काठमाडौं– कालोबजारी आरोपमा दरबारमार्ग क्षेत्रमा सञ्चालित ठूला पसलका प्रबन्धकहरुलाई प्रहरीले पक्राउ गरेको छ।
महानगरीय प्रहरी परिसर काठमाडौंले मंगलबार ८ वटा पसलका १० जना प्रबन्धकलाई पक्राउ गरेको हो। पक्राउ पर्नेहरुमा वाच एन्ड सीका राजेश्वर श्रेष्ठ, तिरुपति लिबर्टीका नन्द बिहानी, लेवल्स स्टोर प्रालिका जितेन्द्र महर्जन र सुवास महर्जन, एडभेन्चर आउटडोर गियर कम्पनीका रोशन ओडारी छन्। त्यस्तै लाइफस्टाइल इन्टरप्राइजेजका रौनक शर्मा र श्रीकृष्ण महर्जन, प्लेटिनम ट्रेड कन्सर्नका प्रवीण झा र बेन्टले द लेदर प्रालिका तुलसीराम भण्डारी छन्।
तत्कालीन आपूर्तिमन्त्री शिवकुमार मण्डलसहितको टोलीले गएको भदौ १९ र २० मा दरबारमार्गका १३ वटा ठूला पसलमा छापा मारी वास्तविक मूल्यभन्दा धेरै गुणा महँगोमा सामान बिक्री गर्ने पसलमा शिलबन्दी गरेको थियो।
आपूर्ति तथा उपभोक्ता हित संरक्षण विभागले ती पसलहरुमा प्रारम्भिक अनुसन्धान गरी कारबाही गर्न प्रहरीलाई पत्राचार गरेको थियो। सोही आधारमा प्रहरीले छापा हानेको हो। काठमाडौं परिसरलाई एक महिनाअघि नै आपूर्ति विभागले पत्राचार गरेको हो।
प्रबन्धकहरु पक्राउ परे पनि सञ्चालकहरु भने फरार छन्। उक्त घटना अनुसन्धानका लागि प्रहरी महानिरीक्षक प्रकाश अर्यालले निर्देशन दिएपछि काठमाडौं परिसरले मंगलबार छापा मारेको हो।
अनुसन्धानमा तानिएकामध्ये सुलेक्स वाच सेन्टर, फिटवेल सुज, सुबोध रिटेलरका कोही पनि पक्राउ परेका छैनन्। पक्राउ परेकालाई कालोबजारी मुद्दामा प्रहरीले जिल्ला प्रशासन कार्यालयमा मुद्दा चलाइने महानगरीय प्रहरी परिसर काठमाडौंका प्रवक्ता एसपी रामदत्त जोशीले बताए।
तर, दबाब र प्रभावको कारण आपूर्ति विभाग तथा प्रहरी दुवैले अनुसन्धानलाई फितलो बनाएका छन्। बरामद भएका केही बिलकै आधारमा त्यतिलाई बिगो बनाएर मुद्दा दायर गर्ने तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
