एजेन्सी- भारतीय सर्वोच्च अदालतका प्रधानन्यायाधीश रञ्जन गोगोईमाथि लागेको यौन दुर्व्यवहारको आरोप छानबिन गर्न सर्वोच्चले आन्तरिम समिति निर्माण गरेको छ। तीन बहालवाला न्यायाधीशको नेतृत्वमा प्रधानन्यायाधीशमाथि छानबिन गर्न विशेष समिति गठन भएको हो। उक्त समितिमा न्यायाधीशहरु एस ए बोबडे, एन बी रामना र इन्दिरा बनर्जी रहेका छन्। न्यायाधीश बोबडे गोगोई पछिका वरिष्ठ न्यायाधीश हुन्।
उक्त समितिले शुक्रबारबाट आफ्नो काम थालनी गर्नेछ। यो कुनै न्यायिक जाँच नभई विभागीय समिति मात्र हुनेछ। त्यसैगरी सर्वोच्चले अधिवक्ता उत्सव बोसका नाममा सूचना जारी गरेको छ। उनले पीडित महिलाविरुद्ध आफूले मुद्दा लड्ने घोषणा गरेका थिए। उनले प्रधान न्यायाधीश गोगोईलाई फसाएर राजीनामा गराउने उद्देश्यले यस्तो घटना भएको दाबी गरेका थिए।
के थियो घटना?
प्रधानन्यायाधीश गोगोईलाई त्यहाँको सर्वोच्च अदालतकी एक पूर्वकर्मचारीले यौन उत्पीडनको आरोप लगाएकी छन्।
३५ वर्षीया ती महिलाको उजुरीमा गोगोईले प्रधानन्यायाधीश नियुक्त हुनेबित्तिकै गत अक्टोबरमा उनलाई दुई पटक यौन दुराचार गरेको आरोप लगाइएकी थिइन्। उनले यौन उत्पीडन गरेको र त्यस्तो गर्न नमान्दा परिवारलाई विभिन्न किसिमले यातना दिएको गरेको बताएकी छन्।
आफूमाथि गम्भीर आरोप लागेपछि ६४ वर्षीय गोगोईले आरोपलाई पूर्ण रूपमा अस्वीकार गर्दै त्यसलाई ‘गलत र न्यायपालिकाको स्वतन्त्रता विपरीत’ आरोप आएको टिप्पणी गरेका थिए।
उक्त आरोपलाई उनले न्यायपालिकाको स्वतन्त्रतामाथिको गम्भीर खतरा पुर्याउनुका साथै अदालत अस्थिर बनाने षड्यन्त्र भएको टिप्पणी गरेका छन्। आरोप लगाउने महिलाले एउटा उजुरीपत्र सर्वोच्च अदालतका सबै २२ जना न्यायाधीशहरूलाई पठाएकी छन्।
को हुन् उजुरी हाल्ने?
प्रधानन्यायाधीश विरुद्ध उजुरी हाल्ने महिला विवाहित हुन्। भारतीय कानुन अनुसार उनको नाम सार्वजनिक गर्न नमिल्ने भएकाले गोप्य राखिएको छ। उनले आरोपपत्रमा गत अक्टोबर १० र ११ मा गोगोईको निवासमा यौन दुराचार भएको उल्लेख गरेकी छन्। ‘उनले मेरो कम्मर समाते र हातले शरीरभरि सुमसुम्याए,’ महिलाको आरोपमा उल्लेख छ, ‘उनले मलाई नछोडेपछि धकेलेर उनको कब्जाबाट निस्केँ।’
उनको उजुरीमा र गोगोईले उक्त घटनाबारे सार्वजनिक गरेमा ‘परिवारलाई धेरै दु:ख हुन सक्छ’ भन्दै धम्की समेत दिएको उल्लेख छ। यही प्रकरणका कारण आफूलाई तीन ठाँउमा सरुवा गरिएको र गत डिसेम्बरमा जागिरबाट हटाइएको आरोप उनले लगाएकी छन्।
उनले आफ्ना पति र भाइलाई पनि निलम्बन गरिएको उजुरीमा उल्लेख गरेकी छन्।
आरोपी महिलामाथि घुस लिएको उजुरी
प्रधानन्यायाधीश गोगोईमाथि आरोप लगाउने महिला आफै यसअघि विवादमा आएकी थिइन् । गत मार्चमा हरियानाको झज्जर सहरवासी एक जनाले ती महिलाले अदालतमा जागिर लगाइदिने आश्वासन दिएर घुसका रूपमा पैसा लिएको भन्दै उजुरी गरेका थिए।
उनले उक्त आरोपलाई अस्वीकार गर्दै र गत मार्चमा परिवारका सदस्यसहित प्रहरी चौकीमा उपस्थित हुँदा उनीहरूमाथि दुर्व्यवहार गरिएको जिकिर गरेकी थिइन्।
गोगोई के भन्छन्?
उक्त प्रकरणमा प्रधानन्यायाधीश गोगोईले स्वतन्त्र न्यायालयलाई खतरा हुने गरी ठूलो शक्तिको आडमा आफूमाथि उजुरी परेको प्रतिक्रिया दिएका थिए। त्यस्तै उक्त प्रकरणमा पहिलो प्रतिक्रिया प्रधानन्यायाधीशका तर्फबाट सर्वोच्च अदालतका महासचिवद्वारा वक्तव्यमार्फत खण्डन गरिएको थियो।
उनले सर्वोच्च अदालतका सबै कर्मचारीहरुलाई आफूले सम्मानपूर्ण व्यवहार गरेको दाबी गर्दै न्यायाधीशहरुको फुलकोर्टमा त्यस बारेमा स्पष्टीकरण दिएका थिए। सर्वोच्चले जारी गरेको उक्त वक्तव्यका ‘कुनै पनि बेला ती महिलाको प्रधानन्यायाधीशसँग प्रत्यक्ष रूपमा कुराकानी समेत भएको नभएको’ दाबी गरिएको छ।
उक्त वक्तव्यमा ती महिलाविरुद्ध भ्रष्टाचारको आरोपमा लागेको र उक्त आरोपवाट बच्न प्रधानन्यायाधीश विरुद्ध आरोप लगाएको भनिएको छ।
गत शनिबार सर्वोच्च अदालनको विशेष इजलाससमक्ष गोगोईले आफैले पनि उक्त प्रकरणलाई सम्बोधन गरेका थिए। ‘म यी आरोपमा जवाफ दिन उपस्थित हुँदा अपमानित महसुस हुन चाहन्नँ,’ उनले भने, ‘मैले सर्वोच्च अदालतका सबै कर्मचारीलाई आदरपूर्वक व्यवहार गरेको छु र भविष्यमा पनि गर्नेछु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
