धनगढी- नेपाली कांग्रेसका सभापति शेरबहादुर देउवाले ससद्मा प्रधानमन्त्री केपी शर्मा ओली र सांसदहरुबीच भएकाे विवादमा सभामुख मुख्य दाेषी रहेकाे बताएका छन्। सभापति देउवाले सभामुख कृष्णबहादुर महराले संसद्मा बाेलिएका असंसदीय शब्दहरुलाई हटाउन साेही समयमै हिम्मत गर्नुपर्ने धारणा राखे।
‘सभामुखले संसदमा उतिबेलै हिम्मत गर्नुपर्ने थियो। उसै बेला डिलिट गर्न भन्न सक्नुपर्ने थियो। अहिले डिलिट भयो राम्रै भयो’, सभापति देउवाले भने। संसदमा प्रधानमन्त्री ओलीले संसदीय परम्पराभन्दा बाहिर गएर बोलेकाे उनकाे जिकिर थियाे।
शनिबार नेपाल प्रेस युनियन कैलालीले आयोजना गरेको पत्रकार सम्मेलनमा बोल्दै पूर्वप्रधानमन्त्रीसमेत रहेका कांग्रेस सभापति देउवाले वर्तमान सरकार सबै ठाउँमा हष्तक्षेप र नियन्त्रण गर्ने हिसाबले अघि बढिरहेको आराेप लगाए। उनले सरकारकाे काम नै नभएकाे टिप्पणी समेत गरे।
‘यसको कामै छैन। एकदमै अधिनायकवादी र सकभर सबै नियन्त्रण गर्ने प्रयासले अघि बढेको छ’, देउवाले भने, ‘यो सरकारले प्रेस स्वतन्त्रतालाई ग्रहण गर्न सकिरहेको छैन। न्यायपालिकासहित सबै ठाउँमा हस्तक्षेपकारी र अधिनायकवादी सोचसहित काम गरिरहेको छ।’
उनले सरकारलाई नीति, नियम, कानुनमा रहेर काम गर्न सुझाव दिंदै सरकार नसच्चिएमा कांग्रेस कडारुपमा प्रस्तुत हुने चेतावनी समेत दिए। सभापति देउवाले सरकारका गलत क्रियाकलाप आम जनतासम्म पुर्याउन नै कांग्रेसले जागरण अभियान सुरु गरेको स्पष्ट पारे।
‘यो जागरण अभियानलाई अझ सशक्त पारिन्छ। वर्तमान सरकारको दमन, हस्तक्षेप, अधिनायकवाद लगायतकाबारे जनतासमक्ष जानकारी गराइन्छ’, उनले भने। उनले जनमतबाटै कांग्रेस अघि बढ्ने जिकिर गरे।
'प्रधानमन्त्री नभएपनि सुदूरपश्चिमको विकासका लागि कटिबद्ध'
सभापति देउवाले आफू प्रधानमन्त्री पदमा नरहेपनि सुदूरपश्चिमको विकासमा कटिबद्ध रहेको बताए।
‘म प्रधानमन्त्री हुँदा पनि सुदूरपश्चिमको विकासमा गम्भीर थिएँ। प्रधानमन्त्री नभए पनि यसै क्षेत्रको विकासका लागि पहल गरिरहेको छु’, महेश रामायण सभाको हिरक महोत्सवकाे समापन कार्यक्रमलाई सम्बोधन गर्दै सभापति देउवाले भने, ‘म प्रधानमन्त्री भएपछि सुदूरपश्चिमलाई काठमाडौंसँग जोडें। पहाडी सात जिल्लालाई जोड्न सडक कालोपत्रे भए। विश्वविद्यालय स्थापना भइसकेको छ भने मेडिकल कलेज निर्माणाधीन अवस्थामा रहेको छ।’
उनले सुदूरपश्चिमको समग्र विकासका लागि धेरै काम गर्न बाँकी रहेको पनि औंल्याए।
‘गौरिफन्टा नाकाको स्तरोन्नति, मेडिकल कलेज छिट्टै सञ्चालनमा ल्याउनका लागि अहिले पनि म पहल गरिरहेको छु’, उनले भने, ‘विकास गर्ने त भन्छौं, तर त्यो सजिलो चाहिँ होइन।’
देउवाले सिताराम माध्यामिक विद्यालय मन्त्रीको उत्पादन गर्ने थलो भएको दाबी गरे। उनले भने, ‘भक्तबहादुर बलायर, वीरबहादुर बलायर, गोविन्द शाह, सिद्धराज ओझा, टेकबहादुर चोखाल, लेखराज भट्ट जस्ता व्यक्तिहरु यही विद्यालयमा पढेर मन्त्री बनेका छन्।’ उनले विद्यालयले अनुशासन र जीवनका बारेमा शिक्षा प्रदान गर्दै आएको बताए।
कार्यक्रममा बोल्दै पूर्वमन्त्री लेखराज भट्टले पनि सिताराम विद्यालयबाटै आफूले अनुशासन र जीवनको ज्ञान पाएको धारणा राखे।
नेकपाका स्थायी कमिटी सदस्यसमेत रहेका भट्टले नेपाली कांग्रेसका सभापति देउवा ४ पटक देशको प्रधानमन्त्री भएपनि आशाअनुरुप काम गर्न नसकेको आराेप लगाए। उनले भने, ‘यही प्रदेशका कांग्रेस पार्टी सभापति ४ पटक प्रधानमन्त्री हुनुभयो। तर, कति काम गर्नु भयो र कति गर्नुपर्ने थियो तपाईंले आत्मसमिक्षा गर्न आवश्यक छ।’
भट्टले पछिल्लो समय डोटेली भाषा, संस्कृति, संस्कार लोप हुँदै गएको बताउँदै भाषा, संस्कार, संस्कृतिको संरक्षणबाटै प्रदेशलाई पहिचान गराउन सकिने भएकाले यसको संरक्षणका लागि सबै लाग्न आवश्यक रहेको बताए।
पूर्वमन्त्री भक्तबहादुर बलायरले सुदूरपश्चिम प्रदेशका हरेक महिलालाई आत्मनिर्भर बनाउन साना तथा घरेलु उद्योगको प्रवर्द्धनका कार्यक्रम अघि बढाउन जरुरी रहेको धारणा राखे।
नेपाली कांग्रेसकी नेतृ डा आरजु राणा देउवाले शिक्षाबाट मात्र समाजको परिवर्तन हुने औंल्याइन्।
कांग्रेसका सभापति देउवालाई सम्मान
साेही अवसरमा कांग्रेस सभापति देउवालाई सम्मान समेत गरिएको थियाे। महेश रामायण सभाले आफनो हिरक (६०औं स्थापना दिवस) महोत्सवको समापनको अवसरमा सभापति देउवालाई सम्मान गरेको हो।
सभाले देउवा लगायत विद्यार्थी सीताराम माध्यामिक विद्यालयमा प्रवेशिका परीक्षा उत्तीर्ण गर्ने प्रथम समूह रहेको भन्दै सम्मान गरेको थियो। देउवाले विक्रम संवत् २०१९ सालमा सो विद्यालयमा प्रवेशिका परीक्षा दिएर उत्तीर्ण भएका थिए।
देउवासँगै त्रिभुवन विश्वविद्यालयका पूर्व डिन डाक्टर प्रेमराज पन्त र गोविन्द केसीले सो विद्यालयबाट प्रवेशिका परिक्षा उत्तीर्ण गरेका थिए।
सभापति देउवालाई विद्यालयका पूर्व प्राचार्य लोकराज पन्तले दोसल्ला ओढाएर तथा प्रमाणपत्रसहित सम्मान गरेका थिए भने। पन्त र केसीका आफन्तलाई सभापति देउवाले प्रमाणपत्र प्रदान गरेर सम्मान गरेका थिए।
नेपाली कांग्रेसका सभापतिसहित प्रतिनिधि सभा सदस्य एवम् नेकपा स्थायी समिति सदस्य लेखराज भट्ट, पूर्वमन्त्री भक्तबहादुर बलायर, वीरबहादुर बलायर, प्रदेश सभा सदस्य पूर्णा जोशी लगायतलाई पूर्व विद्यार्थीका रुपमा सभाले सम्मान गरेको थियो।
यस्तै, सभाले विद्यालयका पूर्व प्राचार्य, संस्थापक सदस्य, चन्दादाता, समाजसेवीलाई प्रमाणपत्र र दोसल्ला ओढाएर सम्मान गरेको थियो।
यसैगरी सभामा विद्यालयमा ४ लाख ५० हजार रुपैयाँको प्रथम छात्रवृत्ति अक्षय कोष स्थापना गरेकोमा डाक्टर मेघनाथ पन्तसमेत सम्मानित भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
