काठमाडौं– प्रधानमन्त्री केपी शर्मा ओलीले नीति तथा कार्यक्रम प्रस्तुत गर्दा राष्ट्रपति विद्यादेवी भण्डारीले सम्बोधनमा प्रस्तुत गरेको ‘मेरो सरकार’ सही भएको दाबी गरेका छन्। उक्त पदावलीमाथिको टिप्पणी ‘खन्यो पहाड, निस्क्यो मुसो’ जस्तो रहेको उनले टिप्पणी गरे।
प्रधानमन्त्री ओलीले भुलुचुकले परेको नभई सुझबुझपूर्ण ढंगले राखेको बताए। उनले भने, ‘राजा/महाराजाले मेरो भन्न हुने तर जनताले चुनेको व्यक्तिले अपनत्व लिन नहुने भन्ने हुँदैन। कसैले कुनै सम्बोधन गर्दैन। किनकी उसलाई तिमी भन्ने आँट हुँदैन, तपाईं भन्ने मन हुँदैन।’
उनले दुनियाँभरिको अभ्यास 'मेरो सरकार' रहेको बताउँदै अघिल्लो वर्ष नमिलेको कुरामा यस वर्ष मिलाएको बताएका छन्।
ओलीले प्रतिपक्षीलाई पनि 'मेरो सरकार' भन्न सुझाएका छन्। उनले भने, ‘हुन त प्रतिपक्षीलाई आफ्नो सरकार भन्न गाह्रो होला। तर, मेरो सरकार भने हुन्छ। बजेट हेर्नुहोला न। प्रतिपक्षका लागि धेरै कुरा छन्।’
प्रतिपक्षले नीति तथा कार्यक्रममा आलोचना गर्ने ठाउँ नभेटेको ओलीकाे ठहर छ। नीति तथा कार्यक्रमका विषयमा उठेको सवालको जफाव दिन संसदमा पुगेका उनले प्रतिपक्षी सांसदहरुले आलोचनाको ठाउँ नभेटेको दाबी गरे।
आफूले सांसदहरुको संशोधन प्रस्ताव हेरेको तर संशोधन गर्नयोग्य सुझाव नभेटेको उनकाे भनाइ छ। प्रधानमन्त्री ओलीले भने, ‘मैले संशोधन प्रस्ताव हेरें। ध्यान दिनुपर्ने खालको सुझाव र संशोधन छन् कि भन्ने लागेको थियो। तर, आलोचनायोग्य ठाउँ भेटिएनछ।’
प्रधामन्त्री केपी ओलीले सांसदहरुलाई राति देखिने सपनालाई मात्रै सपना नठान्न आग्रह गरे। प्रधानमन्त्री ओलीले वर्तमान नीति तथा कार्यक्रमले सपना देखेको बताएका छन्। उनले भने, ‘हामीले नीति तथा कार्यक्रममार्फत् सपना प्रस्तुत गर्दा माननीयज्यूलाई अचम्म लागेको छ। उहाँहरुलाई सपना भनेका राति मात्रै देखिने कुरा हो भन्ने लागेको रहेछ।’
'आफूले देश बनाउने सपनाकाे कुरा गरेको निदाएका बेला देखिने सपनाको होइन', उनले कटाक्ष गरे, ‘जागै हुँदा देख्ने सपनाको कुरा हो। सहिदको सपना घुरेर देख्ने सपना होइन।’
देशलाई कहाँ पुर्याउने भन्ने सहिदको लक्ष्यलाई सपनामा अर्थ्याइएको भन्दै सरकारले दिउँसै सपना देख्यो भन्न नहुने उनकाे जिकिर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
