फाइल तस्बिर
काठमाडौं– नेत्रविक्रम चन्द 'विप्लव' नेतृत्वको नेपाल कम्युनिष्ट पार्टी (नेकपा)लाई प्रतिबन्ध लगाएपछि गृह मन्त्रालयले अवैध हातहतियार प्रशासनमा बुझाउन भन्दै सूचना जारी गरेको थियो।
गत फागुन २८ गते विप्लव समूहमाथि प्रतिबन्ध लगाएपछि चैत १ गते ३५ दिनको म्याद दिएर निकालिएको सूचनाको मिति सकिएकाे छ। यसबीचमा ४ सय २९ थान हतियार प्रशासनमा बुझाइएको छ।
प्रहरी प्रधान कार्यालयको तथ्यांकअनुसार १ नम्बर प्रदेशका विभिन्न जिल्लाबाट गरी ३६ थान हतियार बुझाइएको छ। प्रदेश २ बाट भने जम्मा ४ थान अवैध हतियार प्रहरी कार्यालयमा बुझाइएको प्रहरी प्रधान कार्यालयले जनाएको छ। प्रदेश ३ का जिल्लाहरुबाट ७९ थान हतियार बुझाइँदा गण्डकी प्रदेशबाट ३९ थान, प्रदेश ५ बाट १ सय १९ थान, कर्णाली प्रदेशबाट २१ र सबैभन्दा बढी सदूरश्चिम प्रदेशबाट १ सय ३१ थान हतियार प्रशासनमा बुझाइएको छ।
बुझाइएका अधिकांश हतियारहरु भरुवा बन्दुक भएको नेपाल प्रहरीका केन्द्रीय प्रवक्ता उत्तमराज सुवेदीले जानकारी दिए। लाइसेन्स लिएर नवीकरण नगरिएका हतियार समेत संकलन गरिएको उनले बताए।
त्यसैगरी, प्रहरीले २०७५ सालमा ठूलो मात्रामा हतियार बरामद गरेको जनाएकाे छ। नेपाल प्रहरीको तथ्याङ्क अनुसार २०७५ सालभरीमा २ सय ६७ थान हतियार बरामद भएका छन्। यस वर्ष सबैभन्दा बढी भरुवा बन्दुक १ सय ३१ थान बरामद भएको छ।
त्यस्तै, पेस्तोल ५३ थान, रिभल्वर ६ थान, कटुवा पेस्तोल ४४ थान र बन्दुक ३३ थान गरी २ सय ६७ थान हतियार ०७५ सालमा बरामद गरिएको प्रवक्ता सुवेदीले बताए।
बन्दुक तथा पेस्तोलमा प्रयोग हुने ६ सय ३७ थान गोली पनि प्रहरीले बरामद गरेको छ।
गोली र हतियारसहित प्रहरीले ३ सय ५१ जनालाई समेत पक्राउ गरेको थियो। उनीहरुलाई कानुनी दायरामा ल्याइसकिएको प्रहरीले जनाएको छ। अघिल्लो वर्ष ०७४ सालमा भने प्रहरीले २ सय ३८ थान हतियार बरामद गरेको थियो भने ३ सय ९ जना पक्राउ परेका थिए। उनीहरुको साथबाट ३ सय ५६ थान गोली बरामद भएको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।