काठमाडौं– कुनै मानपदवी तथा पुरस्कार पाउनेबित्तिकै सामाजिक सञ्जालमा तस्बिर पोस्ट गर्दै प्रचारप्रसार गर्ने प्रहरी अधिकारीमाथि प्रहरी प्रधान कार्यालयले कारबाही सुरु गरेको छ।
बैसाख १ गते राष्ट्रपतिबाट विभूषित भएकाहरुले फेसबुकमा तस्बिर राख्दै प्रचारप्रसार गरेपछि हेडक्वार्टरले सचेत गराउँदै हटाउन निर्देशन दिएको छ।
गत वर्षको असोज ३ गते संविधान दिवसको अवसर पारेर सरकारले विभिन्न क्षेत्रमा योगदान पुर्याएका व्यक्तिहरुको सूची निकाल्दै विभूषित गर्ने घोषणा गरेको थियो। सोही क्रममा राष्ट्रपति विद्यादेवी भण्डारीले बैसाख १ गते विभिन्न क्षेत्रमा योगदान पुर्याउने व्यक्तिलाई सम्मानपत्र दिँदै विभूषित गरेकी थिइन्।
उक्त सम्मान नेपाल प्रहरीका झन्डै ४० जना प्रहरीले पाएका थिए।
सुप्रबल जनसेवा श्री तृतीयबाट डिआइजी विकास श्रेष्ठ, विनोद शर्मा घिमिरे विभूषित भएका थिए भने डिआइजी आशा सिंह प्रबल जनसेवाश्री तृतीयबाट सम्मानित भएकी थिइन्।
त्यस्तै एसएसपी रामदत्त जोशी, टेकप्रसाद राई, एसपी विष्णुकुमार केसी, एसपी चन्द्रकुवेर खापुङ, एसएसपी श्यामलाल ज्ञवाली, एसपी दानबहादुर कार्की, डिएसपी जनार्दन जिसी, सुवास चन्द्र बोहरा लगायतले रााष्ट्रपतिबाट सम्मान पाएका थिए।
यसरी सम्मान पाउनेमध्ये केही प्रहरी अधिकारीले उक्त तस्बिर सामाजिक सञ्जालमा राख्दै प्रचार गरेका थिए। उक्त कार्य सामाजिक सञ्जाल प्रयोग सम्बन्धी कार्यविधिविपरीत भएको भन्दै हेडक्वार्टरले हटाउन निर्देशन दिएको स्रोतले नेपाल लाइभलाई जानकारी दियो।
‘प्रहरी समन्वय समिति (पिसिसी) बैठकबाट समेत पारित भएको कार्यविधिको ख्याल नगरी यसरी समाजिक सञ्जालमा प्रसार प्रसार गरेको देखिएपछि हटाउन निर्देशन दिइएको हो,’ हेडक्वार्टर स्रोतले भन्यो।
काम सबैले मिलेर सांगठनिक रुपमा गरिएको हुन्छ तर प्रचार गर्दा एउटा व्यक्तिले गरे जस्तो हुने भएकाले शोभनीय नदेखिएको भन्दै निर्देशन आएपछि आफूले राखेको तस्बिर हटाएको एक प्रहरीले बताए।
अहिले पुरस्कार तथा सम्मान पाएका अधिकांश प्रहरीले उक्त तस्बिर फेसबुकबाट हटाएका छन्। अरुले नै राखेर ट्याग गरिएका तस्बिर भने अझै देख्न सकिन्छ।
तर, कुनै सामाजिक काम सामूहिक रुपमा गरिरहेको बेला खिचिएका तस्बिर भने हाल्न पाइने हेडक्वार्टर स्रोतले जानएको छ। सम्मान पाएको तस्बिर खिचेर अरु कसैले ट्याग गरी हालेको अवस्थामा समेत हटाउन बाध्यकारी नपारिने तर आफैंले हाल्न नपाइने स्रोतले बतायो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1763559424.jpg)
-1764080971.png)
