्पा सदरमुकाम तानसेनदेखि करीब ७० किमी पूर्व सार्कीडाडाँका ४ परिवारका सदस्य बिरामी परेका हुन्। प्रतिनिधिसभा सदस्य रानाले गृह मन्त्रालयबाट मौखिक निर्णय गराई बिरामीको निःशुल्क स्वास्थ्योपचारको पहल भएको जानकारी दिए। बिरामी तथा ज्यान जानेको परिवारमा सहयोगका विषयमा छलफल तथा बिरामीको स्वास्थ्यावस्था सन्दर्भमा आज कार्यवाहक प्रधानमन्त्री ईश्वर पोखरेलसँग छलफल हुने सांसद रानाले बताए।
आर्थिक अवस्था कमजोर भएका बिरामी परिवारलाई अस्पतालमा भेट्न पुगेका सांसद रानाले मृतकका परिवारलाई उचित राहत प्रदान गर्न र बिरामीको सबै स्वास्थ्योपचार सेवा सरकारबाट व्यहोर्न पहल गरिएको जानकारी दिए। उनले पटक-पटक पाल्पाका विकट भेगमा च्याउ खाएकै कारण ज्यान जाने खतरा यसअघि देखि नै रहँदै आएकोले च्याउ खाँदा सचेत रहन आग्रह गर्दै मृतकप्रति श्रद्धाञ्जलिका साथ सबै बिरामीको स्वास्थ्यलाभको कामना गरे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।