काठमाडौं- भारतीय सेनामा कार्यरत एक मेजरलाई यार्सागुम्बा तस्करसँग मिलेर ठगी गरेको आरोपमा काठमाडौं जिल्ला अदालतले उपस्थित हुन पक्राउ पुर्जी जारी गरेको छ।
भारतीय सैनिकमा कार्यरत रहेका झपेन्द्र रानामगरले नेपालीलाई क्यानडामा आकर्षक काममा लगाइदिने भनी फकाएर ६ लाख ठगी गरेको भन्दै जिल्ला अदालतले यस्तो आदेश गरेको हो।
भारतीय मेजर रानामगरले यार्सागुम्बा तस्करीमा दोषी ठहर भएकी कर्मजोतेन पुनसँग मिलेर ठगी गरेका थिए।
जिल्ला अदालतले वैदेशिक रोजगारीमा क्यानडा पठाइदिन्छु भनी नेपालीसँग ६ लाख ठगी गरेको भन्दै मेजर रानामगरलाई पुर्पक्षका लागि उपस्थित गराईदिन भारतीय दूतावासका नाममा समेत आदेश जारी गरेको छ।
जिल्ला अदालतका न्यायाधीश श्रीकृष्ण भट्टराईको इजलासले परराष्ट्र मन्त्रालयमार्फत् दूतावासलाई पत्र पठाई पक्राउ गरेर पेस गर्न भनिएको छ।
जिल्ला अदालतले उनी नेपाली नागरिक भएको तर नेपाल र भारतबीच हाल 'म्युचिएल लिगल एसिस्टेन्स ट्रिटी' नभएकाले दूतावासमार्फत पक्राउ गर्न आदेश गरेको हो।
रुकुम जिल्लाकी प्रतिमा बाँस्कोटा (नाम परिर्वतन) लाई क्यानडा पुर्याइदिने भन्दै मेजर रानामगरले ६ लाख नगद लिएका थिए। तर उनले बाँस्कोटालाई क्यानडा नपठाएर ठगी गरेको भन्दै जिल्ला अदालतमा दर्ता भएको अभियोगपत्रमा उल्लेख छ।
भारतीय सैनिकबाट यसरी ठगिइन् प्रतिमा
नेपालमा भनेजस्तो काम र कमाई नभएपछि प्रतिमाले वैदेशिक रोजगारमा जाने सोच बनाएकी थिइन्। परिवारसँग सल्लाह गरी वैदेशिक रोजगारीका लागि कुनै राम्रो गन्तव्य जाने तयारीमा रहेकी प्रतीमाको रुकुमकै कर्मजोतन पुनको भेट हुन्छ।
कर्मजोतन पुनले प्रतिमालाई भारतीय सेनाको रुपमा झपेन्द्र रानासँग भेट गराउँछन्। उनले आफू भारतीय सेनामा कार्यरत रहेको र क्यानडामा राम्रो काम लगाइदिने भन्दै प्रलोभन देखाएर रकम माग गर्छन्।
प्रतिमाकी आमा भारत गई झपेन्द्रसँग क्यानडा जाने कुराकानी मिलाउँछिन्।
क्यानडा पठाउनेसँग राम्रो चिनजान भएको र क्यानडा पुगेपछि पनि आफैंले काम लगाईदिने भन्दै रानाले रुकुमकै कर्मजोतनका खातामा ६ लाख रकम जम्मा गर्न लगाएका थिए।
उनले क्यानडामा आफ्नै कम्पनी भएको र उक्त कम्पनीमा आर्कषक तलव हुने आश्वासन दिन्छन्। उनीहरुको कुरामा विश्वास गर्दै प्रतिमाकी आमाले कर्माजोतनको नेपाल बैंकको खातामा रकम जम्मा गरिदिन्छिन्।
क्यानडा जानका लागि २६ लाख लाग्ने तर पहिलो किस्तामा ६ लाख जम्मा गर्नु पर्ने उनीहरुको शर्तअनुसार रकम बुझाएर उनीहरु ढुक्क भएर बस्छन्।
रकम जम्मा भएको लामो समयसम्म कुनै खबर नआएपछि आमा छोरी राना र दलालीको खोजीनीतितिर लाग्छन्। उनीहरूले खोजी गर्दासम्म धेरै ढिला भइसकेको हुन्छ।
त्यतिबेलासम्ममा रानामगर भारत फर्किसकेका थिए। स्थानीय दलाली पनि सम्पर्कविहीन हुन्छन्।
लगत्तै उनीहरु प्रहरी कार्यालय पुग्छन् उजुरीका लागि र ६ लाख ठगीमा परेको उजुरी दर्ता गराउँछन्। प्रहरीले भारतीय सैनिकसहित कर्मजोतनविरुद्ध ठगी मुद्दा दायर गर्यो।
जिल्ला अदालतले स्थानीय दलाल कर्मजोतनलाई झूठो आश्वासन दिई गैह्रकानुनी रूपमा विदेश पठाइदिन्छु भनेको प्रारम्भिक अवस्था देखिएको भन्दै ६ लाख धरौटी माग गर्ने आदेश गर्छ। साथै उनलाई यार्सागुम्बा तस्करीको आरोपमा लगत बाँकी रहेको भन्दै जिल्ला अदालतले ४६ हजार थप असुल गर्न भनेको छ।
मेजर रानामगर भने अझसम्म फरार छन्। फरार प्रतिवादीलाई अदालत पेस गरिदिन जिल्ला अदालतले परराष्ट्र मन्त्रालयमार्फत् नेपालस्थित भारतीय दूतावासलाई तामेल गर्न पठाएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
