फाइल तस्बिर
धनगढी- सुदूरपश्चिम प्रदेशसभाको तेस्रो अधिवेशन ६ वटा विधेयक पारित गर्दै बिहीबार अन्त्य भएको छ।
सुदूरपश्चिम प्रदेशका प्रदेश प्रमुख मोहनराज मल्लले प्रदेशसभामा पत्र पठाएर प्रदेशसभाको हिउँदे अधिवेशन अन्त्य गरेको जानकारी गराएका हुन्। प्रदेश प्रमुख मल्लले पठाएको पत्र पढेर सुनाउँदै सभामुख अर्जुनबहादुर शाहले बिहीबार राति १२ बजेदेखि तेस्रो अधिवेशन अन्त्य भएको प्रदेशसभाको बिहिबारको बैठकमा जानकारी गराएका हुन्।
प्रदेशसभाको तेस्रो अधिवेशनले ६ वटा विधेयक पास गरेको छ भने एउटा विधेयक दफावार छलफलका लागि संसदीय समितिमा पठाएको छ। एउटा विधेयक प्रदेशसभा सचिवालयमा दर्ता गराइएको छ।
प्रदेशसभाले तेस्रो अधिवेशनमा प्रदेशको सहकारीसम्बन्धी व्यवस्था गर्न बनेको विधेयक २०७५, प्रदेशको वातावरण संरक्षणसम्बन्धी व्यवस्था गर्न बनेको विधेयक २०७५, प्रदेशको लोकमार्गसम्बन्धी व्यवस्था गर्न बनेको विधेयक २०७५, प्रदेशमा सुशासनसम्बन्धी व्यवस्था गर्न बनेको विधेयक २०७५, प्रदेशसभाको सचिव र सचिवालयसम्बन्धी व्यवस्था गर्न बनेको विधेयक २०७५ र प्रदेशसभा नियमावली (पहिलो संशोधन) २०७५ पारित गरेको छ।
त्यस्तै, स्वरोजगारसम्बन्धी व्यवस्था गर्न बनेको विधेयक २०७५ दफावार छलफलका लागि अर्थ, विकास तथा प्राकृतिक समितिमा पठाइएको छ भने प्रदेशको औद्योगिक व्यवस्थापन सम्बन्धी व्यवस्था गर्न बनेको विधेयक २०७५ प्रदेश सभा सचिवालयमा दर्ता गराइएको छ।
२०७५ माघ ४ गते सुरु भएको सुदूरपश्चिम प्रदेशको तेस्रो अधिवेशनले २०७६ बैसाख १२ गतेसम्म जम्मा २६ दिन २८ वटा बैठक बसेको सभामुख थापाले अन्तिम बैठकमा प्रतिवेदन पेस गरे। उनले २८ वटा बैठकमा जम्मा २४ घण्टा ५० मिनेट बैठक बसेको बताए।
प्रदेशसभाको बैठकमा सरकारको तर्फबाट प्रदेश सभालाई सम्बोधन गर्दै प्रदेशका आन्तरिक मामिला तथा कानुनमन्त्री प्रकाशबहादुर शाहले संघीय सरकारले संविधानको मर्मअनुसार प्रदेश सरकारलाई सरकारी संरचना नदिएको र कर्मचारी पनि नपठाएको हुनाले जनताकाे चाहनाअनुसार तीब्र रुपमा विकास गर्न नसकेको गुनासाे गरे।
उनले संविधानले प्रदेशलाई दिएको प्रदेश प्रहरी गठन, लोकसेवा आयोग गठन, योजना आयोग गठन, मातहतका निकाय स्थापना गर्न र कर्मचारी पनि दरबन्दी अनुसार नपठाएकाले प्रदेश सरकारकाे योजना कार्यान्वयनमा बाधा आएको जिकिर गरे।
यद्यपि, उनले सुदूरपश्चिम प्रदेशसभा र प्रदेश सरकारले कानुन निर्माण गर्न, प्रदेश राजधानी र नाम तोक्न, संसदीय समिति गठन गर्न र त्यसका सभापति तोक्न अन्य प्रदेशको तुलनामा चाँडै सफल भएको दाबी गरे। उनले प्रदेशका सबै दलका सांसदहरुको एकताले प्रदेशको विकासलाई मद्दत गर्ने विश्वास व्यक्त गर्दै आगामी योजना छनाेटका लागि आफ्नो निर्वाचन क्षेत्रमा गएर अध्ययन गर्न प्रदेश सांसदहरुलाई अनुरोध गरे।
सत्तारुढ दलको तर्फबाट प्रदेशसभाको अन्तिम बैठकमा बोल्दै नेकपा संसदीय दलका प्रमुख सचेतक तारा लामा तामाङले प्रदेश सांसदहरुको एकताले मात्रै प्रदेशको विकास सम्भव रहको भन्दै प्रदेश सरकारलाई अन्तरसम्बन्ध सिर्जना गर्ने खालका कार्यक्रम ल्याउन आग्रह गरे।
प्रमुख प्रतिपक्ष दल नेपाली कांग्रेसका तर्फबाट बोल्दै सांसद कर्ण मल्लले डडेलधुरा दुर्घटनाका मृतकका परिवारको अभिभावकत्व ग्रहण गर्न प्रदेश सरकारलाई आग्रह गरे। उनले प्रदेश सरकार योजना ठूलो ल्याएपनि कार्यान्वयन गर्न यस वर्ष पनि असफल भएको आरोप लगाए।
प्रतिपक्षी दल राजपाका सांसद कृष्णबहादुर चौधरीले पहिलो वर्ष सिकाईमा बितेपनि अर्को वर्ष सरकारले गति लिनै पर्नेमा जाेड दिए। उनले प्रदेश सरकारका मन्त्रीहरुले आफ्नो वडामा करोडौंको बजेट हाल्न सफल भएको भन्दै आलोचना गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
