वीरगञ्ज- नेपाल तथा भारत सरकारको प्राथमिकतामा रहेको मोतिहारी अमलेखगन्ज पेट्रोलियम पाइपलाइनको बाँकी ९ किलोमिटरको काम धमाधम भइरहेको छ। पर्सा राष्ट्रिय निकुञ्ज क्षेत्रभित्र निर्माण गर्न त्यस क्षेत्रका ९ किलोमिटरभित्र पर्ने रुख काट्ने तथा पाइप जोडने कामले तीव्रता पाएको हो।
मोतिहारी अमलेखगन्ज पेट्रोलियम पाइपलाइन परियोजना कार्यालय सिमराका अनुसार नेपालतर्फको ३६ दशमलव २ किलोमिटर भू–भागमध्ये बाँकी रहेको ९ किलोमिटर क्षेत्रमा काम भइरहेको हो। सो क्षेत्रमा दुई किलोमिटर पाइप गाड्ने काम सम्पन्न भइसकेको छ।
तीव्र गतिमा बाँकी काम भइरहेकाले सो काम चाँडै सकिएर जमिनमुनि पाइप गाड्ने काम सम्पन्न भएपछि भारतबाट पेट्रोल ल्याउने काम सुरु हुने परियोजनाका इन्जिनियर शरदकुमार पौड्यालले बताए। बढीमा तीन महिनाभित्र काम सम्पन्न भई भारत बिहारको राजधानी पटनाबाट पाइपलाइनमार्फत पेट्रोलियम पदार्थ आउने परियोजना कार्यालय सिमराले जनाएको छ।
सो क्षेत्रमा ६ हजार ५६३ रुख काट्ने काम तीव्रगतिमा भइरहेको छ।
गत माघ ३ गते बसेको मन्त्रिपरिषद्को निर्णय अनुसार निकुञ्जभित्रका रुख काट्ने काम सुरु भएको छ। सो रुख काटेबापत नेपाल सरकारले निकुञ्जलाई रु एक करोड ९५ लाख तिर्नुपर्नेछ।
उता भारतको मोतिहारीदेखि रक्सौल नाकासम्म ३३ दशमलव ७ किलोमिटर भू–भागको काम सम्पन्न भइसकेको भारतीय आयल कर्पोरेसनले जनाएको छ। नेपालको लाइफलाइनको रुपमा रहेको भारतको मोतिहारीदेखि बाराको अमलेखगन्जसम्म ७० किलोमिटर लम्बाइको सो पाइपलाइन निर्माणको लागि भारत सरकारले ३५० करोड भारतीय लगानी गरेको बताइएको छ।
गत चैतको अन्तिम साता भारत भ्रमणको क्रममा प्रधानमन्त्री केपी शर्मा ओली तथा समकक्षी भारतीय प्रधानमन्त्री नरेन्द्र मोदीले नयाँदिल्लीको हैदरावाद हाउसबाट संयुक्त रुपमा मोतिहारी-अमलेखगन्ज पेट्रोलियम पाइप लाइनको शिलान्यास गरेपछि यसले गति लिएको हो। जमिनमुनि पाइप ओछ्याउने काम अन्तिम चरणमा पुगेको पाइपलाइन परियोजना कार्यालय सिमराले जनाएको छ।
२०७२ मा नेपाल भारतबीच भएको द्विपक्षीय सम्झौता अनुसार भारतीय आयल कर्पोरेसनले सो पाइप निर्माणको कार्य अघि बढाएको छ। पाइपलाइन विछ्याउने काम सम्पन्न भएपछि पेट्रोलियम पदार्थ भण्डारण गर्नको लागि अमलेखगन्ज आयल निगमको डिपोमा ३९ सय किलोलिटर क्षमता भएको चारवटा ट्यांकीको मर्मत,सम्भार द्रुत गतिमा भइरहेको छ। रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।