राजविराज– खोटाङका कर्ण श्रेष्ठ देशव्यापी साइकल यात्रामा छन्। शिक्षाका नाममा व्यापार, सुशासनका नाममा भ्रष्टाचार तथा विकासका नाममा मौलाएको अराजकता र अत्याचारविरुद्ध उनको यात्रा प्रदेश २ आइपुगेको छ।
एक महिना लगाएर प्रदेश १ का १४ वटा जिल्लाको यात्रा पूरा गरेका उनी बिहीबार सप्तरी आएका थिए। २०७५ चैत ३ गते खोटाङको दिक्तेलबाट सुरु भएको प्रदेश १ स्तरीय यात्रा चैत २७ गते उदयपुरमा सकिएको थियो। उनले शुक्रबार राजविराजबाट प्रदेश २ स्तरीय यात्रा सुरु गरेका हुन्। ६ महिनाभित्र मुलुकका ७७ वटै जिल्लामा पुग्ने उनको लक्ष्य छ।
साइकल यात्राको उद्देश्य
शिक्षा, स्वास्थ्य, विकास निर्माणका क्षेत्रमा बढेको विकृति तथा गलत परिपाटीविरुद्ध सर्वसाधारणलाई जागृत गराउनु र ‘सानालाई ऐन, ठूलालाई चैन’ को अवस्था विरुद्ध आवाज उठाउन साइकल यात्रामा निस्केको उनको भनाइ छ। सरकारले सुरु गरेको ‘समृद्ध नेपाल, सुखी नेपाली’ को अभियानमा आफनो साइकल यात्राले सहयोग गर्ने उनको जिकिर छ।
‘नारा एकातर्फ छ, काम अर्कैतिर भइरहेका छन्,’ उनले भने, ‘सरकारको नारा र पारा मिलेन भन्ने सन्देश दिन र यस विषयमा जनतालाई जागृत गर्न म निस्किएको हुँ।’
भत्केका कालोपत्रे सडकले उक्सायो
गाउँमा भइरहेका विकास निर्माणका काम र कथित ठूलाबडाको अहंकारले आफूलाई साइकल यात्राका लागि उत्प्रेरित गरेको श्रेष्ठ बताउँछन्। ‘विकासका नाममा गाउँगाउँमा सडक पुगेका छन्, नपुगेका ठाउँमा प्रयास जारी छ,’ उनी भन्छन्, ‘तर, कुन स्तरको काम भइरहेको छ भन्ने विषयमा कसैलाई हेक्का छैन।’
कालोपत्रे गरिएका सडक एक महिना नपुग्दै भत्केको देखेपछि त्यसविरुद्ध केही गर्नैपर्ने बुझेर यात्राको योजना बनाएको उनले बताए। विकासका नाममा ‘दादाभत्ता’ र कमिसनखोरी मौलाएको र त्यसविरुद्ध आवाजको सुनुवाइ नै हुन छोडेको उनको बुझाइ छ। ‘गुनासो गरेर पनि हुने केही छैन, सबै मिलेकै छन्,’ उनले भने, ‘कानुनी राज्यको कुरा त हुन्छ, तर त्यो कागजमै सीमित छ। कानुन सानालाई लाग्छ, ठूलालाई फाब्छ।’
‘थर्ड डिभिजन होल्डर’बाट केको अपेक्षा?
व्यावहारिक शिक्षा र त्यस अनुसारको रोजगारीको अवसर नहुँदा नेपाल पछि परेको उनको बुझाइ छ। सरकारले गाउँ–गाउँमा विद्यालय पुर्याए पनि गुणस्तरीय शिक्षा नदिएको उनले बताए। ‘विद्यालय भएर के गर्नु, राम्रो शिक्षाका लागि गाउँबाट सहर छिर्नैपर्छ। साना सहरका ठूला सहर र ठूला सहरका विदेश जान्छन्,’ उनी भन्छन्, ‘पढ्नका लागि बाहिरिएकाहरु गाउँमा फर्केर आउनु भनेको कल्पना भन्दा बाहिरको कुरा हो।’
राम्रा र पढेलेखेका बाहिरिएपछि नेपालमा ‘थर्ड डिभिजन एसएलसी होल्डर’को बाहुल्य बढ्दै गएको उनले बताए। मुलुकको समृद्धिका लागि शिक्षा पहिलो सर्त भएकाले सरकारी विद्यालयमा समतामुलक, व्यावहारिक, प्राविधिक र सिपमुलक शिक्षाको आवश्यकता रहेको उनले बताए। वर्तमान शिक्षा नीति र पाठ्यक्रम परिमार्जन गरी निमावि तहसम्म जीवन उपयोगी ज्ञानगुनका शिक्षा तथा मावि तहदेखि व्यावहारीक शिक्षा लागू गर्नुपर्ने उनको माग छ।
को हुन् कर्ण?
खोटाङको दिक्तेल–रुपाकोट–मझुवागढी नगरपालिका ४, खाल्लेका ७७ वर्षीय कुलबहादुर र ७५ वर्षीय नरछिमी श्रेष्ठका काहिँला छोरा हुन्, ३४ वर्षीय कर्ण। उनका ३ दाजु, १ भाइ, १ दिदी, पत्नी देविका तथा ११ र ७ वर्षका दुई छोरा छन्।
फोटो स्टुडियो र किराना पसल गर्दै आएका श्रेष्ठले स्नातकसम्मको अध्ययन पूरा गरेका छन्। उनले खोटाङका सबै स्थानीय तहमा रहेका धार्मिक तथा पर्यटकीय स्थलको पैदल–यात्रा गरेका छन्। सोही यात्राको उपलब्धिका रुपमा उनको ‘खोटाङको प्राकृतिक सम्पदा’ नामक पुस्तक प्रकाशन भएको छ। सोही पुस्तक बिक्रीको पैसाले आफू साइकल यात्रामा निस्केको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
