बुटवल- संघीय सरकारले सांसद विकास कोषका लागि ६ करोड रुपैया दिने निर्णयको आलोचना भईरहेका बेला सत्ताधारी नेपाल कम्युनिष्ट पार्टी (नेकपा) प्रदेश ५ संसदीय दलले भने संसद विकास कोषको व्यवस्था नगर्न सरकारसमक्ष माग गरेको छ।
नेकपा संसदीय दल प्रदेश ५ ले शनिबार बुटवलमा पत्रकार संसद अन्तरक्रिया कार्यक्रमको आयोजना गर्दै संसद विकास कोषका नाममा कुनै पनि बजेट विनियोजन नगर्न सरकारसंग माग गरेको हो।
संसदीय दलका नेकपा संसदीय दलका उपनेता तथा कानुनमन्त्री कुलप्रसाद केसीले संसद विकास कोषका नाममा कुनै पनि सांसद्लाई बजेट दिने काम नगर्न सरकारलाई आग्रह गर्ने निर्णय गरिएको जानकारी दिए।
उनले संसद विकास कोषका विषयमा आईसब्रेक गर्नु पर्ने धारणा अनुरुप ब्रेक गर्न खोजिएको बताए। उनले आफ्नो दलले सांसद विकास कोष तथा क्षेत्र विकास कोष राख्न नुहने निर्णय गरेर आइस ब्रेक गर्ने दिशामा अघि बढेको दाबी गरे।
'विगतमा स्थानीय तहमा जनप्रतिनिधि नभएका कारण सांसदको भुमिका कानुन निर्माणका साथै बिकास निर्माणका लागि पनि बजेट लैजानु पर्ने थियो,' मन्त्री केसीले भने, 'अब तीन तहका सरकार सक्रिय भएकाले अब संघ, प्रदेश र स्थानिय तहले काम गर्नु पर्दछ।'
उनले स्थानीय तहलाई बलियो बनाउन संसद विकास कोषको नाममा बजेट नछुट्टाउन सरकारलाई आग्रह गरिएको बताए। उनले सबै पालिकाले विकासको बारेमा रोड म्याप तयार पारेर योजनाबद्ध काम गर्नु पर्नेमा जोड दिए।
विगतमा संसद विकास कोषको रकम दुरुपयोग भएको भन्दै व्यापक आलोचना भएको थियो।
नेकपा संसदीय दलले निर्णय गरेर संसद विकास कोषको व्यवस्था नगर्न सरकारलाई आग्रह गरेपछि प्रदेश ५ मा संसद विकास कोषमा नाममा बजेट बिनियोजन नहुने प्रष्ट भएको छ। प्रदेश ५ मा नेकपाको नेतृत्वमा दुई तिहाईको सरकार छ।
तर, यसअघि प्रदेश ५ मा सत्तारुढसहित अधिकांश सांसदहरुले कम्तीमा ३ करोड रकम सांसदलाई दिनुपर्ने माग गर्दै आएका थिए।
सांसदलाई रकम दिने कुरा संघीयता विरोधी हुने भन्दै त्यस्तो व्यवस्था रोक्न नेकपाले सरकारलाई आग्रह गरेको बताएको छ।
नेकपाका प्रमुख सचेतक भूमिश्वर ढकालले जनताले अनुभुति गर्ने गरी विकास निर्माणका कामलाई अगाडि बढाउन संसद बिकास कोषको व्यवस्था रोक्न सरकारलाई आग्रह गरिएको बताए। उनले संसद विकास कोषका योजना टुक्रे र बजेट मात्र छिरोलिने खालका भएकाले उक्त व्यवस्था संघीयता विरोधी रहेकाले रोक्न माग गरिएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
