काठमाडौं– नेपालले एसियाली मुलुकहरूबीच हवाइका साथै जलमार्ग सञ्जालको विकास तथा भौतिक पूर्वाधार निर्माण गर्न जोड दिएको छ।
यी मुलुकहरूबीचको सहकार्यलाई प्रभावकारी र उपयोगी बनाउन जलमार्ग सञ्जालमा जोडिनुपर्ने प्रस्ताव नेपालको छ।
कतारको दोहामा जेठ १८ र १९ गते आयोजित एसिया को–अपरेशन डायलग (एडिसी) को १६औं मन्त्रीस्तरीय बैठकमा सहभागी वन तथा वातावरणमन्त्री शक्तिबहादुर बस्नतेले एसिया महाद्विपका सबै मुलुकलाई एउटै मञ्चमा आबद्ध गरी समग्र एसियाको विकासमा सदस्य राष्टबीच सहकार्य र एकता प्रबद्र्धन गर्नुपने उल्लेख गरे।
मन्त्री बस्नेतले सदस्य राष्ट्रहरूमा हितका विविध पक्षहरूको प्रबद्र्धन गर्दै क्षेत्रीय सहयोग एवं व्यापार, पर्यटन तथा लगानी प्रबर्द्धनका साथै जनस्तरको सम्बन्ध विस्तारमा समेत पारस्परिक सहकार्यका पक्षमा नेपाल रहेकामा जोड दिए।
यस्तै उनले जलवायु परिवर्तनको असरले साना तथा अल्पविकसित मुलुकहरूमा आइपरेको जोखिम र प्राकृतिक विपत्तिजस्ता समस्याहरूको दिर्घकालीन समाधानका लागि सबै एसियाली मुलुक एकजुट हुुनुपर्ने विचारसमेत व्यक्त गरे।
मन्त्री बस्नेतले नेपालमा वैदेशिक लगानीका लागि राम्रो वातावरण निर्माण भएकाले लगानी भित्र्याउन अपिलसमेत गरे। नेपालमा लगानीमैत्री वातावरण निर्माणका लागि आवश्यक कानुनी तथा संस्थागत सुधार गरिएकाले एसिया क्षेत्रका लगानीकर्तालाई नेपालमा उर्जा, पर्यटन, यातायात पूर्वाधार, कृषि, वन पैदावार तथा सूचना प्रविधिलगायत क्षेत्रमा लगानी गर्न अपिल गरे।
मन्त्री बस्नेतले सरकारले आगामी सन् २०२० लाई नेपाल भ्रमण वर्ष घोषणा गरेकाले नेपालको भ्रमणमा आउन पनि एसियाली मुलुकका जनतालाई अपिल गरे।
बैठकले दोहा घोषणापत्र जारी गर्दै दिगो विकास तथा शान्ति, कनेक्टिभिटी, व्यापार तथा पारवहन सहजीकरण, पर्यटन प्रबद्र्धन, जलवायु परिवर्तनका असर न्यूनीकरण तथा प्राकृतिक विपद३ व्यवस्थापन, साइबर सुरक्षा, आतंकवाद नियन्त्रणविरुद्धको सहकार्य, स्वास्थ्य तथा खेलकुद क्षेत्रको विकासजस्ता क्षेत्रीय तथा अन्तर्राष्ट्रिय सरोकारका महत्वपूर्ण विषयहरूमा सहकार्यको घोषणा गरेको छ।
एसिया महाद्विपका मुलुकबीच एउटै मञ्चमा आबद्ध भई विभिन्न विषयमा सहकार्यका लागि सन् २००२ मा एसिडी गठन भएको हो। उक्त मञ्चमा नेपाल सन् २०१६ मा सदस्य बनेको थियो। मञ्चमा एसियाका ३४ राष्ट्र सदस्य छन्।
नेपाली मजदुरका समस्याबारे चासो
बैठकपछि बुधबार साँझ मन्त्री बस्नेत नेपाली दूतावासले आयोजना गरेको नेपाली समुदायसँगको अन्तरक्रियामा सहभागी भए। त्यसै क्रममा उनले नेपाली मजदुरका अवस्था एवं उनीहरूका हकहितका विषयमा छलफल गरे।
त्यसै क्रममा नेपालका लागि कतारका राजदूत तथा कर्मचारीहरूसँग नेपाल र कतारबीचको द्विपक्षीय सम्बन्ध, दूतावासको सेवाप्रवाहको अवस्था एवं नेपाली श्रमिकहरूका सरोकारका विविध विषयमा मन्त्री बस्नेतलाई जानकारी दिइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
