धनगढी- नगर क्षेत्रभित्र घर तथा अन्य संरचना निर्माण गर्दा नगरपालिकाबाट अनिवार्य रुपमा स्विकृति लिनुपर्छ। तर, यहाँका कतिपय सरकारी पक्षले यस्तो प्रावधान उल्लंघन गरी भवन निर्माण गरिरहेका छन्।
सुदूरपश्चिमको प्रदेशसभा सचिवालयले नक्सा पास नगरी धमाधम भवन निर्माण गरिरहेको पाइएको हो। प्रदेशसभाको नौकोठे भवन अहिले निर्माणाधीन अवस्थामा छ भने चमेना गृहको भवन बनिसकेको छ।
धनगढी उपमहानगरपालिकाका इन्जिनियर द्विजराज भट्टले प्रदेशसभा सचिवालयले बनाउन लागेको भवनको नक्सा पास नगरिएको पुष्टि गरे। प्रदेशसभा सचिवालयले मापदण्ड मात्रै माग गरेको तर, नक्सा पासका लागि प्रक्रिया नै सुरु नगरेको उनको भनाइ छ। ‘हामीसँग मापदण्ड माग गरिएको थियो,’ उनले भने, ‘भवन निर्माणको मापदण्ड पठाइदियौं, सोहीअनुसार बनाउन लागेका होलान्। तर, नक्सा पास भएको छैन।'
प्रदेशका तीन वटा संसदीय दलको कार्यालय तथा प्रदेशसभा समितिको कार्यालयका लागि नयाँ भवन निर्माणाधीन अवस्थामा छ। प्रदेशसभाले यही आर्थिक वर्षमा सम्पन्न गर्ने गरी सो भवनको ठेक्का बेहडाबाबा निर्माण सेवालाई दिएको छ। ७२ लाख रकम विनियोजन गरे पनि ५४ लाख ३५ हजार एक सय ८ रुपैयाँ ७० पैसामा सो निर्माण सेवाले ठेक्का पाएको थियो।
सचिवालयले अस्थायी रुपमा निर्माण गर्न लागेको सो भवनको जग हाल्ने काम बैसाखदेखि सुरु भएको छ।
प्रदेशसभाका कानुन उपसचिव तेजप्रकाश जोशीले भने, ‘भवनको काम यही वर्ष सम्पन्न हुनुपर्ने हो। तर, समयमै काम नभए पुनः म्याद थप गरी काम अघि बढाउँछौं।'
निर्माणाधीन भवनको पूर्वतिर पार्कमोड सडक १४ मिटरको बनाइँदैछ। सो सडक अहिले १० मिटर कायम छ। इन्जिनियर भट्टले सडक विस्तारलाई पनि ख्याल गर्दै प्रदेशसभा सचिवालयलाई भवन निर्माणको मापदण्ड दिइएको बताए। उनले यसअघि प्रदेशसभा सचिवालयले निर्माण गरेको चमेना गृहबारे पनि कुनै जानकारी नआएको प्रतिक्रिया दिए।
प्रदेशसभा मात्र नभई प्रदेशका अधिकांश मन्त्रालयहरुले भवन तथा अन्य संरचना निर्माण गरिरहेका छन्। तर, धनगढी उपमहानगरपालिकामा नक्सा पासका लागि कुनै पनि मन्त्रालयबाट स्विकृति नलिइएको इन्जिनियर भट्टको भनाइ छ। ‘उद्योग, पर्यटन, वन तथा वातावरण मन्त्रालयले भवन निर्माण गर्न लागेको देखेपछि भवन आचारसंहिता र सडक मापदण्ड अनुसार निर्माण गर्न अनुरोध सहितको पत्र पठाएका थिण,' उनले भने, 'अन्य मन्त्रालयले के गरिरहेका छन्, थाहा छैन।’
मन्त्रालयहरुले के कसरी भवन निर्माण गरिरहेका छन् भन्नेबारे उपमहानगरपालिकालाई जानकारी नभएको इन्जिनियर भट्ट बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
