काठमाडौं- श्रम, रोजगार तथा सामाजिक सुरक्षा मन्त्रालयमा आजदेखि श्रमिकहरुको गुनासो सम्बोधन गर्नेगरी कलसेन्टर सञ्चालनमा आएको छ। कलसेन्टरको श्रम, रोजगार तथा सामाजिक सुरक्षामन्त्री गोकर्ण विष्टले रिबन काटी उद्घाटन गरे।
स्वदेश तथा परदेशमा रहेका सम्पूर्ण श्रमिकका गुनासा प्रत्यक्ष संकलन गरी तत्काल सम्बोधनमा पहल गर्न वैदेशिक रोजगार बोर्डको व्यवस्थापनमा कलसेन्टर सञ्चालनमा ल्याइएको हो। कलसेन्टरको सञ्चालनबाट आन्तरिक श्रम बजार, वैदेशिक रोजगार र सामाजिक सुरक्षा क्षेत्रसँग सम्बन्धित सेवाग्राहीहरुका समस्या, जिज्ञासा, गुनासा तथा सुझाव संकलन गरी सम्बोधन गरिने मन्त्रालयले जानकारी दिएको छ।
मन्त्री विष्टले कुनै पनि श्रमिक समस्यामा परेमा तत्काल उद्धारका लागि सम्बन्धित निकायमा कलसेन्टरमार्फत पहल गरिने जानकारी दिए। ‘कलसेन्टरमार्फत संकलन गरिएका जटिल खालका समस्या सम्बोधनमा मन्त्रालय आफैँले भूमिका निर्वाह गर्दछ, दैनिकजसो भइरहने समस्या वैदेशिक रोजगार बोर्डको मातहतमा सम्बोधन गरिन्छन्,' उनले भने।
परदेशमा मात्रै नभएर देशभित्र पनि धेरै श्रमिक समस्यामा रहेको भन्दै उनले अब आन्तरिक श्रम बजारभित्रका श्रमिकले पनि आफू समस्यामा परेको, समयमा तलब नपाएको, सम्झौता अनुसार तलब सुविधा नपाएको जस्ता समस्या कलसेन्टरमार्फत राख्न सकिने बताए।
सबै सामाजिक सञ्जालमार्फत गुनासो राख्न सकिने
कलसेन्टरमा सबै सामाजिक सञ्जाल फेसबुक, इमो, म्यासेन्जर, भाइबर, ह्वाट्सएप लगायत सबै खालका सामाजिक सञ्जालमार्फत गुनासाहरु राख्न सकिने उल्लेख गरिएको छ।
वैदेशिक रोजगारीका क्षेत्रमा ठगी लगायत समस्यामा परी न्यायको खोजीमा रहेका सम्पूर्ण सेवाग्राहीलाई कलसेन्टरमार्फत समेटिने जनाइएको छ। विदेशमा अलपत्र परेका, स्वास्थ्य समस्याबाट पीडित भई घर फर्कन चाहने, विविध कारण मृत्यु भई अलपत्र शवहरु नेपालसम्म ल्याउन नसकेमा, झुटा मुद्दामा जेल सजाय पाइरहेका श्रमिकका सम्बन्धमा समस्या राख्न पाउने व्यवस्था पनि गरिएको छ। झुटा मुद्दामा जेल सजाय पाएका श्रमिकलाई नि:शुल्क कानुनी सहायताको उपलब्धता लगायत विभिन्न सेवासुविधा, सिप विकास तथा अभिमुखीकरण तालिमको व्यवस्था लगायत आवश्यक सहायता प्रदान गरिने मन्त्रालयले जनाएको छ।
चौबीसै घन्टा सेवा दिन सकिने
श्रमिकहरुको गुनासो सुनुवाइका लागि कलसेन्टरमार्फत चौबीसै घन्टा सेवा दिइने बताइएको छ। कलसेन्टर स्थापनाको सुरुवाती (परीक्षण) चरणमा भने बिहान ७ बजेदेखि ९ बजेसम्म सञ्चालनमा ल्याइने मन्त्री विष्टले बताए।
त्यसपछि सेवाग्राहीहरुको आवश्यकता र प्रतिक्रियाका आधारमा हरेक दिन बिहान ७ बजेदेखि बेलुका ८ बजेसम्म सञ्चालनमा ल्याइने मन्त्रालयको भनाइ छ। आवश्यकताका आधारमा चौबीसै घन्टा सेवा दिन सक्ने गरी व्यवस्था गरिएको जनाइएको छ।
गुनासो वा सुझाव कसरी राख्ने?
स्वदेशमा भएका श्रमिकहरुले टोल फ्रि नम्बर ११४१ वा १६६००१५०००५ मार्फत आफ्ना गुनासा तथा सुझावहरु राख्न पाउने व्यवस्था गरिएको छ।
त्यस्तै विदेशमा भएका श्रमिकहरुले आफ्ना समस्या वा सुझाव इमेल, फेसबुक, मेसेन्जर, भाइबर, इमो जस्ता अनलाइन नेटवर्कबाट राख्न पाउने गरी व्यवस्था मिलाइएको छ। विदेशमा हुने श्रमिकहरुका लागि नि:शुल्क अनलाइन नेटवर्क ९७७१५९७०००८ नम्बरको व्यवस्था गरिएको छ। यो नम्बरमा टेलिफोनमार्फत गुनासा वा सुझाव राख्न परेमा शुल्क लाग्ने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
