काठमाडौं– प्रहरी महानिरीक्षक (आइजिपी) सर्वेन्द्र खनालले बद्नियतमा सहुलियत नहुने बताएका छन्। शुक्रबार राजधानीको बसुन्धरामा आयोजित ३ नम्बर प्रदेश, गण्डकी प्रदेश र ५ नम्बर प्रदेशका अनुसन्धानकर्ता प्रहरी र अभियोजनकर्ता सरकारी वकिलहरुको दोस्रो प्रादेशिक सम्मलेनमा बोल्दै आइजिपी खनालले सो कुरा बताएका हुन्।
उनले प्रहरी संगठन केही घटनाका कारण बदनाम हुनुपरेको भन्दै कामको सिलसिलमा हुने व्यावहारिक त्रुटिलाई केही छुट हुने भए पनि बद्नियतपूर्वक गरिएका काममा छुट नहुने बताए।
'प्रहरीको कुनै पनि कालखण्डमा त्यस्ता त्रुटिहरु, गैरव्यावसायिक चरित्र कहीँकतै प्रदर्शन भएका छन्। अब त्यो हुनु हुँदैन,’ आइजिपी खनालले प्रष्ट्याउँदै भने, ‘एकाध घटनाले गर्दा सिंगो संगठनको छवि नै धुमिल हुने अवस्था आउनु हुँदैन। तसर्थ मैले भन्ने गरेको छु, हामी प्रहरीमा बसिसकेपछि बद्नियतमा सहुलियत हुँदैन।’
नियत र खोटमा सहुलियत नहुने उनले दाबी गर्दै उलने इन्टेलिजेन्स र इभिडेन्स बेस पुलिसिङमा नेपाल प्रहरी नचुक्ने बताए।
सरकारी कार्यालयमा दलाल सलबलाए
आइजिपी खनालले केही दलालहरु सरकारी कार्यालयहरुमा प्रभाव जमाउन सलबलाएको पनि कार्यक्रममा बताए। ‘नेपाल प्रहरीमा मात्र होइन, सरकारी वकिलदेखि महान्याधिवक्ताको कार्यालय र अन्य सरकारी कार्यालयमा केही दलाल प्रभाव जमाउन सलबलाएका छन्,’ आइजिपी खनालले थपे, ‘यिनीहरुलाई निमिट्यान्न पार्नुपर्छ। नेपाल प्रहरीले आफ्नो तर्फबाट गर्नुपर्ने कामहरु गर्छ।’
स्रोत साधनहरु नहुँदा अपराध अनुसन्धानमा गाह्रो भएको उनको भनाइ थियो। 'एउटा मोटरसाइकल लिएर घटनास्थलमा जानुपर्दा चार घन्टा लागे पनि मोटरसाइकल नहुँदा पैदलै जानुपर्ने समस्या थियो,' उनले भने, 'तर सरकारले एक चौकी एक मोटरसाइकल उपलब्ध गराएकाले बिस्तारै त्यो समस्या हेटेको छ।'
'म आज अलि फरक ठंगले प्रस्तुत हुँदैछु' भन्दै बोल्न थालेका आइजिपी खनालले नेपाल प्रहरीले गरेका कामहरुको बेलिबिस्तार लगाएका थिए। सोही क्रममा साइबर ब्युरोको गठन र नेपाल प्रहरीले मानव बेचबिखनमा गरेको कामले अन्तराष्ट्रिय स्तरमा नेपाल प्रहरीको छवि राम्रो भएको प्रसंग पनि सुनाए।
‘अन्तराष्ट्रिय सभा सम्मलेनमा जाँदा नेपाल चाहिँ मानव बेचविखनको उद्गम स्थल हो भनेर हाम्रा चेलीबेटीहरु प्रति व्यंग्य प्रहार गरिन्थ्यो,’ उनले थपे, ‘तर अहिले त्यस्तो अवस्था हटेको छ। मानव बेचबिखन ब्युरोको स्थापना भएको छ।’
कार्यक्रमका बारेमा थोरै समय खर्चेका आइजिपीले यस्ता गोष्ठीहको प्रभाव राम्रो हुने बताए। धेरै मुद्दामा नेपाल प्रहरीले सफलता पाउनुको कारण नै यस्ता गोष्ठीहरु भएको उनको भनाइ थियो।
त्यस्तै नयाँ फौजदारी र देवानी संहिता आएपछि कसरी लागू गर्ने भन्ने चुनौतीका बीच आफूहरु सफल भएको उनले बताए। यो कार्यान्वयनमा ल्याउनु राष्ट्रिय अन्तराष्ट्रिय परिवेशमै नमुना भएको आइजिपीको दाबी थियो।
'सरकारी मुद्दामा ७२ प्रतिशत सफलता'
कार्यक्रमका प्रमुख अतिथि महान्याधिवक्ता अग्नि खरेलले सरकारी मुद्दाको सफलताको प्रतिशत ७२ दशमलव २८ पुगेको र यो अहिलेसम्मकै बढी सफल भएको बताए। यति हुँदाहुँदै पनि अपराध अनुसन्धान र अभियोजनालाई वैज्ञानिक र वस्तुगत प्रमाणमा आधारित बनाउन अझै जोड दिनुपर्ने उनले औंल्याए।
सरकारी वकिल र अनुसन्धानकर्ता प्रहरीबीच भएका केही कमीकमजोरी पनि उलने औंल्याए। कानुनले बाटो दिँदादिँदै पनि सामान्य प्रकृतिका जरिवाना मात्रै हुने कसुरको अनुसन्धानमा प्रतिवादीलाई धरौटी वा तारेख वा जमानतमा राख्ने व्यवस्था हुँदैहुँदै पनि थुनामा राख्ने प्रचलन देखिएको उनले बताए। सामान्य तारेखमा रिहा हुने व्यक्तिलाई थुनामा राखेर अनुस्नधान गर्न नहुनेतर्फ पनि उनले पटक पटक सचेत गराए।
कार्यक्रमका अर्का अतिथि गृहसचिव प्रेमकुमार राईले अनुसन्धानकर्ता प्रहरी र अभियोजनकर्ता सरकारी वकिलबीच तालमेल मिल्नुपर्ने बताए। प्रहरीले गरेका कतिपय अनुसन्धान सरकारी वकिलको कार्यालयमा पुगेपछि सफलता नभएको अवस्था आएकाले त्यस बिषयमा छलफल हुन जरुरी रहेको गृहसचिव राईले बताए।
गृहसचिव राईले मेडिकल लिगल, प्रहरी र सरकारी वकिलको त्रिपक्षीय पाटोलाई अपराध अनुसन्धानमा समेट्नुपर्नेमा जोड दिए।
आज सुरु भएको दुईदिने कार्यक्रम भोलि शनिबार सम्पन्न हुनेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।