इलाम- मौसम खुलेसँगै इलामका प्रमुख पर्यटकीय स्थलहरुमा आन्तरिक तथा बाह्य पर्यटकको आगमन बढ्न थालेको छ।
जिल्लाकै अग्लो स्थानमा रहेको सन्दकपुर, कन्यामको चिया बगान, सानो पाथीभरा, माईपोखरी, गजुरमुखी र अन्य सीमावर्ती पर्यटकीय स्थलमा चहलपहल बढ्न थालेको हो।
यस पटक छिटै मौसम खुलेकाले सन्दकपुरमा पर्यटक आवागमन बढेको सन्दकपुर गाउँपालिकास्थित जमुनाका कुमार गुरूङले बताए। सन्दकपुरमा पर्यटकको बाक्लो उपस्थितिले यस क्षेत्रका होटल बुक भइसकेका छन्।
कञ्चनजंघा, सगरमाथा, कुम्भकर्ण लगायतका हिमशृंखलासँगै सूर्योदय दृश्यावलोकनका लागि यहाँ पर्यटक आउने गरेका छन्। यहाँबाट नेपाल र भारतका थुप्रै स्थान देख्न सकिन्छ।
यसैगरी, कन्याममा पनि वनभोज खाने र घुम्न आउने पर्यटकको संख्या अत्यधिक छ। यहाँ दैनिक एक हजारभन्दा बढी आन्तरिक र बाह्य पर्यटक आउने गरेको स्थानीयवासी गणेश अर्याल बताउँछन्। झापा, मोरङ, काठमाडौं लगायत देशका विभिन्न भागबाट आन्तरिक पर्यटक आउने गरेका छन्।
उता, सिमसार क्षेत्र माईपोखरी घुम्न दैनिक पाँच सयभन्दा बढी पर्यटक आउने गरेको स्थानीय कमल मुखियाले बताए। माईपोखरीमा विश्वमै लोपोन्मुख गलैंचे झ्याउ, विभिन्न प्रजातिका चरा, ठकठके लगायतका पक्षी तथा वनस्पति पाइन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
