तिलोत्तमाले सडक डिभाइडरमा राख्यो बुद्धमुर्ति, पर्यटन प्रवर्द्धनमा टेवा पुग्ने विश्वास

समाज

दीपक घिमिरे सोमबार, वैशाख २, २०७६ ०९:१०

बुटवल- रुपन्देहीको तिलोत्तमा नगरपालिकाले मुख्य सडकमा बुद्धका आकर्षक मुर्ति राख्न थालेको छ। लुम्बिनीको पर्यटन प्रवर्द्धनमा टेवा पुर्‍याउने उद्देश्यले 'लुम्बिनी भ्रमण वर्ष'को अवसर पारेर तिलोत्तमाले बेलहिया बुटवल ६ लेन सडककाे डिभाइडरमा बुद्धमुर्ति राखेको हो।

तिलोत्तमाको प्रवेशद्धार योगिकुटीमा स्थापना गरिएको बुद्धमुर्तिको एक कार्यक्रमबीच प्रदेश सरकारका उद्योग, पर्यटन, वन तथा वातावरण मन्त्री लिला गिरीले अनावरण गरे। ६ लेन सडककाे डिभाइडरको २ सय ५० देखि ३ सय मिटर दूरीमा बुद्धमुर्ति राखिनेछ।

पहिलो चरणमा ६ लेन सडक निर्माण पूरा भएको मणिग्रामसम्म २२ वटा आकर्षक बुद्धमुर्ति राखिने नगरपालिकाले जनाएको छ। नगरपालिकाले चालू आर्थिक वर्षको बजेटमा साे सडकखण्डमा बुद्धमूर्ति राख्ने गरी बजेट विनियोजन गरेको थियो। निर्माण सकिएसँगै कोटिहवासम्मकैं सडक डिभाइडरमा बुद्धमूर्ति राख्ने नगरपालिकाको योजना छ।

६ लेन सडकमा हरियाली प्रवर्द्धन र नियमित सरसफाई अभियान सञ्चालन गर्दै आएको तिलोत्तमाले पर्यटकलाई आकर्षित गर्न सडकमा बुद्धमुर्ति राखेको हो। बुद्धमुर्ति अनावरण कार्यक्रममा बोल्दै मन्त्री गिरीले लुम्बिनीको पर्यटन प्रवर्द्धनले समग्र प्रदेशको विकासमा महत्वपूर्ण टेवा पुर्‍याउने भएकाले प्रदेश सरकारले यो वर्षलाई 'लुम्बिनी भ्रमण वर्ष' घोषणा गरेको जानकारी दिए। 'लुम्बिनी भ्रमण वर्ष'लाई सफल बनाउन सबैले आ-आफ्नो क्षेत्रबाट योगदान गर्नुपर्नेमा जोड दिँदै मन्त्री गिरीले सडकलाई सुन्दर बनाउनेगरी तिलोत्तमाले बुद्धमुर्ति राखेकोमा सह्रहाना व्यक्त गरे।

सरसफाई र हरियाली प्रवर्द्धनका कामलाई अघि बढाएर तिलोत्तमाले रचनात्मक काम गर्दै आएको उल्लेख गर्दै मन्त्री पोखरेलले यस्ता अभियानमा नागरिक सहभागितालाई अझै बलियो बनाउन आग्रह गरे। प्रदेश सरकारले अधिकतम स्वदेशी तथा विदेशी पर्यटक लुम्बिनी ल्याउने गरी विभिन्न योजना बनाएको जानकारी मन्त्री गिरीले दिए।

कार्यक्रममा तिलोत्तमा नगर प्रमुख बासुदेव घिमिरेले बुद्धमुर्ति राखिएसँगै ६ लेन सडकको डिभाइडरलाई आकर्षक फूलबारी बनाउने योजनाका साथ नगरपालिका अघि बढेको जानकारी दिए। स्थानीय बासिन्दाको साथ, सहयोगले सडकलाई आकर्षक बनाउन विभिन्न कामहरु भइरहेको बताउँदै उनले बुद्धमुर्ति नगरको पहिचानका लागि पनि हुने उल्लेख गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।