फाइल तस्बिर।
काठमाडौं- दक्षिणपूर्वी एसियाली राष्ट्रहरु भियतनाम र कम्बोडियाको साताव्यापी भ्रमण सकाएर प्रधानमन्त्री केपी शर्मा ओली आज स्वदेश फर्किँदैछन्। बैसाख २६ गते जम्बाे टाेलीसहित प्रधानमन्त्री ओली भियतनामका लागि प्रस्थान गरेका थिए।
प्रधानमन्त्री ओलीसहितकाे टाेली आज साँझ काठमाडाैं आइपुग्ने बताइएकाे छ।
५ दिन भियतनाममा रहेका प्रधानमन्त्री ओलीले त्यहाँ रहँदा भियतनामका प्रधानमन्त्री न्गुएन जुवान फुकबीच हनोइस्थित प्रधानमन्त्रीको कार्यालयमा भेटवार्ता गरेका थिए।
उनीहरुबीच समसामयिक राजनीतिक अवस्था तथा विकास र समृद्धिका विविध आयामबारे छलफल भएको थियो। द्विपक्षीय विषय र चासो तथा क्षेत्रीयस्तरका विषयमा पनि उनीहरुबीच छलफल भएको थियाे।
आगामी वर्ष २०२० मा हुने 'नेपाल भ्रमण वर्ष'मा नेपालले बैसाख दिवस आयोजना गर्ने जानकारी दिँदै प्रधानमन्त्री ओलीले ‘लुम्बिनी परियोजना निर्माण गरौं’ भन्ने कार्यक्रममा हातेमालो गर्न भियतनामसँग आग्रह गरेका थिए। प्रधानमन्त्री ओलीले भियतनामी प्रधानमन्त्रीलाई अनुकूल समयमा नेपाल भ्रमणकाे समेत निम्तो दिएकाे थिए।
दुई प्रधानमन्त्रीसहित बसेकाे प्रतिनिधिमण्डलस्तरीय बैठकमा कूटनीतिक र सरकारी राहदानीबाहकलाई प्रवेशाज्ञा छुट दिने सम्झौता, दुई सरकारबीचको द्विपक्षीय परामर्श संयन्त्र स्थापनासम्बन्धी समझदारीपत्र र व्यापार एवं लगानी ढाँचा सहमतिको आशयपत्रबारे सम्झाैता भएकाे थियाे।
कूटनीतिक तथा सरकारी राहदानी बाहकलाई प्रवेशाज्ञा छुटसम्बन्धी सहमति र दुई सरकारबीच द्विपक्षीय परामर्श संयन्त्र निर्माण गर्ने सम्झौतामा नेपालका तर्फबाट परराष्ट्र सचिव शङ्करदास वैरागी र भियतनामका तर्फबाट त्यहाँका विदेश मामिला मन्त्रालयका प्रतिनिधि न्गुएन कोक दुङले हस्ताक्षर गरेका थिए।
त्यसैगरी व्यापार तथा लगानी ढाँचासम्बन्धी सम्झौताको आशयपत्रमा उद्योग, वाणिज्य तथा आपूर्ति मन्त्रालयका सचिव केदारबहादुर अधिकारी र भियतनामका तर्फबाट त्यहाँको उद्योग मन्त्रालयका उपमन्त्री दाङ आओङ एनले हस्ताक्षर गरेका थिए।
भियतनाममा रहँदा प्रधानमन्त्री ओलीले भियतनामको राष्ट्रियसभाका अध्यक्ष न्गुऐन थि किम नागनबीच भेटघाट गर्नुका साथै भियतनामका पूर्व राष्ट्रपति तथा पूर्व प्रधानमन्त्री होची मिन्ह हाउसको अवलोकन गरेका थिए। बैसाख दिवसका अवसरमा भियतनामले त्यहाँको हा नाम प्रान्तमा आइतबार आयोजना गरेको अन्तर्राष्ट्रिय सम्मेलनमा प्रधानमन्त्री ओलीले सम्बाेधन गर्दै बुद्धको जन्मस्थल लुम्बिनीकाे जीवनमा एक पटक भ्रमण गर्नुपर्नेमा जोड दिएका थिए।
भियतनामकाे ५ दिनकाे भ्रमणपछि प्रधानमन्त्री ओली सोमबार मध्याह्न कम्बोडियाको राजधानी फेनोम पुगेका थिए। प्रधानमन्त्री ओलीले आफ्ना समकक्षी हुन सेनसँग द्विपक्षीय वार्ता गरेका थिए।
प्रधानमन्त्रीले वार्ताअघि कम्बोडियाका स्वर्गीय राजा नोरोडोम सिहनौकसहित २ वटा स्मारकमा पुष्पगुच्छा अर्पण गरेका थिए।
नेपालको परराष्ट्र मन्त्रालयका अनुसार कम्बाेडियासँग सोमबार ४ वटा सम्झौता भएका छन्। त्यहाँको पिस प्यालेसमा दुई देशका प्रधानमन्त्रीबीच भएको द्विपक्षीय भेटवार्तापछि कूटनीतिज्ञ र सरकारी राहदानी बाहकलाई प्रवेशाज्ञाबिनै भ्रमण गर्न दिने सम्झौता भएको छ। त्यस्तै कम्बोडियाले नेपालमा दूतावास खोल्ने समझदारीसमेत भएको छ।
व्यापार सम्बन्धी २ सम्झौतासमेत भएकाे बताइएकाे छ। नेपाल र क्याम्बोडियाबीच व्यापार र लगानी सम्बन्धी समझदारीमा हस्ताक्षर भएको हो। त्यसैगरी २ देशका चेम्बर अफ कमर्सबीच सहकार्य गर्नेबारे समझदारीपत्रमा हस्ताक्षर भएको छ।
प्रधानमन्त्री ओलीले मंगलबार दिनभर त्यहाँस्थित उच्चपदस्थ अधिकारीहरुसँग भेटवार्ता गरेका थिए भने केही कार्यक्रममा समेत सहभागी भएका थिए। परराष्ट्र मन्त्रालयका अनुसार प्रधानमन्त्री ओलीले त्यहाँको एउटा व्यापारिक सम्मेलनलाई सम्बोधन गरेका थिए।
प्रधानमन्त्री ओलीकाे भ्रमण टाेलीमा पत्नी राधिका शाक्य, नेपालका तर्फबाट परराष्ट्रमन्त्री प्रदीपकुमार ज्ञवाली, प्रधानमन्त्रीका मुख्य सल्लाहकार विष्णुप्रसाद रिमाल, परराष्ट्र सल्लाहकार डा राजन भट्टराई, परराष्ट्र, संस्कृति, पर्यटन तथा नागरिक उड्डयन र उद्योग, वाणिज्य तथा आपूर्ति मन्त्रालयका सचिव तथा भियतनामी सरकारका तर्फबाट मन्त्री, उपमन्त्री र उच्चपदस्थ सरकारी अधिकारी सहभागी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778724016.jpg)
-1764146706.png)
