काभ्रेपलाञ्चोक- पाँचखालस्थित मसला बाली विकास केन्द्रले विभिन्न जातका आलुको बीउ उत्पादन गरिरहेको छ।
वर्षौंदेखि एउटै जात पुस्तान्तरण गरी आलु खेती गर्दा कम उत्पादन हुने भएपछि नयाँ पुस्ताका बीउ उत्पादन गरिएको केन्द्रप्रमुख युवराज पाण्डेले बताए। उनले केन्द्रमा आलुको पूर्व मूल बीउ र मूल बीउ उत्पादन गरिरहेको जानकारी दिए।
आलुको बीउ उत्पादनका लागि कुनै प्रकारका किरा छिर्न नसक्ने २ वटा ‘स्क्रिन हाउस’भित्र ल्याबमा 'टिस्यूकल्चर' गरिएका बिरुवा रोपिएको छ। पाण्डेले भने, 'रोपिएको बिरुवाबाट फलेको आलु पूर्व मूल बीउ बन्दछ, त्यसलाई पनि रोपेर फलाइएपछिको मूल बीउ हो।'
यो मौसममा रोपिएको ३ हजार ४ सय ४० बिरुवाबाट करिब २५ हजार दाना आलुको बीउ उत्पादन गर्ने लक्ष्य लिइएको केन्द्रप्रमुख पाण्डेले बताए। उनका अनुसार अहिले जनकदेव र कार्डिनल जातको आलुको बीउ उत्पादन भइरहेको छ। एउटा बिरुवामा ७ देखि १० दानासम्म फल्ने गर्दछ।
यहाँ उत्पादन गरिएको आलुको नयाँ बीउ किसान तथा बीउ बिक्रेतालाई दिइनेछ। उत्पादित 'प्रि-बेसिक' नयाँ आलुको बीउ दानाको गन्तीमा बिक्री गरिने पाण्डेले बताए। केन्द्रले पाँचखाल र उपत्यकामा बिस्तारै आलुको बीउ परिवर्तन गर्दै जाने योजना बनाएको छ। रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।