रोल्पा- वित्तीय साक्षरता बढेसँगै रोल्पाका सहकारी संस्थामा सेयर लगानी गर्ने र बचत गर्ने क्रममा वृद्धि भएको छ। ३ वर्ष यता सुरु भएको वित्तीय साक्षरता कार्यक्रमले सहकारी संस्थामा सेयर लगानी गर्ने र नियमित बचत गर्नेको संख्यामा उल्लेख्य वृद्धि भएको हो।
जिल्लाका विभिन्न ९७ स्थानमा वित्तीय साक्षरता कक्षा संचालन भएको थियो। प्रति कक्षा २५ जनाका दरले सहभागीलाई २७ दिनसम्म विभिन्न विषयमा कक्षा संचालन गरिएको जिल्ला सहकारी संघ रोल्पाका अध्यक्ष कर्ण बाँठाले बताए। ‘सहकारी संस्था गठन भई निक्रिय अवस्थामा रहेका स्थान छनौट गरी यस्ता कक्षा संचालन गरेका हौँ,’ अध्यक्ष बाँठाले भने, ‘जिल्लाको मिरुल, थवाङ, फगाम, जेल्बाङ, ह्वामा र धबाङमा सघन रूपमा यस्ता कक्षा संचालन भएपनि अन्य स्थानमा समेत आवश्यकता अनुसार यस्तो कक्षा संचालन गरेको थियौ।’
वित्तीय साक्षरताका लागि तालिमप्राप्त सहजकर्ताले कक्षा संचालन गरेको विकास सरोकार समाज रोल्पाका वित्तिय साक्षरता अधिकृत हुमप्रसाद बाँठाले बताए। ‘साक्षरता कक्षा संचालन पछि निस्क्रिय सहकारी पनि सक्रिय हुन थालेका छन,’ अधिकृत बाँठाले भने। सघन रूपले सेवा प्रवाह गरेका जिल्लाका ६ वटा सहकारी संस्थामा ३ वर्ष अघि ३ सय ५५ जना शेयर सदस्य रहेकोमा हाल सो संख्या वृद्धि भई १ हजार २२८ पुगेको बताइएको छ। यसैगरी, १८ लाख ४८ हजार मात्रै बचत रहेको ती सहकारीले वित्तीय साक्षरता पश्चात १ करोड ८१ लाख ६९ हजार बचत गरेका छन्।
बचत रकम कृषि तथा गैर–कृषिक्षेत्रमा लगानी गरिएको बताइएको छ। बन्द हुने अवस्थामा पुगेका सहकारी संस्थाले पुनर्जीवन पाएको सहकारी अभियान्ताको भनाइ छ। जिल्लाभरका सहकारी संस्थामा यस्तो कार्यक्रमको आवश्यकता रहेको सहकारीकर्मीको भनाइ छ। देशको आर्थिक विकासमा सहकारी संस्थाहरुको भूमिका महत्वपूर्ण रहेकाले खुलेका सबै सहकारीलाई थप सबलीकरण गर्न जरुरी रहेको जिल्ला सहकारी संघका अध्यक्ष कर्ण बाँठाको भनाइ छ।
‘यूएसएडद्धारा संचालित कृषि स्वास्थ्य तथा वैकल्पिक जीविकोपार्जन प्रबद्र्धन कार्यक्रमले नमूनाको रुपमा जिल्लाका ६ वटा सहकारी संस्थामा गरेको कार्यक्रमले राम्रो प्रभाव देखियो,’ बाँठाले भने। अन्य सहयोगी निकायहरुले पनि यस्तो कार्यक्रम अन्य सहकारी संस्थामा समेत संचालन गर्नु पर्ने अध्यक्ष बाँठाको भनाइ छ।
सरकारी अनुदानका लागि खोलिएका अधिकांश सहकारी बन्द हुने अवस्थामा पुगेको छन्। सहकारीको मूल्यमान्यता नबुझेर सरकारी अनुदानका लागि खोलिएका यस्ता सहकारीहरु संकटग्रस्त अवस्थामा पुगेका हुन्। डा. बाबुराम भट्टराई अर्थमन्त्री हुँदा सहकारी संस्थाको सबलीकरणका लागि भन्दै प्रदान गरेको रकम समेत सदुपयोग नभएको बताइन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
