काठमाडौं– अपहरण गरी हात खुट्टा काटेर हत्या गर्ने १६ जना जेल चलान भएका छन् भने ३ जना धरौटी रिहा भएका छन्।
भारतको बहराइज थाना मोतिपुर घर भई नेपालगञ्ज बस्दै आएका जुदेन अन्सारीको हत्यामा संलग्न १६ जना जेल चलान भएका हुन्। जुदेनको अपहरण पश्चात हात खुट्टा काटेर हत्या गरिएको थियो।
जग्गा काराेबारका कारण भएकाे थियाे अपहरण पश्चात् हत्या
नेपालगञ्ज उपमहानगरपालिका– ३ का खैरुल हसन अन्सारीले र नेपाल बस्दै आएका जुदेनले साझेदारीमा काम गर्दै आएका थिए।
सोही क्रममा गत माघ १० गते खैरुलले जुदेनलाई फोन गरेर चार बाहिनीचोक नेपालगञ्जमा बोलाएका थिए। जुदेन खैरुलले बोलाएपछि चोकमा पुगेका थिए। त्यसपश्चात उनको अपहरण भएको थियो।
जुदेनलाई अपहरण गरी भारतको बाबागञ्ज एरियामा लगिएको थियो। त्यसपछि माघ १२ गते साँझ भारत बाबागञ्ज एरियामा जुनेदको एउटा हात, एउटा खुट्टा काटिएको र जल्दै गरेको अवस्थामा लास फेला परेको थियो।
घटनामा प्रारम्भिक मुचुल्का लगायतको कार्य प्रहरी थाना भारत नवाबगञ्जबाट भएको थियो। जुनेदको श्रीमती गौरी मल्ल अन्सारीले भारत नबाबगञ्जमै गई शव सनाखत गरीसकेपछि फागुन १३ गते जिल्ला प्रहरी कार्यालय बाँकेमा जाहेरी दिएकी थिइन्।
त्यसपछि प्रहरीले उक्त घटनाको अनुसन्धान सुरु गरेको थियो। अनुसन्धानको क्रममा खैरुल हसन अन्सारी सहित नेपाल र भारतका अन्य ५ जना को संलग्नतामा जुदेनलाई अपहरण गरी हत्या गरेको खुल्न आएको थियो।
अनुसन्धानको क्रममा खैरुल र मृतक जुनेदले मालपोत कार्यालयका कर्मचारीहरूसँग मिलेर सरकारी जग्गाका सक्कली कागजातहरू आफ्नो नियन्त्रणमा लिई कर्मचारीको सेटिङमा सरकारी जग्गा आफन्तको नाममा नामसारी गराउने गरेको पाइएको थियो।
सोही क्रममा उनीहरूले बाँकेको खास कारकाँदो– ७ को कित्ता नं २१० को ५ कट्ठा १३ धुर, सिक्टा सिँचाइ आयोजनाको कम्पाउण्डभित्रको जग्गा ९ महिनाअघि सरकारी कागज किर्ते गरी आफ्नो आमा हसरतुन निसा अन्सारीको नाममा जग्गाधनी श्रेस्ता कायम गरेका थिए।
नेपालगञ्ज उपमहानगरपालिका– ३ कित्ता नं १४ को ५ कट्ठा १३ धुर सरकारी जग्गा सरकारी कागज किर्ते गरी जुनेद अन्सारीको सासु लाली मल्लको नाममा ८ महिना पहिला जग्गा धनी दर्ता श्रेस्ता कायम गरिएको थियो।
त्यस्तै साविक बर्दिया नेउलापुर गाविस –७ को कित्ता नं १९१ ९(ख), ७, ८, ५०, ६१, ६३ को ६ बिगाह ३ कट्ठा १४ धुर सरकारी जग्गा ७ महिना पहिला खैरुल हसन अन्सारीको बाबुको नाममा दर्ता श्रेस्ता कायम गरी गत पुस १२ गते आमा हसरतुन निसा अन्सारीको नाममा नामसारी गरेको अनुसन्धानबाट खुल्न आएको प्रहरीले जनाएको छ।
बाँके, बर्दियाका मालपोत कार्यालयका सरकारी जग्गाका श्रेस्ता (सक्कल कागजात) खैरुलबाट जुनेदले आफ्नो डेरा कोठामा राख्ने गरेका थिए। खैरुलले जुदेनसँग उक्त जग्गाका कागजातहरु पटक पटक नष्ट गर्नका लागि माग गरेका थिए। तर, उक्त कागजात जुनेदले नदिएको अनुसन्धानको क्रममा खुल्न आएपछि मृतक जुनेदको कोठाबाट उल्लेखित सरकारी जग्गा किर्ते गरी व्यक्तिको नाममा नामसारी भएका सक्कल कागजपत्रहरु बरामद भएका थिए।
सोही क्रमममा विवाद हुँदा उनको अपहरण गरी हत्या गरिएको थियो।
को को भए जेल चलान, को को फरार ?
पुर्पक्षका लागि जिल्ला अदालत बाँकेले १६ जनालाई थुनामा पठाएको छ। कारागार चलान हुनेमा खैरुल असन अन्सारी, सज्जन सैयाद, मालपोत अधिकृत पुष्पा श्रेष्ठ, लेखनदास बृहस्पति खड्का, लेखनदास पप्पु धोबी, रामकुमार रोका छन्।
त्यसैगरी नासुहरू रामबहादुर खड्का, रुद्रबहादुर देवकोटा, टंकप्रसाद शर्मा, कृष्णलाल शर्मा, यज्ञश्वर वली, मानबहादुर केसी छन्। खरिदारहरू भूमिराज पोखरेल र सुशील रिजाल, कम्प्यूटर अपरेटर लक्ष्मी मल्ल र कार्यालय सहयोगी अन्तराम चौधरी कारागार चलान भएका छन्।
खरिदारहरू सञ्जयकुमार थारु, तुल्सारानी थारु र सहायक कम्प्यूटर अपरेटर प्रेमबहादुर चन्द ठकुरी धरौटीमा रिहा भएका छन्।
उनीहरू एक एक लाख रुपैयाँ धरौटीमा रिहा भएको बाँकेका एसपी अरुण पौडेलले बताए। फरार हुनेमा भूमि सुधार तथा मालपोत कार्यालय बाँकेका मालपोत अधिकृत हेमराज शर्मा, भूमि सुधार तथा मालपोत कार्यालय बर्दियाका प्रमुख मालपोत अधिकृत कृष्णप्रसाद ज्ञवाली, भूमि सुधार तथा मालपोत कार्यालय कैलालीका प्रमुख मालपोत अधिकृत दीर्घबहादुर पोखरेल, भूमि सुधार तथा मालपोत कार्यालय कावासोतीका मालपोत अधिकृत अशोककुमार भट्टराई छ्।
त्यस्तै खरिदारहरू किशोरकुमार रिजाल, कुलानन्द राउत, रवीन्द्र थापा, कार्यालय सहयोगी सूर्यप्रसाद उपाध्याय पनि फरार छन्।
त्यसैगरी प्रहरीको फरार सूचीमा अवधेश ठाकुर, बच्छराज लोनीया, अकबर अली खाँ र सब्बिर अली सिद्धिकी र एक जना भारतीय नागरिक छन्। उनीहरु भने सर्वसाधारण हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788878240.jpeg)
-1786602170.png)
