भैरहवा- भैरहवामा निर्माणाधीन गौतमबुद्ध अन्तर्राष्ट्रिय विमानस्थलको धावनमार्ग निर्माणकाे अन्तिम चरणकाे काम तीव्र रुपमा भइरहेको छ। ४ तहसम्म निर्माण हुने धावनमार्गकाे कालाेपत्रे गर्ने काम अब अन्तिम चरण मात्रै बाँकि छ।
चौथो तहको कालोपत्रे गर्ने काम पनि गत सातादेखि सुरु भएको थियो। यसबीचमा वर्षा तथा हावाहुरीका कारण कालाेपत्रे गर्न समस्या भएकाे आयोजनाले जनाएको छ। धावनमार्ग ३ किलोमिटर लम्बाईको छ। अन्तिम सतहको कालोपत्रे साढे ७ सेन्टिमिटरको हुनेछ।
धावनमार्गको अन्तिम चरणको कामसँगै 'ट्याक्सी वे' पनि कालोपत्रे गरिने विमानस्थलका आयोजना प्रमुख इ प्रवेश अधिकारीले जानकारी दिए। 'धावनमार्गमा कालाेपत्रेकाे कामसँगै ट्याक्सी वे पनि कालोपत्रे गर्छौं', आयाेजना प्रमुख अधिकारीले भने, 'कुनै बाधाअवरोध नआए ३० दिनमा धावनमार्ग निर्माण सम्पन्न हुन्छ।'
योसँगै धावनमार्ग 'ट्याक्सी वे'सँग जोडिनेछ। धावनमार्ग विमानस्थलको मेरुदण्ड हो। धावनमार्ग पूर्णरुपमा तयार भएपश्चात् आपतकालिन अवस्थामा काठमाडाैंमा अवतरण हुन नसक्ने अन्तर्राष्ट्रिय उडानका विमानहरुलाई यहाँ अवतरण गराउन सकिने आयोजना प्रमुख अधिकारीले जनाए। उनले अन्तर्राष्ट्रिय उडान तथा अवतरणका लागि आवश्यक पर्ने ‘आइकाओ’बाट प्रमाणपत्र प्राप्तिलगायत सम्पूर्ण कार्य पनि सन् २०१९ भित्र पुरा हुने जिकिर गरे।
उनले सरकारले घोषणा गरेको 'नेपाल भ्रमण वर्ष २०२०' लाई लक्षित गर्दै सोही वर्षको पहिलो महिनाभित्रै अन्तर्राष्ट्रिय उडान भर्ने जानकारी दिए। तर, त्यो भन्दा अघि विमानस्थलमा परिक्षण उडान सम्पन्न गराउने योजना रहेको उनले सुनाए। 'विमानस्थलका अन्य भौतिक पुर्वाधार निर्माण कार्य पनि समानन्तर रुपमा भइरहेको छ', उनले भने, 'तोकिएको समयावधि भित्र भौतिक संरचना निर्माण सम्पन्न हुन्छ।'
अहिले विमानस्थलमा धावनमार्गमा अन्तिम तहकाे कालोपत्रे, टर्मिनल भवन, पानी ट्यांकी, कन्ट्रोल टावर लगायतको काम धमाधाम भइरहेको छ। टर्मिनल भवनको छाना हाल्न बाँकी छ। छाना आइसकेको र केही दिन भित्रै छाना हाल्ने काम सुरु हुने प्रमुख अधिकारीले बताए। त्यस्तै टर्मिनल भवनको आगमन र प्रस्थान एवं प्रशासनिक भवनको पनि निर्माण कार्य अन्तिम चरणमा पुगेको छ। त्यहाँ विद्युत जडान र अन्य काम पनि भइरहेको छ।
७ तलाको हुने कन्ट्रोल टावर निर्माण भइसकेको छ। फिनिसिङ्ग तथा उडान, अवतरणमा प्रयोग हुने विद्युतिय उपकरणहरु जडान गर्न बाँकी रहेको आयोजनाले जनाएको छ। विमान पार्किङ्ग स्थल (एप्रोन) को काम पुरा भइसकेको छ। विमानस्थलको भौतिक निर्माण कार्य ७० प्रतिशत सम्पन्न भएको आयोजना प्रमुख अधिकारीले जानकारी दिए। कुल ६ अर्ब २२ करोड ५१ लाख २० हजार २ सय २७ रुपैयाँ लगानीमा निर्माणाधीन यस विमानस्थलमा एसियाली विकास बैंक (एडिबी)को ४० दशमलब ५ प्रतिशत ऋण तथा १८ प्रतिशत अनुदान रहेको छ। यस्तै ओपेक फन्ड फर इन्टरनेसनल डेमलपमेन्टको ३० दशमलव ५ प्रतिशत र थप ११ प्रतिशत तथा मूल्य अभिवृद्धि कर नेपाल सरकारले लगानी गर्नेछ।
निर्माणधीन विमानस्थलको टर्मिनल भवन र कन्ट्रोल टावर।
यो विमानस्थल ‘फोर ई’ स्तरको हो। जहाँ त्रिभुवन अन्तर्राष्ट्रिय विमानस्थलमा अवतरण गर्ने सबै जहाज अवतरण गर्न सक्छन्। यो विमानस्थलको दिर्घकालिन लक्ष्य दैनिक १६ हजार यात्रुलाई सेवा दिने रहेको छ। दैनिक १६ हजारको दरले वार्षिक करिब ६० लाख यात्रु यो विमानस्थल भएर यात्रा गर्ने आँकलन छ।
२०२३ सालमा भारत सरकारको सहयोगमा निर्मित गौतमबुद्ध विमानस्थललाई स्तरोन्नति गरी अन्तर्राष्ट्रिय विमानस्थलका रुपमा निर्माण गर्न चिनियाँ कम्पनीको 'नर्थ वेस्ट सिभिल एभियसन कम्पनि'ले जिम्मा पाएकाे थियाे। कम्पनीले ६ अर्ब २२ करोड ५१ लाख २० हजार २ सय २७ रुपैयाँमा ग्लोबल टेन्डरबाट सन् २०१७ डिसेम्बर ३१ सम्म सम्पन्न गर्ने सम्झौता गरेको थियो। तर, मधेस आन्दोलन, भूकम्पलगायत विभिन्न कारणले उसले सन् २०१९ जुनसम्म सम्पन्न गर्ने म्याद पाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
