राष्ट्रपति भण्डारी मंगलबार बेइजिङबाट ल्हासा झर्ने क्रममा। (तस्बिर- सुरेन्द्रबहादुर नेपाली, रासस, ल्हासा)
काठमाडौं- छिमेकी देश चीनको राजकीय भ्रमणमा रहेकी राष्ट्रपति विद्यादेवी भण्डारी बुधबार स्वदेश फर्किँदै छिन्। ९ दिने भ्रमणका लागि चीनको भ्रमणमा रहेकी राष्ट्रपति भण्डारी निर्धारित समयभन्दा एक दिन अगावै स्वेदश फर्किन लागेकी हुन्।
स्वास्थ्यमा समस्या आएकाले भ्रमण छाेट्याएर राष्ट्रपति भण्डारी स्वदेश फर्किन लागेको बताइएको छ। सिचुवान एयरलाइन्सको विमानबाट आज बिहान साढे १० बजे उनी काठमाडाैं आइपुग्ने बताइएकाे छ।
भ्रमणका क्रममा राष्ट्रपति बेइजिङमा आयोजना भएको दोस्रो 'बेल्ट एन्ड रोड फोरम फर इन्टरनेसनल कोअपरेसन'मा सहभागी भएकी थिइन्। भ्रमणका अवसरमा नेपाल र चीनका राष्ट्रपतिबीच प्रतिनिधिमण्डलस्तरीय द्विपक्षीय वार्तासमेत भएको थियो।
वार्तापछि पारस्परिक सहयोगसम्बन्धी ७ समझदारीपत्रमा हस्ताक्षर भएको थियो।
उनी बैसाख ११ गते चीन प्रस्थान गरेकी थिइन्। राष्ट्रपति भण्डारी बैसाख १९ गते स्वदेश फर्कने कार्यक्रम तय भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
