काठमाडौं– आइसिसी क्रिकेट विश्वकप २०१९ को सुरुवाती दुई खेलमा पराजित भएको दक्षिण अफ्रिकाले बुधबार आफ्नो तेस्रो खेल खेल्दैछ। साउथह्याम्टनमा हुने तेस्रो खेल दक्षिण अफ्रिकाका लागि सहज छैन। किनकी दक्षिण अफ्रिकाले बलियो र 'फ्रेस' टिम भारतसँग खेल्दैछ।
विश्वकप २०१९– खेल ८
भारत भर्सेस दक्षिण अफ्रिका
हाम्पसीर बोल, साउथह्याम्टन
बुधबार, जेठ २२, दिउँसो सवा ३ बजे
दक्षिण अफ्रिका जारी विश्वकपमा कठीन अवस्थामा छ। खेलेका दुवै खेलमा पराजित भएको दक्षिण अफ्रिका लागि तेस्रो खेलमा विश्व नम्बर २ भारतसँग खेल्नु चुनौतपूर्ण छ। अझ भारतलाई विश्वकपको दाबेदार मानिएको छ। दक्षिण अफ्रिकाले इंग्ल्यान्ड र बंगलादेश दुवैसँग ३ सय भन्दा बढी रन बेहोर्यो। इंग्ल्यान्डविरुद्ध कमजोर ब्याटिङ गरेको दक्षिण अफ्रिकाले बंगलादेशसँग ब्याटिङमा सुधार ल्याएको थियो। तर पनि टिम खेल देखाउन नसक्दा हार बेहोर्यो। अब दक्षिण अफ्रिकालाई बलियो भारतसँग खेल्दा धेरै मिहिनेत गर्नु पर्नेछ।
भारतीय टिमले वार्मअप खेलपछि एक साता आराम गरिसकेको छ। यस्तो अवस्थामा भारतले दुई खेल हारेको अफ्रिकासँग खेल्दा स्वभाविक खेल देखाउने विश्वास गर्न सकिन्छ। भारतको चिन्ता भनेको वार्मअप खेलमा ओपनिङ जम्न नसक्नु हो। चौथो नम्बरमा कसले ब्याटिङ गर्ने भन्ने पनि छलफलको विषय छ। भारतको बलिङ युनिट बलियो छ। तीव्र गतिका जसप्रित बुमराह करिअरकै उच्च फर्ममा छन्। स्पिनरद्वय युजभेन्द्र चाहाल र कुलदीप यादवले चाहिएको बेला ठूला खेलाडीलाई पेभिलियन फर्काउन क्षमता राख्नछन्।
मुख्य खेलाडी
महेन्द्रसिंह धोनी (भारत)
धोनीले वार्म खेलमा आफ्नो अनुभव देखाएका थिए। तल्लो अर्डरमा धोनी हुनु भारतको ब्याटिङको सबैभन्दा सुन्दर पक्ष हो। उनले बंगलादेशविरुद्ध उत्कृष्ट खेल देखाएका थिए। धोनी ठूला खेलमा आफ्नो अनुभव देखाउन सक्ने खेलाडी हुन्। फर्ममा रहेका उनी विकेटकिपिङमा चुस्त छन्। टिमका कप्तान विराट कोहलीलाई सहि सुझाव दिन सक्ने धोनी भारतीय टिमको नेतृत्वकर्ता भन्दा पनि फरक पर्दैन।
कागिसो राबाडा (दक्षिण अफ्रिका)
कागिसो राबाडा भर्खर चोटबाट मैदान फर्किएका छन्। उनी फर्के लगत्तै अर्का बलर लुङ्गी एनगिडी चोटग्रस्त बनेका छन्। डेल स्टेन पनि मैदान फर्कन संघर्षरत छन्। जसले गर्दा राबाडामाथि दक्षिण अफ्रिकाको भरोसा छ।
पिच कन्डिसन
साउथह्याम्टनमा बुधबार बादल लाग्ने पूर्वानुमान गरिएको छ। हल्का पानी पर्ने सम्भावना पनि छ। यहाँको पीच ब्याटिङका लागि राम्रो मानिएको छ। पछिल्लो पटक इंग्ल्यान्ड र पाकिस्तानबीच एकदिवसीय खेल भएको थियो। सो खेलको दुवै इनिङमा गरी ७३४ रन बनेको थियो।
टिम भारत
विराट कोहली (कप्तान), जसप्रित बुमराह, युजभेन्द्र चाहल, शिखर धवन, महेन्द्रसिंह धोनी (विकेटकिपर), रवीन्द्र जडेजा, केदार जादव, दिनेश कार्तिक, भुवनेश्वर कुमार, हार्दिक पाण्ड्या, लोकेश राहुल, मोहमद सामी, विजय शंकर, रोहित शर्मा, कुलदिप यादव
टिम दक्षिण अफ्रिका
फाप डु प्लेसिस (कप्तान), एडिन मार्क्रम, क्वान्टन डेक कक (विकेटकिपर), हासिम अम्ला, रासी भान डेर डुसन, डेभिड मिल्लर, क्रिस मोरिस, एन्डिल फुह्लुक्वायो, जेपी डुमिनी, ड्वायन प्रेटोरियस, डेल स्टेन, कागिसो राबाडा, लुङ्गी एनगिडी, इमरान ताहिर, ताब्राइज साम्सी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
