नेपालगञ्ज– राप्ती नदीको कटान र डुबानको उच्च जोखिममा रहेको होलियाका विजय यादव बाँकेको क्षेत्र नम्बर २ ‘क’ बाट प्रदेशसभा सदस्यमा विजयी भएका छन्।
०४६ सालदेखि नेपाली कांग्रेसबाट राजनीति सुरु गरेका यादव कांग्रेसको बुथ समितिको सचिव, जिल्ला कार्यसमितिको सदस्य, जिल्ला सचिवसम्मको जिम्मेवारीमा पुगेका थिए। यादवले ०५४ सालको स्थानीय निकायको निर्वाचनमा तत्कालीन होलिया गाविसको अध्यक्षमा उम्मेदवारी दिएका थिए। तर, मनोनयनपत्र दर्ता गराउने बेला समर्थक र प्रस्तावक एउटै व्यक्ति परेकाले उनको उम्मेदवारी खारेज भयो।
आफ्नो उम्मेवारी खारेज हुन सक्ने डरले उनले आफ्नी श्रीमतीको पनि स्वतन्त्रबाट उम्मेदवारी दर्ता गराएका थिए। श्रीमतीको उम्मेदवारी भने सदर भयो। विजयले आफैं प्रचार गरेर श्रीमती सरोजकुमारीलाई चुनाव जिताए।
त्यतिबेला मधेसका यादव समुदायका महिलाहरुमा कपडाले मुख छोप्ने र परिवारका सदस्य र छिमेकीबाहेक बाहिरका मानिससँग कुरै नगर्ने चलन थियो। धेरैजसो महिला त कोही अपरिचित मान्छे आउनासाथ घरभित्र पस्थे।
गाउँघरमा आफ्नो समुदायभित्र त्यस्तो स्थिति भए पनि सरोजकुमारी गाविस अध्यक्षमा निर्वाचित भएकी थिइन्। श्रीमती अध्यक्ष भए पनि गाविस अध्यक्षले गर्नुपर्ने सबै काम उनले नै गरे। अत्यावश्यक हस्ताक्षर भने सरोजकुमारीले गर्थिन्। गाउँमा सबैले विजयलाई नै प्रधान (अध्यक्ष) भन्थे।
भारतको बिहारमा राबडीदेवी मुख्यमन्त्री भए पनि सबै काम उनका श्रीमान् लालुले गरेजस्तै श्रीमती सरोजकुमारीको प्रशासनिक काम विजयले गर्थे। त्यसैले उतिबेला नेपालका लालु र राबडीदेवी भनेर उनीहरुको निकै चर्चा भएको थियो।
विजय कांग्रेसका तत्कालीन सभापति सुशील कोइरालाका विश्वासपात्र थिए। सुशीलको निधनपछि उनी बाँके कांग्रेसको चर्काे गुटबन्दीको सिकार मात्र भएनन्, पार्टी नै छाड्न बाध्य भए। २८ वर्षसम्म पसिना बगाएको पार्टीलाई त्यागेर ४६ वर्षीय यादव स्थानीय तहको निर्वाचन हुनुभन्दा २ हप्ताअघि संघीय समाजवादी फोरममा प्रवेश गरेका थिए।
फोरम प्रवेश गरेसँगै यादवले डुडुवा गाउँपालिकाको प्रमुख पदमा टिकट पाए। तर, उनी नेपाली कांग्रेसका नरेन्द्र चौधरीसँग ४ सय ९९ सय मतले पराजित भए। गाउँपालिका प्रमुखमा हारेका यादवले पाँच महिनापछि भएको निर्वाचनमा डुडुवा गाउँपालिकासहित नेपालगञ्ज उपमहानगरपालिकाका केही वडा समेत समावेश भएको प्रदेशसभा ‘क’ मा टिकट पाए। सरोजकुमारीले पनि पति विजयलाई चुनाव जिताउन निकै मिहिनेत गरिन्।
यादवले प्रदेशसभामा कांग्रेसका निरञ्जनसिंह सिजापतिलाई फराकिलो मतान्तरले हराउँदै विजय हात पारे। प्रदेशसभा सदस्यमा जितेसँगै ०५४ सालदेखिको जनप्रतिनिधि हुने उनको चाहना पूरा भएको छ।
उनी भन्छन्, ‘बल्ल जनताको साथ र जिम्मेवारी पाएको छु। होलिया लगायत यस क्षेत्रलाई राप्ती नदीको डुबान र कटानबाट सुरक्षित पार्न हरसम्भव प्रयास गर्नेछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
