दाङ- नेपाली कांग्रेसका केन्द्रीय सदस्य तथा पूर्वमन्त्री गगन थापाले जागरण तल्लो तहमा मात्रै नभई मथिल्लो तहसम्म आवश्यक रहेको बताएका छन।
आज दाङकाे दङ्गीशरण गाउँपालिका-६, को श्रीगाउँमा प्रजातान्त्रिक उद्योगी व्यवसायी सङ्घले आयोजना गरेको नयाँ वर्षकाे अवसरमा शुभकामना आदानप्रदान कार्यक्रमलाई सम्बोधन गर्दै उनले पार्टीले अहिले तल्लोस्तरमा जागरण दिन अभियान सञ्चालन गरिरहेको भन्दै यो अभियान केन्द्रीयस्तरका नेताहरुका लागि पनि हुन आवश्यक रहेको जिकिर गरेका हुन्।
'अहिले जिल्ला तहमा जागरण अभियान चलिरहेको छ, तर त्यो जागरण अभियान माथिसम्म पुग्नुपर्छ', उनले भने, 'माथिल्लो तहका नेतामा पनि जागरण आएन भने पार्टी सुधार हुनसक्दैन।'
पार्टीभित्रको बेमेललाई मिलाएर पार्टीलाई एक ढिक्का बनाउनुपर्ने उनको भनाइ छ। गुट–उपगुटले गर्दा कांग्रेस पछाडि परेको भन्दै यसलाई सुधार गर्न आवश्यक रहेकोसमेत उनले जाेड दिए।
उनले पार्टीमा केन्द्रीयस्तरका नेताभन्दा तल्लो तहका कार्यकर्ताको समर्थनले नै कांग्रेस जोगिएकोसमेत बताए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
