काठमाडौं– एम्नेस्टी इन्टरनेसनल नेपालले महिला हिंसा अन्त्यका लागि ठोस उपायहरूको माग राख्दै आज २३ हजार २ सय ४७ पत्रहरू गृह मन्त्रालयलाई बुझाएको छ।
पत्रहरू एम्नेस्टी इन्टरनेसनल नेपालका सदस्य तथा समर्थकहरूले एम्नेस्टी इन्टरनेसनलको सन् २०१८ को २९ नोभेम्बरदेखि २० डिसेम्बरसम्म चलेको विश्वव्यापी पत्र लेखन कार्यक्रम ‘राइट फर राइट्स’ अभियानका क्रममा सङ्कलन गरिएका थिए।
यी पत्रहरूमा अहिलेको स्थायी सरकार सहितको परिवर्तित राजनीतिक सन्दर्भमा समेत नेपालमा बढ्दो महिला हिंसा र गहिरिँदै गइरहेको दण्डहीनताको डरलाग्दो अवस्थाप्रति गृह मन्त्रीको ध्यानाकर्षण गराइएको छ।
पत्रहरूमा गृहमन्त्रीलाई महिलाविरुद्ध हुने सबैखाले हिंसा अन्त्यका लागि शीघ्र प्रभावकारी कदमहरू चाल्न, पीडकहरूलाई कानुनी कारबाही गर्न र बलात्कारको घटनामा उजुरी गर्ने हालका एकवर्षे हदम्यादको प्रावधान हटाई कुनै पनि हदम्याद नराख्ने दिशामा कानुन संशोधनको प्रक्रिया अघि बढाउन पनि माग गरेको छ।
एम्नेस्टी नेपालका निर्देशक निराजन थपलिया सहितको एक प्रतिनिधिमण्डलले गृहमन्त्रीका सल्लाहकाररविज्ञ सूर्य प्रकाश सुवेदीलाई उक्त पत्रहरू बुझाएको थियो।
हरेक वर्ष नोभेम्बर–डिसेम्बर महिनामा एम्नेस्टी इन्टरनेसनलले राइट फर राइट्स अभियान सञ्चालन गर्दछ। यस अभियानका क्रममा एम्नेस्टीले विश्वव्यापी रूपमा आफ्ना समर्थक र सदस्यहहरूलाई अन्यायविरुद्ध आवाज उठाउँने साहस गर्दा आफ्नो अधिकारको हनन् भएर प्रताडित भएका व्यक्तिहरूलाई ऐक्यबद्धताको सन्देश पठाउन अनुरोध गर्ने गरेको छ।
यस्ता साहसी व्यक्तिहरूको पक्षमा राज्य अधिकारीहरूलाई पत्र लेख्न पनि समर्थक र सदस्यहरूलाई आह्वान गरिन्छ।
यस वर्षको विश्वव्यापी पत्रलेखन राइट फर राइट्स २०१८ अभियानका क्रममा एम्नेस्टी इन्टरनेसनल नेपालले विश्वका विभिन्न भागका ६ जना महिला मानवअधिकार रक्षकहरका लागि अभियान सञ्चालन गरेको थियो। एम्नेस्टी इन्टरनेसनल नेपालका सदस्य तथा समर्थकहरूद्वारा ब्राजिलकी मारिएल फ्रान्को, भारतकी पवित्री माझी, इरानकी अटेना डेमी, किर्गिस्तानकी गुल्जार दुइश्नोभा, युक्रेनकी भितालिना कोभल, र दक्षिण अफ्रिकाकी नोन्हले मुठूमा जस्ता महिला मानवअधिकार रक्षकहरूका पक्षमा संलन गरिएका कुल १ लाख ५२ हजार ९ सय ६७ वटा पत्रहरू सम्बन्धित देशका अधिकारीहरूलाई पठाइने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
