काठमाडौं- अर्थमन्त्री डा. युवराज खतिवडाले १५औं पञ्चवर्षिय योजनाका लक्ष्य पूरा गर्न स्रोत व्यवस्थापन चुनौतीपूर्ण हुने बताएका छन्। राष्ट्रिय विकास परिषदको बैठकमा बोल्दै अर्थमन्त्री खतिवडाले आवधिक योजनाले अपेक्षा धेरै राखेका कारण श्रोत जुटाउन समस्या हुन सक्ने धारणा राखेका हुन्।
आगामी आर्थिक वर्ष २०७६/७७ देखि ५ आर्थिक वर्षका लागि कार्यान्वयनमा ल्याउने गरी राष्ट्रिय योजना आयोगले तयार पारेको दीर्घकालीन सोच सहितको १५औं योजनाको आधारपत्रका विषयमा बोल्दै अर्थमन्त्री खतिवडाले यस्तो धारणा राखेका हुन्।
‘सरकारले यो आवधिक योजना कार्यान्वयन गर्दा श्रोत व्यवस्थापनलाई ठूलो चुनौती ठानेको छ। त्यसको समाधानका लागि हामीले आन्तरिक बचतलाई प्राथमिकतामा राख्नुपर्छ। हामीले आन्तरिक बचतको दरलाई योजना अवधिसम्म १९ प्रतिशत पुर्याउने भनेका छौं । त्यसलाई २० प्रतिशतसम्म लैजानुपर्ने मैले देखेको छु,’ खतिवडाले भने।
विकासका सुरुका चरणहरुमा बचत गर्न नसकेपनि आर्थिक वृद्धिदर बढ्दै गएर निरपेक्ष गरिबी कम भई बचतको दर बढ्ने उनको भनाई थियो। अहिले तीनवटै तहको सरकारले श्रोत व्यवस्थापन र परिचालन गर्न सक्ने अवसर पनि सिर्जना भएको अर्थमन्त्री खतिवडाले धारणा राखेका थिए।
पञ्चवर्षीय योजना तयार पार्दा अवलम्बन गरेको लक्ष्य उद्देश्य र कार्ययोजना कार्यान्वयनमा लैजान सबै तहले आफ्नो भुमिका निर्वाह गर्न सके योजना सफल हुनेमा आफू विश्वस्त रहेको अर्थमन्त्री खतिवडाको भनाइ थियो।
तीनवटै तहका सरकारले बजेट र नीति तथा कार्यक्रम बनाउँदै गर्दा आवधिक योजनाको मर्म समेट्न सक्नुपर्ने उनको भनाइ छ।
बैठकले १५औं योजनाको आधारपत्र पारित गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
