काठमाडौं– नेपाल कम्युनिस्ट पार्टी (नेकपा) का सचिवालय सदस्य वामदेव गौतमले संसदमा दर्ता भएको मिडिया काउन्सिल सम्बन्धी विधेयकप्रति ध्यानाकर्षण भएको बताएका छन्।
बिहीबार एक प्रेस विज्ञप्ति जारी गर्दै गौतमले विधेयक सच्याएर मात्र पारित गर्न आग्रह गरेका छन्। 'उक्त विधेयकका केही प्रावधान नेपालको संविधानको अक्षर र भावनाअनुरुप बनाउनुपर्ने आवश्यकता मैले देखेको छु। सरकार, राजनीतिक पार्टी र प्रेस सबै मर्यादित र अनुशासित हुनुपर्दछ भन्ने विचारसँग म पूर्ण सहमत छु', उनले भनेका छन्, 'तर, समाचार लेखेकै आधारमा पत्रकारलाई दश–दश लाख रुपैयाँसम्म जरिवाना गर्नेजस्ता कठोर प्रावधान उचित लाग्दैन।'
उनले समय-समयमा पेसाको मर्यादा र भावना कुल्चिएर गरिने पत्रकारिता (पीत पत्रकारिता) बाट आफू पनि सिकार हुँदै आएको दाबी गरेका छन्।
'स्वतन्त्र प्रेस र व्यावसायिक पत्रकारिता लोकतन्त्रका खम्बा हुन्। बोल्न नसक्नेहरुका प्रतिनिधि तथा समाजका पहरेदार र ऐना पनि स्वतन्त्र पत्रकार हुन्। त्यसैले प्रेसलाई चौथो अंगको रुपमा स्वीकार गरिएको पनि हो। प्रेस, व्यवसायिक पत्रकार र सञ्चारकर्मीहरुलाई स्वतन्त्र, निष्पक्ष, निर्भिक एवं सुरक्षित वातावरणमा काम गर्ने अवस्था राज्यले निर्माण गर्नुपर्दछ', उनले स्मरण गराएका छन्।
उनले अहिलेकै अवस्थामा अघि नबढाउन सरकार, सम्बन्धित सरकारी निकाय लगायत सम्बन्धित सबैमा आग्रह गरेका छन्।
उक्त विधेयक हाल राष्ट्रियसभामा दर्ता भएपछि नेपाल पत्रकार महासंघ आन्दोलित छ भने सञ्चार सम्बद्ध संस्था र सरोकारवालाले पनि यो विधेयकको विरोध गर्दै आएका छन्।
विधेयकको दफा १८ मा भनिएको छ- ‘काउन्सिलबाट जारी भएको आचार संहिताविपरीत कुनै सामग्री प्रकाशन वा प्रसारण गरेको कारण मर्यादा वा प्रतिष्ठामा आँच पुर्याएको भनी सम्बन्धित व्यक्तिले दफा १६ बमोजिम दिएको उजुरी उपर दफा १७ बमोजिम गर्दा कसैको मर्यादा वा प्रतिष्ठानमा आँच पुर्याएको देखिएमा काउन्सिलले सम्बन्धित आमसञ्चार माध्यम, प्रकाशक, सम्पादक, पत्रकार वा संवाददातालई पच्चीस हजार रुपैयाँदेखि दश लाख रुपैयाँसम्म जरिवाना गर्न सक्नेछ।’
सम्बन्धित समाचार
संसदमा दर्ता भएका ३ विधेयकमा कांग्रेसको आपत्ति, सरकार निरंकुशताको बाटोमा अघि बढेको आरोप
आमसञ्चार विधेयक अझै कडा, जरिवाना मात्रै एक करोडसम्म
प्रेसलाई अंकुश लगाउने कानुन ल्याउन लागिएको विरोधमा पत्रकार महासंघ आजदेखि आन्दोलनमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
