काठमाडाैं- पर्सा र बारा जिल्लामा हावाहुरीका कारण पूर्णरुपमा क्षति भएका १ हजार ४ सय ५३ वटा घर नेपाली सेनाले पुनर्निर्माण गर्ने भएको छ। गत चैत १७ गते साँझ आएको हावाहुरीका कारण बारा जिल्लाको उपमहानगरपालिका, नगरपालिका तथा गाउँपालिका गरी ८ वटा इलाकामा ठूलो सङ्ख्यामा मानवीय तथा जनधनको क्षति गरेको थियो।
हावाहुरीका कारण जिल्लाको ठेटा, तेलकुवा, त्रसैनी, भलुवाही, हार्दिया, पशुरामपुर, धर्मनगरलगायत ठाउँमा घरहरु भत्किँदा २८ जनाको मृत्यु हुनाका साथै ६ सय भन्दा बढी घाइते भएका थिए। हावाहुरी प्रभावित क्षेत्रको निरीक्षण गर्न सोमबार यहाँ पुग्नुभएका उपप्रधान एवम् रक्षामन्त्री ईश्वर पोखरेलले आगामी साउनभित्र निर्माण सम्पन्न गर्ने गरी नेपाली सेनाले जिम्मेवारी पाएको र त्यसमा जनप्रतिनिधि, स्थानीय सङ्घसंस्था तथा व्यक्तिहरुबाट आवश्यक सहयोग हुने विश्वास व्यक्त गरे।
एक हजार ४ सय ५३ वटा घर निर्माणका लागि सरकारले ८४ करोड ६८ लाख ७६ हजार १ सय ४० रुपैयाँ विनियोजन गरेको उनले जानकारी दिए। छिटोभन्दा छिटो निर्माण सम्पन्न गर्नका लागि सबैको सहयोग रहने विश्वास व्यक्त गर्दै मन्त्री पोखरेलले समयमा निर्माण सम्पन्न गरेर सम्बन्धित व्यक्तिलाई हस्तान्तरण गरिनेसमेत जानकारी दिए। उनले भने, 'यहाँका जनताले प्राकृतिक विपत्तिको भार सहनु पर्यो, छिटोभन्दा छिटो त्यो पीडाबाट मुक्ति दिलाउन सरकारले यो निर्णय गरेको छ र निर्माण गर्ने जिम्मेवारीअनुसार कुनै पनि बाधा व्यवधान हुने छैन, काम सम्पन्न गर्नेछ।'
नेपाली सेनाका ७ सय ५० भन्दा बढी इञ्जिनीयर, प्राविधिकले यही बैसाख २१ गतेबाट औपचारिक रुपमा काम थाल्ने जानकारी दिँदै मन्त्री पोखरेलले जहाँ जस्तो अवस्थामा पनि तत्काल जनतालाई राहत दिने हिसाबले निर्माण कार्य हुने बताए।
निरीक्षणका क्रममा सहभागी प्रधानसेनापति पूर्णचन्द्र थापाले यहाँ बनाइने घरको डिजाइन मन्त्रिपरिषद्बाट स्वीकृत भइसकेको बताउँदै एउटा घरमा २ वटा बस्ने कोठा, एक भान्छा कोठा र एक शौचालय रहने जानकारी दिए। उनले यहाँको वातावरणअनुसार ती घरहरुको निर्माण हुने विश्वास व्यक्त गर्दै आफूहरुले पाएको गहन जिम्मेवारी सफलतापूर्वक निर्वाह गर्ने प्रतिबद्धता जनाए।
पुनर्निर्माण कार्यका लागि विभिन्न १२ ठाउँबाट १२ समूह बनाई काम थालिने र त्यसमा २ हजार ६ सयभन्दा बढी नेपाली सेना संलग्न भएर काम सम्पन्न गर्ने लक्ष्य रहेको पनि उनले जानकारी दिए। आचारसंहितसमेत बनाएर पुनर्निर्माण कार्य गर्ने लक्ष्यका साथ नेपाली सेना अगाडि बढेको र आर्थिक नियमअनुसार सामान खरिद गरी समयमै निर्माण सम्पन्न गर्ने उनकाे भनाइ थियाे। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
