फाइल तस्बिर
काठमाडौं- राष्ट्रपति विद्यादेवी भण्डारी आफ्ना चिनियाँ समकक्षी सी चीन फिङको निमन्त्रणामा चीनको राजकीय भ्रमणका लागि आज त्यसतर्फ प्रस्थान गरेकी छिन्।
राष्ट्रपति भण्डारीलाई आज त्रिभुवन अन्तर्राष्ट्रिय विमानस्थलको अति विशिष्ट कक्षमा उपराष्ट्रपति, प्रधानमन्त्री, सभामुख, राष्ट्रियसभाका अध्यक्ष, उपप्रधानमन्त्री एवं रक्षामन्त्री र गृहमन्त्रीले बिदाइ गरे। सो अवसरमा मन्त्रिगण, सांसद, सरकारका विशिष्ट कर्मचारी, सुरक्षा निकायका प्रमुखलगायतकाे उपस्थिति रहेकाे थियाे।
भ्रमणका क्रममा राष्ट्रपति बेइजिङमा आयोजना हुने दोस्रो 'बेल्ट एन्ड रोड फोरम फर इन्टरनेसनल कोअपरेसन'मा सहभागी हुनेछिन्। साथै राष्ट्रपति भण्डारीले उक्त फोरमलाई सम्बोधन गर्ने कार्यक्रम रहेको परराष्ट्र मन्त्रालयले जनाएको छ।
भ्रमणका अवसरमा नेपाल र चीनका राष्ट्रपतिबीच प्रतिनिधिमण्डलस्तरीय द्विपक्षीय वार्ता हुनेछ। वार्तापछि पारस्परिक सहयोगसम्बन्धी समझदारीपत्रमा हस्ताक्षर हुनेछ। राष्ट्रपति भण्डारीले वरिष्ठ चिनियाँ अधिकारीसँग बेग्लाबेग्लै भेटवार्ता गर्ने कार्यक्रम रहेको परराष्ट्र मन्त्रालयले जनाएको छ।
बेइजिङ प्रस्थान गर्ने क्रममा राष्ट्रपतिले सान्सी प्रान्तको राजधानी सियानको भ्रमण गर्नेछिन्। स्वदेश फर्किंदा चीनको स्वशासित क्षेत्र तिब्बतकाे राजधानी ल्हासाको भ्रमण गर्ने समेत कार्यक्रम रहेकाे बताइएकाे छ। उनले ती दुवै प्रान्तका राजनीतिक नेताहरूसँग भेटवार्तासमेत गर्ने परराष्ट्र मन्त्रालयले जनाएकाे छ।
राष्ट्रपति भण्डारीका साथमा परराष्ट्रमन्त्री प्रदीपकुमार ज्ञवाली, प्रदेश ३ का मुख्यमन्त्री डोरमणि पौडेल, सङ्घीय संसद्का सदस्य, नेपाल सरकारका उच्च अधिकारी, चीनका लागि नेपाली राजदूत, निजी क्षेत्रका प्रतिनिधि र सञ्चारकर्मी चीन जाँदैछन्।
राष्ट्रपति भण्डारी बैसाख १९ गते स्वदेश फर्कने कार्यक्रम छ।
यसैबीच नेपाल सरकारका ३ मन्त्री आइतबारै चीन पुगेका थिए। सम्मेलनमा सहभागी हुनकै लागि भाैतिक पूर्वाधार तथा यातायात मन्त्री रघुवीर महासेठ, उद्याेग, वाणिज्य तथा आपूर्तिमन्त्री मातृकाप्रसाद यादव र महिला, बालबालिका तथा जेष्ठ नागरिक मन्त्री थममाया थापा चीन गएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
