काठमाडौं- नेपाली कांग्रेसका सभापति शेरबहादुर देउवाले पार्टीमा कोइराला परिवारप्रति प्रश्न नउठेको भन्दै कार्यकर्ता समक्ष असन्तुष्टि पोखेका छन्।
पार्टीले गरेको पहिलो चरणको जागरण अभियान कार्यक्रममा बोल्दै देउवाले पूर्व सभापतिहरु गिरिजाप्रसाद कोइराला र सुशील कोइरालाले ल्याएको विधानको प्रावधानलाई निरन्तरता दिँदा आफूमाथि प्रश्न उठेको भन्दै उनले गुनासो गरे।
‘कोइरालाहरुले गरेको व्यवस्थालाई किन सोधिँदैन। कोइराला परिवार हुँदैमा सोध्न नहुने हो,’ देउवाको प्रतिप्रश्न थियो।
कार्यक्रममा महासमिति बैठकले बहुमतले अनुमोदन गरेको विधानको व्यवस्थालाई केन्द्रीय समितिले उल्टाएको प्रसंग काठमाडौं जिल्ला सभापति सबुज बानियाँले उठाएका थिए। बाँनियाको जिज्ञासा निराकरण गर्ने क्रममा देउवा नेता तथा कार्यकर्तालाई नै प्रश्न उठाएका हुन्। केन्द्रीय सदस्यहरु वडा तहबाट महाधिवेशन प्रतिनिधि बन्नुपर्ने प्रावधानमा राख्न बहुसंख्यक जिल्ला सभापति र महासमति सदस्यहरुले आवाज उठाएका थिए।
तर, केन्द्रीय समितिको बैठकले बहुमतको आधारमा पुरानो व्यवस्थालाई निरन्तरता दिएको थियो। केन्द्रीय सदस्य स्वतः महाधिवेसन प्रतिनिधि बन्ने व्यवस्थाको संस्थापन इतरका नेताहरुले आपत्ति जनाएका थिए। देउवाले आठ जना केन्द्रीय सदस्य मात्रै नयाँ प्रावधानको पक्षमा रहेको दाबी गरे।
स्वतः महाधिवेशन प्रतिनिधि बन्ने व्यवस्थामा केन्द्रीय सदस्यहरुको कारण हुन नसकेको प्रष्टाए। उनले भने, ‘केन्द्रीय सदस्यहरु नै मान्दैनन्।’
सभामुख इतिहासकै काँतर
मंगलबार संसदमा भएको घटनामा सभामुख मुख्य दोषी रहेको देउवाले आरोप लगाए। उनले भने, ‘यस्तो काँतर र डरपोक सभामुख इतिहासमा कहिले देखेको थिइनँ।’
प्रधानमन्त्री केपी शर्मा ओलीले संसदीय परम्पराभन्दा बाहिर गएर बोलेको विषयलाई सभामुखले संसदको रेकर्डबाट सभामुखले नहटाएको प्रति उनले आपत्ति जनाए। सदन प्रतिपक्षको हुने बताउँदै देउवाले सभामुख प्रधानमन्त्रीको अघि निरिह देखिएको आरोप लगाए।
राष्ट्रपति महारानी भइन्
नीति तथा कार्यक्रममा ‘मेरो सरकार’ शब्दावली प्रयोग गरिएको प्रति कांग्रेस नेताहरुले आपत्ति जनाए। गणतन्त्र पश्चात् हटेको शब्दावली पुनः प्रयोगमा ल्याएको प्रति आपत्ति जनाउँर्दै देउवाले भने, ‘हिज म्याजेस्टी विद्या भण्डारी भन्ने?’ राष्ट्रपतिको व्यवहार बेलायतकी महारानी भन्दा बढी भएको उनले आरोप लगाए।
कांग्रेसको सरकारका समयमा सुरु भएका आयोजना वर्तमान सरकारले आफैं गरेको जस लिन खोजेको भन्दै सरकारको आलोचना गरे। नेपाली कांग्रेसले कुर्ची र रेलिङ भाँच्ने प्रतिपक्ष नहुने प्रष्ट पारे। सरकारको गतिविधिले कांग्रेस आन्दोलन जानपर्ने अवस्था हुँदै गएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
