काठमाडौं– जिल्ला अदालत ललितपुरका नायव सुब्बा श्याम अर्याल २०७३ पुस २६ गते अख्तियार दुरुपयोग अनुसन्धान आयोगको 'स्टिङ अपरेसनमा' परे। अख्तियारले अदालतका कर्मचारीलाई यसरी घुससहित पक्राउ गरेको यो नै पहिलो घटना थियो।
घुस लिँदाँलिँदै रंगेहात पक्राउ गरेर अर्याललाई अनुसन्धानका लागि टंगालमा राखियो। सातदोबाटोस्थित सेल्सवरी डिपार्टमेन्ट स्टोरको माथि रहेको बाजेको सेकुवामा ज्यान मुद्दामा सफाइ पाएका एक व्यक्तिलाई फसाइदिने धम्की दिएर उनले तीन लाख रकम घुस लिएका थिए। तर, तिनै घुस लिएका व्यक्तिलाई छाड्न पत्र बोकेर अदालतका कर्मचारी आएपछि अख्तियारले उनलाई मुद्दा दायर नगरी छोडिदिएको थियो।
अर्यालको केसमा सर्वोच्च अदालतले न्याय परिषदबाटै अदालतका कार्मचारीलाई कारबाही गर्ने जनाउँदै अख्तियारलाई पत्र पठाएको थियो। जसका कारण अख्तियार अर्याललाई कारबाही नगरी पछि हट्नुपर्यो।
---
सवारी ज्यान मुद्दा मिलाइदिने भन्दै जिल्ला अदालतकी कर्मचारी शान्तिदेवी अधिकारी सोमबार पक्राउ परिन्। नाबालकको सवारी ज्यान मुद्दा मिलाइदिने भन्दै जिल्ला अदालतकी बाल मनोविज्ञ अधिकारीलाई आयोगको बुटवल कार्यालयले १० हजार घुससहित पक्राउ गरेको थियो। अधिकारी यसअघि प्राध्यापन पेसामा आबद्ध थिइन्।
अदालतमा विचाराधीन मुद्दामा सहजीकरण गरिदिने भन्दै घुसबापतको तीन लाख रुपैयाँ लिइरहेको अवस्थामा नायब सुब्बा कृष्णकुमार पाठकलाई अख्तियारले बैसाख २२ गते पक्राउ गरेको थियो। आयोगको बुटवल, सम्पर्क कार्यालय नेपालगन्जको टोलीले घुस बुझिसकेको अवस्थामा श्री लयर्स च्याम्बरबाट उनलाई समातेको हो।
---
जिल्ला अदालत काठमाडौंमा कार्यरत डिठ्ठा (खरिदार) विदुर पोख्रेल १० हजार घुस रकमसहित २०७५ पुस १६ गते पक्राउ परे। पोख्रेलले डोर खटी बण्डा मुचुल्का बनाउनका लागि सेवाग्राहीसँग विभिन्न बहानामा घुस मागिरहेको सूचनाका आधारमा अख्तियार टोलीले सोह्रखुट्टेको एक रेस्टुरेन्टबाट पक्राउ गरेको थियो।
---
जिल्ला अदालत काभ्रेका नायब सुब्बा राजेन्द्र खत्री सेवाग्राहीसँग १ लाख २५ हजार रुपैयाँ घुस लिँदै गर्दा असोज २२ गते पक्राउ परे। गाडी दुर्घटनामा भएको अंगभंग मुद्दा मिलाइदिने भन्दै सेवाग्राहीसँग घुस लिइरहेका बेला अख्तियार टोलीले उनलाई धुलिखेल बसपार्कबाट पक्राउ गरेको थियो।
२०७५ माघ १७ गते जिल्ला अदालत काठमाडौंका नायब सुब्बा भोलानाथ चालिसे ५ लाख नगद घुससहित पक्राउ परे। चालिसेलाई जिल्ला अदालत नजिकैको वन परिसरबाट घुस रकम लिइसकेको अवस्थामा पक्राउ गरिएको थियो। सवारी ज्यान मुद्दामा सजाय कम गरिदिने भन्दै चालिसेले आरोपीबाट ५ लाख रुपैयाँ घुस मागेका थिए।
सरकारी कर्मचारीले घुस माग गरेपछि आरोपीले उक्त कुराको जानकारी अख्तियारमा गराएका थिए।
घुस माग गरेको भन्ने उजुरी आएपछि अख्तियारको टोलीले ५ लाख रुपैयाँको फोटोकपी गरेर उनीमाथि निगरानी गरेको थियो। भीमबहादुर श्रीश मगरको जाहेरीमा गएको कात्तिक १४ गते जिल्ला अदालत काठमाडौंमा सुरेन्द्र थापामाथि ज्यान मुद्दा दर्ता भएको थियो। सोही सवारी ज्यान मुद्दामा बिहीबार फैसला हुँदै थियो। तर, सेटिङमै फैसला गर्ने भन्दै आरोपी सुरेन्द्र थापासँग चालिसेले घुस रकम माग गरेका थिए।
न्यायाधीश बाबुकाजी बानियाँको नाममा उनले रकम लिएका थिए। उनले अख्तियारको बयानमा पनि न्यायाधीशको नाम लिएका छन्।
---
अख्तियारको यस्तो अपरेसनमा अदालतका कर्मचारीसमेत फस्न थालेका छन्। अदालतका कर्मचारीहरु न्यायाधीशको नाम लिएर समेत घुस लिँदै गरेको अवस्थामा अख्तियारको अपरेसनमा परेका छन् भने एक कर्मचारीले त घुसको रकम नै गायब पारेका थिए।
मुद्दा मिलाउन वकिलको ल फर्मबाट पक्राउ परेका उच्च अदालत तुल्सीपुरको नेपालगन्ज इजलासका टाइपिस्ट नायब सुब्बा पदमा कार्यरत कुष्णकुमार पाठक ३ लाख घुस रकम नै गायब बनाएका थिए। अख्तियार टोलीले गत बैसाख २१ गते उनलाई पक्राउ गर्दा सेवाग्राहीबाट लिएको उक्त रकम साथमा थिएन। पछि अनुसन्धान गर्दा पाठकले उक्त रकम आफ्ना छोरालाई दिएर फरार गराएको रहस्य खुलेको थियो।
घुस लिने कर्मचारीलाई मुद्दा चलाउन अख्तियारले सेवाग्राहीलाई घुस रकम दिँदै आएको छ। सो घुस रकम सेवाग्राहीले घुस लिने कर्मचारीलाई बुझाउने गरेका छन्। यसका लागि नोटको फोटोकपी गरी अख्तियारले रेकर्ड राख्ने गर्छ। यसरी घुस लिने कर्मचारीलाई उजुरीकर्ताको सहयोगमा रकम दिएर गरिने कारबाहीलाई 'स्टिङ अपरेसन' भन्ने गरिएको छ।
'स्टिङ अपरेसन'मार्फत पक्राउ परेका व्यक्तिलाई अख्तियारले विशेष अदालतमा मुद्दा दायर गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
