धनगढी– धनगढी उपमहानगरपालिका क्षेत्रभित्र सञ्चालनमा रहेको अधिकांश होटलले गुणस्तरमा सुधार गर्नुपर्ने देखिएको छ।
खाद्य प्रविधि तथा गुण नियन्त्रण कार्यालयले उपमहानगरपालिका क्षेत्रभित्रका १६ वटा होटलमा स्तरीकरण लोगो वितरण गर्ने क्रममा अधिकांशको गुणस्तरमा ध्यान दिनुपर्ने पाइएको हो।
खाद्य प्रविधि तथा गुणस्तर नियत्रण कार्यालयका अनुसार हरियो दुई तारा (उत्तम स्तर ख) मा दुई होटल परेका छन्। त्यस्तै, हरियो एक तारा (सन्तोषजनक स्तर ग) मा पाँच र पहेंंलो (सामान्य स्तर घ) मा नौ वटा होटल परेका छन्।
कार्यालयले दिएको जानकारी अनुसार धनगढीभित्र सञ्चालनमा रहेको होटल फ्लोरा र सनलाइटले मात्र उत्तम होटलका रुपमा हरियो दुई तारे लोगो प्राप्त गरेका छन्।
त्यस्तै, होटल दिनेश, होटल रूवश, होटल जलशा, आफनो घर टेम्पल रिसोर्ट र होटल डिभोटीले एक तारे लोगो अर्थात् सन्तोषजनक स्तर ‘ग’ प्राप्त गरेका छन्। होटल साथी, होटल होली प्यालेस, होटल हटपट, होटल सोराइ, होटल ज्ञानु प्लाजा, होटल के आइ, होटल नयाराम, होटल विकास र होटल आस्थाले पहेंलो लोगो अर्थात् सामान्य स्तर ‘घ’ प्राप्त गरेका छन्।
सो कार्यालयले धनगढीमा दुई चरणमा लोगो वितरण गर्ने कार्यक्रम मंगलबारदेखि सुरु गरेको थियो। उपमहानगरपालिकाका नगर प्रमुख नृपबहादुर वडले धनगढी–४ स्थित होटल फ्लोरालाई हरियो दुई तारे ‘उत्तम’ लोगो टाँसेर उद्घाटन गरेका थिए। लोगो टाँसेसँगै नगर प्रमुख वडले खाद्य स्वच्छतास्तरको प्रमाणपत्र प्रदान गरेका थिए।
‘पहिलो चरणमा उपमहानगरपालिकाभित्र रहेका लजसहितको होटलहरूको अनुगमन गरी लोगो प्रदान गर्ने काम भएको छ,’ कार्यालयका प्रमुख सुमन धितालले भने, ‘दोस्रो चरणमा रेष्टुरेण्टको अनुगमन गरी स्तरीकरण लोगो प्रदान गर्ने काम हुनेछ।’
खाद्य प्रविधि तथा गुण नियन्त्रण कार्यालयका प्रमुख धितालले राजमार्ग क्षेत्रमा रहेका होटलहरूमा गुणस्तरहीन खाना खान यात्रुहरू बाध्य भएको गुनासो आएपछि होटलहरूलाई स्तरीकरण स्टिकर बाँड्ने काम गरिएको बताए।
होटलहरूलाई स्तरीकरण गर्नका लागि टोलीले भौतिक पूर्वाधार, सरसफाइ, खाद्य स्वच्छता लगायतको ५० वटा सुचाङ्क हेर्ने बताए। होटल, रेष्टुराँको खाद्य स्वच्छतास्तर मूल्यांकनका लागि ५० वटा प्रश्नावलीसहितको सुचाङ्क रहेको छ।
उनले भने, ‘सुचाङ्कका आधारमा हामीले होटलहरूलाई नम्बर प्रदान गर्छौं। उनले एक प्रश्नमा दुई अंक गरि १०० पूर्णाक रहने व्यवस्था गरिएको बताए। सोही आधारमा ९० भन्दा बढी अंक पाउने अति उत्तम ‘क’, ८० देखि ८९ भित्रको अंक पाउने उत्तम ‘ख’, ६५ देखि ७९ सम्म अंक पाउने सन्तोषजनक ‘ग’ र ५० देखि ६४ सम्म अंक पाउने सामान्य ‘घ’ वर्गमा पर्ने गरेका छन्।
कार्यालय प्रमुख धितालले भने, ‘होटलहरूको नियमित अनुगमन हुने र होटलहरूको माग अनुसार पुनः अनुगमन गरी होटलको अवस्थाअनुसार लोगो वितरण गरिने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778309656.png)
-1764146706.png)
